    |
 |
|
ທ່ານພົນໂທ ຮວ່າງຊວນຈ໊ຽນ ເຂົ້າຢ້ຽມຂໍ່ານັບທ່ານພົນໂທ ຄໍາລຽງ ອຸທະໄກສອນ ລັດຖະມົນຕີກະຊວງປ້ອງກັນປະເທດ ລາວ. ພາບ: qdnd.vn |
ທີ່ການພົບປະ, ສອງຝ່າຍສືບຕໍ່ຢັ້ງຢືນຄວາມປາດຖະໜາຢາກປັບປຸງ ແລະຮັດແໜ້ນກວ່າອີກການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະສອງກອງທັບ ຫວຽດນາມ-ລາວ. ໃນຂົງເຂດປ້ອງກັນຊາດ, ສອງຝ່າຍເຫັນດີເປັນເອກະພາບຈະຜັນຂະຫຍາຍບັນດາເນື້ອໃນທີ່ກະຊວງປ້ອງກັນປະເທດສອງປະເທດ ອະນຸມັດຜ່ານໃນແຜນການຮ່ວມມືປີ 2025.
|
|
 |
|
ທ່ານພົນໂທ ຮວ່າງຊວນຈ໊ຽນ ແລກປ່ຽນກັບທ່ານພົນໂທ ຄໍາລຽງ ອຸທະໄກສອນ ລັດຖະມົນຕີກະຊວງປ້ອງກັນປະເທດ ລາວ. ພາບ: qdnd.vn |
ຊົມເຊີຍທ່ານພົນໂທ ຄໍາລຽງ ອຸທະໄກສອນ ທີ່ໄດ້ຮັບການແຕ່ງຕັ້ງຈາກພັກ, ລັດລາວ ໃຫ້ດໍາລົງຕໍາແໜ່ງເປັນລັດຖະມົນຕີກະຊວງປ້ອງກັນປະເທດລາວ, ທ່ານພົນໂທ ຮວ່າງຊວນຈ໊ຽນ ສະແດງຄວາມເຊື່ອໝັ້ນວ່າ ໃນຖານະຕໍາແໜ່ງໃໝ່, ທ່ານພົນໂທ ຄໍາລຽງ ອຸທະໄກສອນ ຈະນໍາພາກອງທັບປະຊາຊົນ ລາວ ໃຫ້ນັບມື້ນັບພັດທະນາ, ການພົວພັນຮ່ວມມືລະຫວ່າງກອງທັບສອງປະເທດ ຫວຽດນາມ-ລາວ ນັບມື້ນັບໝັ້ນແກ່ນ.
|
|
 |
|
ບັນຍາກາດທີ່ການພົບປະ. ພາບ: qdnd.vn |
ຕາງໜ້າການນໍາກະຊວງປ້ອງກັນປະເທດຫວຽດນາມ, ທ່ານພົນໂທ ຮວ່າງຊວນຈ໊ຽນ ຂອບໃຈທ່ານພົນໂທ ຄໍາລຽງ ອຸທະໄກສອນ ທີ່ໄດ້ນໍາໜ້າຄະນະຜູ້ແທນຂັ້ນສູງກະຊວງປ້ອງກັນປະເທດ ລາວ ມາຢ້ຽມຢາມຫວຽດນາມ ຢ່າງເປັນທາງການ, ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງກອງທັບປະຊາຊົນຫວຽດນາມ ຄົບຮອບ 80 ປີ, ວັນບຸນປ້ອງກັນຊາດທົ່ວປວງຊົນ ຄົບຮອບ 35 ປີ ແລະງານວາງສະແດງປ້ອງກັນຊາດສາກົນຫວຽດນາມ ຄັ້ງທີສອງ ປີ 2024; ກໍຄື ສົ່ງວິສາຫະກິດປ້ອງກັນຊາດ ເຂົ້າຮ່ວມວາງສະແດງຜະລິດຕະພັນຢູ່ງານວາງສະແດງ; ສົ່ງຄະນະກອງແກວົງກອງທັບ ເຂົ້າຮ່ວມງານພົບປະແລກປ່ຽນສະແດງແກວົງກອງທັບ ປີ 2024 ແລະຄະນະສິລະປະກອນ ມາສະແດງຢູ່ບັນດາກົມກອງ ໃນກອງທັບ.
|
|
 |
|
ທ່ານພົນໂທ ຮວ່າງຊວນຈ໊ຽນ ມອບຊໍ່ດອກໄມ້ອວຍພອນທ່ານພົນໂທ ຄໍາລຽງ ອຸທະໄກສອນ ລັດຖະມົນຕີກະຊວງປ້ອງກັນປະເທດ ລາວ. ພາບ: qdnd.vn |
ທ່ານພົນໂທ ຮວ່າງຊວນຈ໊ຽນ ກໍແຈ້ງໃຫ້ທ່ານລັດຖະມົນຕີກະຊວງປ້ອງກັນປະເທດ ລາວ ໄດ້ຮັບຊາບ ກ່ຽວກັບຜົນການເຮັດວຽກກັບທ່ານພົນໂທ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ ລາວ, ໃນນັ້ນ ສອງຝ່າຍ ໄດ້ກໍານົດຈະສຸມໃສ່ເຂົ້າໃນບັນດາຈຸດສຸມການຮ່ວມມືໃນປີ 2025.
ກ່ອນໜ້ານັ້ນ ໃນວັນດຽວກັນ, ທ່ານພົນໂທ ຮວ່າງຊວນຈ໊ຽນ ໄດ້ພົບປະກັບ ທ່ານພົນໂທ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ ລາວ.
ທີ່ການພົບປະ, ສອງຝ່າຍ ເຫັນດີເປັນເອກະພາບຊີ້ນໍາບັນດາອົງການ, ກົມກອງສົມທົບກັນຢ່າງແໜ້ນແຟ້ນ ເພື່ອຜັນຂະຫຍາຍການປະຕິບັດບັນດາເນື້ອໃນຕາມອະນຸສັນຍາວ່າດ້ວຍການຮ່ວມມືດ້ານປ້ອງກັນຊາດ ຫວຽດນາມ-ລາວ ໄລຍະ 2025-2029, ແຜນການຮ່ວມມືປີ 2025 ແລະຄວາມຮັບຮູ້ລວມລະຫວ່າງການນໍາຂັ້ນສູງສອງປະເທດ. ສອງຝ່າຍເຫັນດີເປັນເອກະພາບນໍາກັນວ່າ ໃນໄລຍະຈະມາເຖິງ, ກະຊວງປ້ອງກັນປະເທດສອງປະເທດ ຈະສືບຕໍ່ສຸມໃສ່ຮັກສາ, ຊຸກຍູ້ບັນດາເນື້ອໃນຮ່ວມມື, ລວມມີ: ການແລກປ່ຽນຄະນະຜູ້ແທນທຸກຂັ້ນ, ຮັກສາປະສິດທິຜົນກົນໄກຮ່ວມມືທີ່ມີຢູ່ແລ້ວໃນປັດຈຸບັນ ຄື: ກອງປະຊຸມປຶກສາຫາລືນະໂຍບາຍປ້ອງກັນຊາດ ຫວຽດນາມ-ລາວ, ງານພົບປະແລກປ່ຽນນາຍທະຫານໜຸ່ມກອງທັບສອງປະເທດ...; ຊຸກຍູ້ການຮ່ວມມືກ່ຽວກັບການຮັກສາສັນຕິພາບ ສປຊ. ທ່ານ ພົນໂທ ຮວ່າງຊວນຈ໊ຽນ ຢັ້ງຢືນວ່າ ກະຊວງປ້ອງກັນປະເທດຫວຽດນາມ ສະໜັບສະໜູນ, ພ້ອມແລ້ວທີ່ຈະແລກປ່ຽນຄະນະປະຕິບັດງານ, ວິຊາສະເພາະ ເພື່ອໃຫ້ຄໍາປຶກສາກ່ຽວກັບວຽກງານກະກຽມ ແລະຜັນຂະຫຍາຍກໍາລັງ, ໜູນຊ່ວຍການອົບຮົມຫັດແອບ, ບໍາລຸງກໍ່ສ້າງ, ສ້າງຄວາມສາມາດຮັກສາສັນຕິພາບ ສປຊ ແລະຜັນຂະຫຍາຍກໍາລັງໃຫ້ແກ່ຝ່າຍລາວ.
ໂອກາດນີ້, ທ່ານພົນໂທ ຮວ່າງຊວນຈ໊ຽນ ສະແດງຄວາມປາດຖະໜາວ່າ ກະຊວງປ້ອງກັນປະເທດ ແລະລັດຖະບານລາວ ຈະສືບຕໍ່ເອົາໃຈໃສ່, ສ້າງເງື່ອນໄຂສະດວກ ເພື່ອໃຫ້ວິສາຫະກິດຫວຽດນາມ, ໃນນັ້ນມີວິສາຫະກິດກອງທັບ, ລົງທຶນຢູ່ລາວ ໃນບັນດາຂົງເຂດ: ເຕັກໂນໂລຊີຂໍ້ມູນຂ່າວສານ ແລະຫັນເປັນດີຈີຕອນແຫ່ງຊາດ, ໄປສະນີ, ກໍ່ສ້າງ, ຂຸດຄົ້ນ, ປຸງແຕ່ງແຮ່ທາດ...
ໂດຍ: ໄຊຊະນະ