ປະທານສະພາແຫ່ງຊາດຫວຽດນາມ ຕ້ອນຮັບປະທານສານປະຊາຊົນສູງສຸດລາວ
ກປ.ອອນໄລ - ຕອນບ່າຍວັນທີ 12 ພຶດສະພາ, ທີ່ຫໍສະພາແຫ່ງຊາດ, ທ່ານ ເວືອງດິ່ງເຫວ້ ປະທານສະພາແຫ່ງຊາດຫວຽດນາມ ໄດ້ໃຫ້ການຕ້ອນຮັບທ່ານນາງ ວຽງທອງ ສີພັນດອນ, ເລຂາທິການສູນກາງພັກປະຊາຊົນປະຕິວັດລາວ, ປະທານສານປະຊາຊົນສູງສຸດລາວ ທີ່ພວມມີການຢ້ຽມຢາມ ແລະເຮັດວຽກຢູ່ຫວຽດນາມ.
ທີ່ການຕ້ອນຮັບ, ທ່ານ ເວືອງດິ່ງເຫວ້ ໄດ້ສະແດງຄວາມປິຕິຊົມຊື່ນ ຕໍ່ສາຍພົວພັນຮ່ວມມືທີ່ແໜ້ນແຟ້ນລະຫວ່າງລະບົບສານປະຊາຊົນສອງປະເທດ, ຢັ້ງຢືນວ່າ ການນໍາພັກ, ລັດ ແລະສະພາແຫ່ງຊາດຫວຽດນາມ ເອົາໃຈໃສ່ເປັນພິເສດເຖິງວຽກງານຕຸລາການ. ຫວຽດນາມ ພວມມານະພະຍາຍາມປະຕິບັດຍຸດທະສາດປະຕິຮູບດ້ານຕຸລາການ ແລະບັນລຸໄດ້ໝາກຜົນສໍາຄັນຫຼາຍຢ່າງ, ໃນນັ້ນສານປະຊາຊົນມີທີ່ຖານະ, ບົດບາດສໍາຄັນ. ສານປະຊາຊົນແມ່ນອົງການພິພາກສາ, ປະຕິບັດສິດຕຸລາການ, ມີໜ້າທີ່ປົກປ້ອງຄວາມຍຸຕິທຳ, ປົກປ້ອງສິດຂອງມະນຸດ, ສິດຂອງພົນລະເມືອງ, ປົກປ້ອງລະບອບສັງຄົມນິຍົມ, ຜົນປະໂຫຍດຂອງລັດ, ສິດ ແລະຜົນປະໂຫຍດອັນຊອບທໍາຂອງບັນດາອົງການຈັດຕັ້ງ ແລະບຸກຄົນ.
ທ່ານ ເວືອງດິ່ງເຫວ້ ໃຫ້ຮູ້ວ່າ, ສານທີ່ຫວຽດນາມ ມີບົດບາດສໍາຄັນທີ່ສຸດໃນການປະຕິບັດຍຸດທະສາດປະຕິຮູບດ້ານຕຸລາການ ຮອດປີ 2020 ຕາມເນື້ອໃນຈິດໃຈມະຕິເລກທີ 49 ຂອງກົມການເມືອງວ່າດ້ວຍຍຸດທະສາດປະຕິຮູບດ້ານຕຸລາການ ຮອດປີ 2020. ໃນປັດຈຸບັນ, ຫວຽດນາມ ພວມສ້າງ “ຍຸດທະສາດສ້າງ ແລະປັບປຸງລັດແຫ່ງອຳນາດນິຕິບັນຍັດສັງຄົມນິຍົມຫວຽດນາມ ຮອດປີ 2030, ກໍານົດທິດຮອດປີ 2045 ໃຫ້ສົມບູນແບບ”, ໃນນັ້ນມີຫຼາຍເນື້ອໃນສໍາຄັນ ແນໃສ່ຍົກສູງປະສິດທິຜົນການເຄື່ອນໄຫວຂອງລະບົບສານ. ຫວຽດນາມ ພ້ອມແລ້ວທີ່ຈະແບ່ງປັນບົດຮຽນກັບປະເທດລາວ ເພື່ອຍົກສູງຄຸນນະພາບການເຄື່ອນໄຫວຂອງສານ, ໜູນຊ່ວຍວຽກງານບໍາລຸງສ້າງພະນັກງານໃນຂະແໜງສານ.
|
|
ທ່ານ ເວືອງດິ່ງເຫວ້ ປະທານສະພາແຫ່ງຊາດຫວຽດນາມ ຕ້ອນຮັບທ່ານນາງ ວຽງທອງ ສີພັນດອນ ປະທານສານປະຊາຊົນສູງສຸດລາວ. ພາບ: ສໍານັກຂ່າວສານຫວຽດນາມ. |
ສ່ວນທ່ານນາງ ວຽງທອງ ສີພັນດອນ ໃຫ້ຮູ້ວ່າ ໃນໄລຍຜ່ານມາ, ສານຂອງສອງປະເທດໄດ້ຮັກສາການເຄື່ອນໄຫວຮ່ວມມືຢ່າງມີປະສິດທິຜົນ, ແທດຈິງ ແລະໄດ້ຮັບການໜູນຊ່ວຍຫຼາຍຢ່າງຈາກຫວຽດນາມ. ສານປະຊາຊົນສູງສຸດສອງປະເທດ ກໍ່ເຫັນດີເປັນເອກະພາບຕໍ່ທິດທາງຮ່ວມມືໃນໄລຍະຈະມາເຖິງ, ໃນນັ້ນມີເລື່ອງໜູນຊ່ວຍຍົກສູງຄຸນນະພາບພື້ນຖານໂຄງລ່າງໃຫ້ແກ່ລະບົບສານ; ບໍາລຸງ-ກໍ່ສ້າງ ແລະຍົກສູງຄຸນນະພາບຖັນແຖວຜູ້ພິພາກສາ. ສອງຝ່າຍກໍ່ເຫັນດີເປັນເອກະພາບຕໍ່ຫຼາຍເນື້ອໃນຫົວເລື່ອງສະເພາະລະອຽດ; ສືບຕໍ່ປະຕິບັດຂໍ້ຕົກລົງວ່າດ້ວຍເລື່ອງໝູນວຽນຈັດຕັ້ງກອງປະຊຸມສານລະຫວ່າງສາມປະເທດຫວຽດນາມ-ລາວ-ກໍາປູເຈຍ.
ທ່ານນາງ ວຽງທອງ ສີພັນດອນ ກໍ່ສະແດງຄວາມປາດຖະໜາຢາກ ສືບຕໍ່ໄດ້ຮັບການສະໜັບສະໜູນ, ຄວາມເອົາໃຈໃສ່ ແລະການໜູນຊ່ວຍຂອງປະທານສະພາແຫ່ງຊາດ ແລະສະພາແຫ່ງຊາດຫວຽດນາມ ເພື່ອແນໃສ່ຊຸກຍູ້ການຮ່ວມມືລະຫວ່າງສານຂອງສອງປະເທດ; ສືບຕໍ່ແບ່ງປັນບົດຮຽນໃນກົນໄກສົມທົບກັນລະຫວ່າງສະພາແຫ່ງຊາດ, ບັນດາກໍາມາທິການຂອງສະພາແຫ່ງຊາດ ແລະອົງການສານໃນການແກ້ໄຂຈົດໝາຍ, ໜັງສືຮ້ອງຟ້ອງ, ຄໍາເຫັນ, ຄໍາສະເໜີຂອງປະຊາຊົນ.
ໂດຍ: ທູຈາງ