ສະຖານທູດ ລາວ ປະຈໍາ ສະຫະພັນລັດເຊຍ ອວຍພອນບຸນປີໃໝ່ປະຈໍາຊາດ ຫວຽດນາມ

ໃນບັນຍາກາດທີ່ເຕັມໄປດ້ວຍໄມຕີຈິດມິດຕະພາບ, ສະໜິດສະໜົມ, ເປີດອົກເປີດໃຈ, ທ່ານນາງ ວິລະວັນ ເຢ່ຍປໍເຮີ່ ໄດ້ສົ່ງຄໍາອວຍພອນປີໃໝ່ມາຍັງປະຊາຊົນຫວຽດນາມ ທຸກຖ້ວນໜ້າ, ກໍຄື ພະນັກງານ, ລັດຖະກອນ ສະຖານທູດຫວຽດນາມ ປະຈໍາ ສະຫະພັນລັດເຊຍ.

ຜູ້ຕາງໜ້າສະຖານທູດຫວຽດນາມ ແລະສະຖານທູດລາວ ຖ່າຍຮູບເປັນທີ່ລະນຶກ. ພາບ: nhandan.vn

ທ່ານນາງ ວິລະວັນ ເຢ່ຍປໍເຮີ່ ສະແດງຄວາມປິຕິຊົມຊື່ນຕໍ່ຜົນງານພັດທະນາເສດຖະກິດ-ສັງຄົມຂອງຫວຽດນາມ ພາຍໃຕ້ການນໍາພາອັນສະຫຼາດສ່ອງໃສຂອງພັກກອມມູນິດຫວຽດນາມ; ທ່ານນາງ ຢັ້ງຢືນວ່າ ສອງສະຖານທູດ ຈະສືບຕໍ່ສົມທົບກັນຢ່າງແໜ້ນແຟ້ນໃນການເຄື່ອນໄຫວພົວພັນຕ່າງປະເທດ, ກໍຄືການພົບປະແລກປ່ຽນມິດຕະພາບໃນໄລຍະຈະມາເຖິງ.

ຂອບໃຈທ່ານນາງ ເອກອັກຄະລັດຖະທູດ ວິລະວັນ ເຢ່ຍປໍເຮີ່ ແລະຄະນະ ທີ່ໄດ້ມາອວຍພອນບຸນເຕັດ, ທ່ານ ດັ້ງມິງຄອຍ ເອກອັກຄະລັດຖະທູດ ຫວຽດນາມ ປະຈໍາ ສະຫະພັນລັດເຊຍ ຕີລາຄາສູງນໍ້າໃຈມິດຕະພາບພິເສດ ເຊິ່ງ ພັກ, ລັດ ແລະປະຊາຊົນລາວ ໄດ້ສະຫງວນໃຫ້ແກ່ພັກ, ລັດ ແລະປະຊາຊົນຫວຽດນາມ. ທ່ານ ດັ້ງມິງຄອຍ ຢັ້ງຢືນວ່າ ໃນປີ 2023, ການພົວພັນຫວຽດນາມ-ລາວ ສືບຕໍ່ພັດທະນາຢ່າງແຮງ, ໂດຍສະເພາະແມ່ນໃນຂົງເຂດເສດຖະກິດ. ສອງສະຖານທູດ ຈະຮ່ວມມືຢ່າງແໜ້ນແຟ້ນ, ສືບຕໍ່ຈັດຕັ້ງບັນດາການເຄື່ອນໄຫວພົບປະແລກປ່ຽນ ດ້ວຍການເຂົ້າຮ່ວມຂອງນັກສຶກສາສອງປະເທດ ຢູ່ ລັດເຊຍ, ຍູ້ແຮງບັນດາການເຄື່ອນໄຫວສິລະປະວັດທະນະທໍາ, ກິລາ.

ບັນດາຜູ້ແທນ ຮັບຊົມລາຍການສະແດງສິລະປະ. ພາບ: nhandan.vn

ໃນບັນຍາກາດຟົດຟື້ນມ່ວນຊື່ນຕ້ອນຮັບບຸນປີໃໝ່ປະຈໍາຊາດ ປີເຖາະ 2023, ສອງເອກອັກຄະລັດຖະທູດ ພ້ອມດ້ວຍພະນັກງານ, ລັດຖະກອນສະຖານທູດ ຍົກຈອກອວຍພອນປີໃໝ່, ອວຍໄຊໃຫ້ພອນປີໃໝ່ຈົ່ງມີສຸຂະພາບແຂງແຮງ, ມີຄວາມຜາສຸກ ແລະປະສົບຜົນສໍາເລັດໃນໜ້າທີ່ການງານ, ພ້ອມກັນມານະພະຍາຍາມເພີ່ມພູນຄູນສ້າງການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ຫວຽດນາມ-ລາວ.

ໂດຍ: ໄຊຊະນະ