ຄະນະພະນັກງານແມ່ຍິງກອງທັບປະຊາຊົນ ລາວ ຢ້ຽມຢາມໂຮງໝໍກອງທັບ 354

ລາຍການສະແດງສິລະປະທີ່ພິທີຕ້ອນຮັບການມາຢ້ຽມຢາມ, ແລກປ່ຽນບົດຮຽນຂອງຄະນະພະນັກງານແມ່ຍິງກອງທັບປະຊາຊົນ ລາວ. ພາບ: ຫວຽດຮ່າ.

ໂຮງໝໍກອງທັບ 354, ມີຕົ້ນກໍາເນີດມາຈາກໂຮງໝໍທະຫານ ເຈິ່ນກ໊ວກຕວ້ານ ເຊິ່ງໄດ້ຮັບການສ້າງຕັ້ງໃນວັນທີ 27 ພຶດສະພາ 1949, ຢູ່ບ້ານ ໝີຈ້າງ, ຕາແສງ ໝີອຽນ, ເມືອງດ້າຍຕື, ແຂວງຖາຍງວຽນ. ປັດຈຸບັນ, ໂຮງໝໍກອງທັບ 354 ເປັນໂຮງໝໍເຂດລະດັບໜຶ່ງ, ສາຍຍຸດທະສາດຂອງກະຊວງປ້ອງກັນປະເທດ ມີໜ້າທີ່ຮັບ, ພະຍາບານສຸກເສີນ, ປິ່ນປົວໃຫ້ທະຫານ ແລະປະຊາຊົນ. ນອກຈາກນີ້, ໂຮງໝໍກອງທັບ 354 ຍັງປະຕິບັດໜ້າທີ່ຜັດປ່ຽນກັນຮັບປະກັນການແພດຢູ່ເກາະຊິງໂຕ່ນດົງ, ເມືອງເກາະເຈື່ອງຊາ, ແຂວງແຄ໊ງຮວ່າ; ເຂົ້າຮ່ວມໂຮງໝໍກາງສະໜາມກໍາລັງຮັກສາສັນຕິພາບຂອງ ສປຊ ຢູ່ຊູດັງໃຕ້ ແລະບັນດາການເຄື່ອນໄຫວໜູນຊ່ວຍມະນຸດສະທໍາສາກົນ...

ບັນຍາກາດການຢ້ຽມຢາມ, ແລກປ່ຽນບົດຮຽນຂອງພະນັກງານແມ່ຍິງກອງທັບປະຊາຊົນລາວ. ພາບ: ຫວຽດຮ່າ.

ໃນຊຸມປີຜ່ານມາ, ພາຍໃຕ້ການເອົາໃຈໃສ່ຂອງຄະນະພັກ, ຄະນະອໍານວຍການ ແລະຄະນະພັກ, ຄະນະບັນຊາທຸກຂັ້ນໃນໂຮງໝໍ, ວຽກງານສະຫະພັນແມ່ຍິງ ແລະຂະບວນການແມ່ຍິງຂອງໂຮງໝໍໄດ້ຮັບການຮັກສາຢ່າງມີລະບຽບແບບແຜນ, ຮັບປະກັນຄຸນນະພາບ, ລົງເລິກ ແລະມີກໍາລັງແຜ່ຂະຫຍາຍດ້ວຍຫຼາຍຮູບແບບ ແລະຂະບວນການເຄື່ອນໄຫວຢ່າງມີປະສິດທິຜົນ; ຊີວິດການເປັນຢ່າງທາງດ້ານວັດຖຸ ແລະຈິດໃຈຂອງພະນັກງານ, ສະມາຊິກສະຫະພັນແມ່ຍິງ ໄດ້ຮັບການເອົາໃຈໃສ່ເບິ່ງແຍງດູແລຢ່າງເປັນປະຈໍາ ແລະໄດ້ຮັບການແກ້ໄຂຄວາມມຸ່ງມາດປາດຖະໜາອັນຊອບທໍາ, ຖືກກົດໝາຍຢ່າງທັນການ... ປະກອບສ່ວນປະຕິບັດສໍາເລັດໜ້າທີ່ທີ່ໄດ້ຮັບການມອບໝາຍ, ມີຫຼາຍໜ້າທີ່ປະຕິບັດສໍາເລັດຢ່າງດີເລີດ.

ທີ່ການຢ້ຽມຢາມ, ຄະນະພະນັກງານແມ່ຍິງກອງທັບປະຊາຊົນ ລາວ ໄດ້ຮໍ່າຮຽນ, ແລກປ່ຽນບົດຮຽນກ່ຽວກັບວິທີການຈັດຕັ້ງການເຄື່ອນໄຫວ ແລະຂະບວນການແມ່ຍິງຂອງໂຮງໝໍ; ຢ້ຽມຢາມຫໍມູນເຊື້ອຂອງໂຮງໝໍ ແລະບັນດາຮູບແບບທີ່ດີເດັ່ນ: “ຫ້ອງຄົນເຈັບແບບຢ່າງ”, “ຫ້ອງກວດພະຍາດດີຈີຕອນ”.

ໂດຍ: ໄຊຊະນະ