ຍົກສູງວິຊາການວຽກງານຊາວໜຸ່ມ-ວຽກງານເຍົາວະຊົນ ໃຫ້ແກ່ພະນັກງານຄະນະຊາວໜຸ່ມຂອງນະຄອນຫຼວງວຽງຈັນ

ກ່າວຄໍາເຫັນທີ່ພິທີເປີດ, ທ່ານ ດ່າວດຶກຫວຽດ ຮອງເລຂາຄະນະຊາວໜຸ່ມນະຄອນຮ່າໂນ້ຍ ເນັ້ນໜັກວ່າ ຊຸດຝຶກອົບຮົມປີ 2025 ດໍາເນີນໄປໃນສະພາບສອງປະເທດຫວຽດນາມ-ລາວ ພວມມີການເຄື່ອນໄຫວດ້ານການເມືອງ, ປະຫວັດສາດອັນຍິ່ງໃຫຍ່ຫຼາຍຢ່າງ, ປະກອບສ່ວນເຮັດໃຫ້ສາຍພົວພັນມິດຕະພາບແບບພິເສດລະຫວ່າງສອງຊາດເລິກເຊິ່ງກວ່າອີກ.

ໄລຍະ  2022-2025, ການຮ່ວມມືລະຫວ່າງຄະນະຊາວໜຸ່ມນະຄອນຮ່າໂນ້ຍ ກັບຄະນະຊາວໜຸ່ມນະຄອນຫຼວງວຽງຈັນ ບັນລຸໄດ້ໝາກຜົນຕັ້ງໜ້າຫຼາຍຢ່າງ, ພົ້ນເດັ່ນແມ່ນບັນດາລາຍການພົບປະແລກປ່ຽນຊາວໜຸ່ມ, ການເຄື່ອນໄຫວອາສາສະໝັກທີ່ແທດຈິງ ແລະມີປະສິດທິຜົນ. ໃນນັ້ນ, ວຽກງານຝຶກອົບຮົມ ແລະບຳລຸງສ້າງພະນັກງານຊາວໜຸ່ມ ແລະຜູ້ຮັບຜິດຊອບວຽກງານເຍົາວະຊົນນະຄອນຫຼວງວຽງຈັນ ໄດ້ຮັບການຜັນຂະຫຍາຍຢ່າງມີແບບມີແຜນ, ບັນລຸໄດ້ໝາກຜົນລະອຽດຫຼາຍຢ່າງ.

ທ່ານ ດ່າວດຶກຫວຽດ ຮອງເລຂາຄະນະຊາວໜຸ່ມນະຄອນຮ່າໂນ້ຍ ກ່າວຄໍາເຫັນທີ່ພິທີເປີດຊຸດຝຶກອົບຮົມ. ພາບ: ສໍານັກຂ່າວສານຫວຽດນາມ

ແຕ່ປີ 2009 ມາຮອດປະຈຸບັນ, ໂຮງຮຽນ ເລຢວ໊ນ ໄດ້ຈັດຕັ້ງຊຸດອົບຮົມ 14 ຊຸດໃຫ້ແກ່ພະນັກງານຮັບຜິດຊອບວຽກງານເຍົາວະຊົນ ຂອງນະຄອນຫຼວງວຽງຈັນຂອງລາວ 280 ຄົນ. ພິເສດ, ນັບແຕ່ປີ 2022 ເປັນຕົ້ນມາ, ໄດ້ຜັນຂະຫຍາຍ 3 ຊຸດຝຶກອົບຮົມໃຫ້ແກ່ພະນັກງານວຽກງານຊາວໜຸ່ມ ຂອງຄະນະຊາວໜຸ່ມ ນະຄອນຫຼວງວຽງຈັນ 80 ຄົນ.

ທ່ານ ດ່າວດຶກຫວຽດ ຮອງເລຂາຄະນະຊາວໜຸ່ມນະຄອນຮ່າໂນ້ຍ ປາດຖະໜາວ່າ ບັນດານັກຝຶກອົບຮົມ ຈະເສີມຂະຫຍາຍຈິດໃຈ “ຮ່ຳຮຽນໄປຄຽງຄູ່ກັບການຝຶກຫັດ”, ຕັ້ງໜ້າແລກປ່ຽນບົດຮຽນເພື່ອໝູນໃຊ້ເຂົ້າໃນພາກປະຕິບັດຕິວຈິງ, ຍົກສູງຄຸນນະພາບການເຄື່ອນໄຫວຂອງວຽກງານເຍົາວະຊົນຢູ່ຮາກຖານ, ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບແບບພິເສດຫວຽດນາມ - ລາວ.

ບັນດານັກຝຶກອົບຮົມ ເຂົ້າຮ່ວມຊຸດຝຶກອົບຮົມ. ພາບ: ສໍານັກຂ່າວສານຫວຽດນາມ

ຕາງໜ້າຄະນະຜູ້ແທນລາວ, ສະຫາຍ ຄອນສະຫວັນ ສີຫານາມ,  ຫົວໜ້າຄະນະເຍົາວະຊົນ ຄະນະຊາວໜຸ່ມປະຊາຊົນປະຕິວັດລາວ ນະຄອນຫຼວງວຽງຈັນ ໄດ້ສະແດງຄວາມຂອບໃຈຢ່າງເລິກເຊິ່ງ ຕໍ່ຄະນະຊາວໜຸ່ມນະຄອນຮ່າໂນ້ຍ ແລະ ໂຮງຮຽນ ເລຢວ໊ນ. ສະຫາຍ ຄອນສະຫວັນ ສີຫານາມ ຢືນຢັນວ່າ: ໃນໂລກຫາຍາກມີສາຍພົວພັນແບບພິເສດ ແລະຍິ່ງໃຫຍ່ປຽບເໝືອນສາຍພົວພັນລະຫວ່າງສອງປະເທດອ້າຍນ້ອງ ຫວຽດນາມ - ລາວ.

ໃນເວລາ 25 ວັນ, ບັນດານັກຝຶກອົບຮົມ ຈະໄປທັດສະນະສຶກສາຢູ່ບັນດາສະຖານທີ່ວັດທະນະທຳ, ພົບປະແລກປ່ຽນກັບອົງການຈັດຕັ້ງຊາວໜຸ່ມ - ເຍົາວະຊົນໃນບໍລິເວນນະຄອນຮ່າໂນ້ຍ, ພ້ອມກັບບັນດາຄູອາຈານຮັບຜິດຊອບວຽກງານເຍົາວະຊົນ ໃນບໍລິເວນນະຄອນຫຼວງຮ່າໂນ້ຍ ເຂົ້າຮ່ວມຮູບແບບງານແຂ່ງຂັນ ເພື່ອແບ່ງປັນບົດຮຽນປະສົບການ, ຊອກຮູ້ວັດທະນະທຳຂອງສອງຊາດ, ຜ່ານນັ້ນຮັດແໜ້ນນໍ້າໃຈສາມັກຄີ, ມິດຕະພາບລະຫວ່າງສອງນະຄອນຫຼວງເວົ້າສະເພາະ ແລະສອງປະເທດເວົ້າລວມ.

ໂດຍ: ທູຈາງ