ພັກກອມມູນິດຫວຽດນາມ ນັບມື້ນັບຍົກສູງບົດບາດໃນເວທີສາກົນ
ກປ.ອອນໄລ - ຜ່ານໄລຍະເກືອບ 40 ປີແຫ່ງການດໍາເນີນກິດຈະການປ່ຽນແປງໃໝ່, ຈາກພື້ນຖານເສດຖະກິດທຸກຍາກ, ຫຼ້າຫຼັງ, ຕາມກົນໄກວາງແຜນການລວມສູນ, ຕ້ອງອີງໃສ່ການຂຸດຄົ້ນຊັບພະຍາກອນ, ແຮງງານ ແລະທຶນຊ່ວຍເຫຼືອຈາກພາຍນອກ, ຫວຽດນາມ ໄດ້ດໍາເນີນການຫັນເປັນໄປສູ່ພື້ນຖານເສດຖະກິດການຕະຫຼາດຕາມທິດສັງຄົມນິຍົມ, ບັນລຸໄດ້ຜົນງານພັດທະນາອັນໃຫຍ່ ຫຼວງ, ມີຄວາມໝາຍປະຫວັດສາດ; ຂອບຂະໜາດ, ກໍາລັງບົ່ມຊ້ອນ, ຖານະບົດບາດ ແລະອິດທິພົນຊື່ສຽງໃນເວທີສາກົນ ນັບມື້ນັບໄດ້ຮັບຍົກສູງຂຶ້ນ. ນັ້ນແມ່ນການແບ່ງປັນຂອງທ່ານ ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ, ປະທານສະພາທິດສະດີສູນກາງພັກປະຊາຊົນປະຕິວັດລາວ.
ທ່ານ ຄໍາພັນ ເຜີຍຍະວົງ ຢັ້ງຢືນວ່າ ແນວທາງຂອງພັກກອມມູນິດຫວຽດນາມ ແມ່ນແນວທາງການເມືອງຖືກຕ້ອງ. ການປະຕິບັດແນວທາງປ່ຽນແປງໃໝ່ຂອງພັກກອມມູນິດຫວຽດນາມ ບັນລຸໄດ້ໝາກຜົນທີ່ກ້າວກະໂດດຂັ້ນ, ບຸກທະລຸໃນຫຼາຍຂົງເຂດ.
ຕາມທ່ານ ຄໍາພັນ ເຜີຍຍະວົງ ແລ້ວ, ຫວຽດນາມ ແມ່ນພື້ນຖານເສດຖະກິດໃຫຍ່ອັນດັບ 4 ຂອງອາຊຽນ, ຢືນອັນດັບທີ 32 ໃນໂລກ. ຄາດຄະເນວ່າ, ພື້ນຖານເສດຖະກິດຫວຽດນາມ ໃນໄລຍະຈະມາເຖິງຈະສືບຕໍ່ເພີ່ມຂຶ້ນລະດັບສອງຕົວເລກ.
    |
 |
|
ທ່ານ ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ, ປະທານສະພາທິດສະດີສູນກາງພັກປະຊາຊົນປະຕິວັດລາວ ຕອບຄໍາຖາມຕໍ່ນັກຂ່າວ. ພາບ: ສໍານັກຂ່າວສານຫວຽດນາມ |
ທາງດ້ານວັດທະນະທຳ, ທ່ານ ຄໍາພັນ ເຜີຍຍະວົງ ຖືວ່າ ຫວຽດນາມ ມີການປ່ຽນແປງໃໝ່ຢ່າງຈະແຈ້ງ, ຄຽງຄູ່ກັບການພັດທະນາຄຸນຄ່າວັດທະນະທຳທັນສະໄໝແມ່ນການຮັກສາສີສັນວັດທະນະທຳທີ່ເປັນມູນເຊື້ອ, ນໍາຫວຽດນາມ ກາຍເປັນປະເທດທີ່ດຶງດູດຕໍ່ກັບນັກທ່ອງທ່ຽວທັງພາຍໃນ ແລະຕ່າງປະເທດ. ທາງດ້ານສັງຄົມ, ຜ່ານເກືອບ 40 ປີແຫ່ງການປ່ຽນແປງໃໝ່, ຫວຽດນາມ ບັນລຸໄດ້ຜົນງານທີ່ພົ້ນເດັ່ນ, ອັດຕາຄອບຄົວທຸກຍາກຂອງຫວຽດນາມ ໄດ້ຫຼຸດລົງເຫຼືອພຽງ 2,93%.
ປະຈຸບັນ, ຫວຽດນາມ ພວມເອົາໃຈໃສ່ພັດທະນາການສຶກສາ, ໂພຊະນາການ, ຊັບພະຍາກອນມະນຸດທີ່ມີຄຸນນະພາບສູງເພື່ອພັດທະນາທັງດ້ານຈິດໃຈ. ທາງດ້ານວິທະຍາສາດ ແລະເຕັກໂນໂລຢີ, ຫວຽດນາມ ໄດ້ມີບາດກ້າວກະໂດດຂັ້ນໃນຂົງເຂດດັ່ງກ່າວ, ເປັນຕົ້ນແມ່ນໃນການຫັນເປັນດີຈີຕອນ ແລະການຫັນປ່ຽນປະດິດຄິດປະດິດສ້າງໄດ້ມີການພັດທະນາຢ່າງວ່ອງໄວ, ນຳມາເຊິ່ງປະສິດທິຜົນແບບຍືນຍົງໃຫ້ປະເທດຊາດ.
ໂດຍ: ທູຈາງ