ຮອງປະທານຜູ້ປະຈໍາການສະພາແຫ່ງຊາດ ຕ້ອນຮັບຄະນະຜູ້ແທນເຂົ້າຮ່ວມງານມະໂຫລານມິດຕະພາບປະຊາຊົນຫວຽດນາມ - ລາວ
ກປ.ອອນໄລ - ຕອນຄ່ຳວັນທີ 27 ກັນຍາ, ຢູ່ນະຄອນ ດົງຮ່າ, ແຂວງ ກວາງຈິ, ສະຫາຍ ເຈິ່ນແທງເໝິ້ນ ຮອງປະທານຜູ້ປະຈໍາການສະພາແຫ່ງຊາດ, ປະທານກຸ່ມສະມາຊິກລັດຖະສະພາມິດຕະພາບ ຫວຽດນາມ - ລາວ ໄດ້ໃຫ້ການຕ້ອນຮັບຄະນະຜູ້ແທນທີ່ເຂົ້າຮ່ວມງານມະໂຫລານມິດຕະພາບປະຊາຊົນ ຫວຽດນາມ-ລາວ ຄັ້ງທີ V.
ກ່າວຄຳເຫັນທີ່ການຕ້ອນຮັບ, ສະຫາຍ ເຈິ່ນແທງເໝິ້ນ ຢືນຢັນວ່າ ສອງພັກ, ສອງລັດ ຫວຽດນາມ - ລາວ ຖືເປັນສຳຄັນວຽກງານການທູດປະຊາຊົນ, ຍາມໃດກໍ່ສະໜັບສະໜູນ ແລະສ້າງເງື່ອນໄຂສະດວກທີ່ສຸດໃຫ້ແກ່ການເຄື່ອນໄຫວຂອງສະມາຄົມມິດຕະພາບຂອງສອງປະເທດ.
|
|
ບັນຍາກາດທີ່ການຕ້ອນຮັບ. ພາບ: ສໍານັກຂ່າວສານຫວຽດນາມ |
ສະຫາຍ ເຈິ່ນແທງເໝິ້ນ ປາດຖະໜາວ່າ ໃນໄລຍະຈະມາເຖິງ, ບັນດາອົງການຈັດຕັ້ງມິດຕະພາບຂອງສອງປະເທດ ຈະສືບຕໍ່ມີຂໍ້ລິເລີ່ມ, ຈັດຕັ້ງການເຄື່ອນໄຫວດ້ວຍຫຼາຍຮູບຫຼາຍແບບ ແລະມີເນື້ອໃນອຸດົມສົມບູນ, ຫຼາຍຮູບຫຼາຍແບບຕື່ມອີກ ເພື່ອແນໃສ່ເພີ່ມພູນຄູນສ້າງນໍ້າໃຈມິດຕະພາບລະຫວ່າງປະຊາຊົນສອງປະເທດ.
ຕາງໜ້າໃຫ້ຄະນະຜູ້ແທນປະຊາຊົນສອງປະເທດ, ສະຫາຍ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຢີ ແລະການສື່ສານ, ປະທານສະມາຄົມມິດຕະພາບລາວ-ຫວຽດນາມ ເນັ້ນໜັກວ່າ: ພວກຂ້າພະເຈົ້າ ຈະເຮັດຈົນສຸດຄວາມສາມາດຂອງຕົນເພື່ອປົກປັກຮັກສາ ແລະພັດທະນາສາຍພົວພັນບໍລິສຸດຜຸດຜ່ອງລະຫວ່າງສອງປະເທດ - ຊັບສົມບັດອັນລໍ້າຄ່າຂອງສອງຊາດ; ຈະສືບຕໍ່ເພີ່ມພູນຄູນສ້າງສາຍພົວພັນອັນຍິ່ງໃຫຍ່, ຄວາມສາມັກຄີແບບພິເສດນີ້ໃຫ້ຂຽວສົດງົດງາມ, ໝັ້ນຄົງຂະໜົງແກ່ນຊົ່ວກາລະນານ”.
ງານມະໂຫລານມິດຕະພາບປະຊາຊົນຫວຽດນາມ - ລາວ ຄັ້ງທີ V ໄດ້ຈັດຕັ້ງແຕ່ວັນທີ 27 – 30 ກັນຍາ ຢູ່ແຂວງ ກວາງຈິ (ຫວຽດນາມ) ແລະ ສະຫວັນນະເຂດ (ລາວ). ຢູ່ແຂວງກວາງຈິ, ໄດ້ດຳເນີນການເຄື່ອນໄຫວ 2 ວັນ ແຕ່ວັນທີ 27-28 ກັນຍາ. ພິທີໄຂງານມະໂຫລານໄດ້ຈັດຂຶ້ນໃນຕອນເຊົ້າວັນທີ 28 ກັນຍາ, ຢູ່ສູນວັດທະນະທຳຮູບເງົາແຂວງ ກວາງຈິ.
ໃນຂອບເຂດໂຄງການຈະມີການເຄື່ອນໄຫວຫຼາຍຢ່າງ ຄື: ກອງປະຊຸມແລກປ່ຽນບົດຮຽນປະສົບການໃນການເຄື່ອນໄຫວມິດຕະພາບປະຊາຊົນ ຫວຽດນາມ - ລາວ; ຖະຫວາຍທູບທຽນຢູ່ສຸສານນັກຮົບເສຍສະຫຼະຊີວິດເພື່ອຊາດບາງແຫ່ງ, ຢ້ຽມຊົມຮ່ອງຮອຍປະຫວັດສາດການປະຕິວັດບາງແຫ່ງ;...
ໂດຍ: ທະນາພອນ