ກອງປະຊຸມສໍາມະນາທິດສະດີ ຄັ້ງທີ 11 ລະຫວ່າງພັກກອມມູນິດຫວຽດນາມ ແລະພັກປະຊາຊົນປະຕິວັດລາວ

ນີ້ແມ່ນການເຄື່ອນໄຫວແນໃສ່ປະຕິບັດຂໍ້ຕົກລົງລະຫວ່າງພັກກອມມູນິດຫວຽດນາມ ແລະພັກປະຊາຊົນປະຕິວັດລາວ ກ່ຽວກັບການຮ່ວມມືຄົ້ນຄວ້າທິດສະດີ ແລະສະຫຼຸບພຶດຕິກໍາຕົວຈິງ.

ຄະນະຜູ້ແທນພັກກອມມູນິດຫວຽດນາມ ນໍາໂດຍ ທ່ານ ຫງວຽນຊວນຖັງ, ກຳມະການກົມການເມືອງ, ຫົວໜ້າສະຖາບັນການເມືອງແຫ່ງຊາດໂຮ່ຈີມິນ, ປະທານສະພາທິດສະດີສູນກາງພັກ;  ຄະນະຜູ້ແທນພັກປະຊາຊົນປະຕິວັດລາວ ນໍາໂດຍທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີລາວ.

ທ່ານ ຫງວຽນຊວນຖັງ, ກຳມະການກົມການເມືອງ, ຫົວໜ້າສະຖາບັນການເມືອງແຫ່ງຊາດໂຮ່ຈີມິນ, ປະທານສະພາທິດສະດີສູນກາງພັກ  ກ່າວຄໍາເຫັນທີ່ກອງປະຊຸມສໍາມະນາ. ພາບ: ສໍານັກຂ່າວສານຫວຽດນາມ

ທີ່ກອງປະຊຸມສໍາມະນາ, ບັນດາຜູ້ແທນໄດ້ແລກປ່ຽນ, ໄຈ້ແຍກທິດສະດີ ແລະພຶດຕິກໍາຕົວຈິງກ່ຽວກັບການກໍ່ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ, ຜ່ານນັ້ນເຮັດແຈ້ງບາງບັນຫາທີ່ສອງຝ່າຍມີຄວາມສົນໃຈ, ຄື: ການປ່ຽນແປງໃໝ່ຈິນຕະນາການ ແລະຍົກສູງຄວາມສາມາດພາຍໃນໃນການພັດທະນາ, ກໍ່ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ; ປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ, ສ້າງຄວາມເຊື່ອໝັ້ນໃຫ້ນັກລົງທຶນພາຍໃນ ແລະຕ່າງປະເທດ; ແຫຼ່ງກໍາລັງ ແລະກໍາລັງໜູນໃນການກໍ່ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ; ເສີມຂະຫຍາຍບົດບາດຂອງເສດຖະກິດແຫ່ງລັດ; ຫັນຕະຫຼາດເປັນຫຼາຍຮູບຫຼາຍແບບ, ຍົກສູງຄວາມສາມາດປັບຕົວຂອງພື້ນຖານເສດຖະກິດໃນສະພາບການເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ.

ບັນຍາກາດທີ່ກອງປະຊຸມສໍາມະນາ. ພາບ: ສໍານັກຂ່າວສານຫວຽດນາມ

ບັນດາຜູ້ແທນໄດ້ເຫັນດີເປັນເອກະພາບ ຖືວ່າ ການກໍ່ສ້າງ ແລະພັດທະນາພື້ນຖານເສດຖະກິດເອກະລາດ, ເປັນເຈົ້າຕົນເອງ ແມ່ນມີຄວາມຈຳເປັນທີ່ສຸດຂອງແຕ່ລະປະເທດ, ເປັນຕົ້ນແມ່ນໃນສະພາບການປະຈຸບັນ. ສອງຝ່າຍຈະສືບຕໍ່ຄົ້ນຄວ້າ, ແລກປ່ຽນຢ່າງກົງໄປກົງມາ ແລະມີປະສິດທິຜົນທັງດ້ານທິດສະດີ ແລະສະຫຼຸບພຶດຕິກໍາຕົວຈິງກ່ຽວກັບບັນຫາທີ່ໄດ້ຍົກອອກມາເພື່ອເສີມຂະຫຍາຍປະສິດທິຜົນຂອງກອງປະຊຸມສໍາມະນາຄັ້ງນີ້.

ໃນໄລຍະຢ້ຽມຢາມ ແລະເຮັດວຽກຢູ່ຫຼວງພະບາງ, ທ່ານ ຫງວຽນຊວນຖັງ ໄດ້ໃຫ້ການຕ້ອນຮັບການນຳແຂວງຫຼວງພະບາງ.

ໂດຍ: ເຈິ່ນຮວ່ຽນ