ການນໍາກະຊວງການຕ່າງປະເທດຫວຽດນາມ ອວຍພອນສະຖານທູດລາວ ປະຈໍາ ຫວຽດນາມ ເນື່ອງໃນໂອກາດວັນຊາດລາວ
ກປ.ອອນໄລ - ເນື່ອງໃນໂອກາດສະເຫຼີມສະຫຼອງ 46 ປີແຫ່ງວັນຊາດປະເທດ ສປປ ລາວ (2-12-1975 / 2-12-2021) ແລະ 101 ປີແຫ່ງວັນຄ້າຍວັນເກີດປະທານ ໄກສອນ ພົມວິຫານ (13-12-1920 / 13-12-2021), ຕອນບ່າຍວັນທີ 1 ທັນວາ, ທ່ານ ຫງວຽນກວກຢຸ້ງ ຮອງລັດຖະມົນຕີຕ່າງປະເທດຫວຽດນາມ ໄດ້ນໍາໜ້າຄະນະຜູ້ແທນກະຊວງການຕ່າງປະເທດໄປອວຍພອນສະຖານທູດລາວ ປະຈໍາ ຮ່າໂນ້ຍ.
ຕາງໜ້າການນໍາກະຊວງ, ທ່ານ ຫງວຽນກວກຢຸ້ງ ອວຍພອນທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດລາວ ປະຈຳ ຫວຽດນາມ ພ້ອມກັບພະນັກງານ, ພາລະກອນທຸກຄົນຂອງສະຖານທູດລາວ; ຕີລາຄາສູງຕໍ່ຜົນງານອັນໃຫຍ່ຫຼວງທີ່ລາວ ບັນລຸໄດ້ໃນກິດຈະການສ້າງສາ, ພັດທະນາ ແລະປົກປັກຮັກສາປະເທດໃນຕະຫຼອດ 46 ປີຜ່ານມາ, ພິເສດແມ່ນພາຍຫຼັງ 35 ປີແຫ່ງການປ່ຽນແປງໃໝ່.
    |
 |
|
ທ່ານ ຫງວຽນກວກຢຸ້ງ ແລະທ່ານ ແສງເພັດ ຮຸ່ງບຸນຍວງ ຖ່າຍຮູບເປັນທີ່ລະນຶກພ້ອມກັບຄະນະຜູ້ແທນກະຊວງການຕ່າງປະເທດ, ພະນັກງານ, ພາລະກອນສະຖານທູດລາວ. ພາບ: ກວາງຮວ່າ. |
ຮອງລັດຖະມົນຕີຕ່າງປະເທດຫວຽດນາມ ກໍ່ໄດ້ຕີລາຄາສູງຕໍ່ການປະກອບຂອງທ່ານ ແສງເພັດ ຮຸ່ງບຸນຍວງ ໃນການເພີ່ມທະວີສາຍພົວພັນການຮ່ວມມືລະຫວ່າງສອງປະເທດ, ຫວັງວ່າໃນໄລຍະຈະມາເຖິງ, ເອກອັກຄະລັດຖະທູດ ແລະພະນັກງານສະຖານທູດລາວ ຈະສືບຕໍ່ຮ່ວມມືຢ່າງແໜ້ນແຟ້ນກັບກະຊວງການຕ່າງປະເທດຫວຽດນາມ ໃນການກະກຽມໃຫ້ແກ່ການເຄື່ອນໄຫວພົວພັນຕ່າງປະເທດສໍາຄັນລະຫວ່າງສອງປະເທດ.
ທ່ານ ແສງເພັດ ຮຸ່ງບຸນຍວງ ຂອບໃຈຕໍ່ການຕີລາຄາອັນດີງາມກ່ຽວກັບສາຍພົວພັນຮ່ວມມືລະຫວ່າງລາວ-ຫວຽດນາມ ກໍ່ຄືໃນນາມສ່ວນຕົວເອກອັກຄະລັດຖະທູດ ແລະພະນັກງານສະຖານທູດລາວ; ທ່ານຢັ້ງຢືນວ່າ ຈະສືບຕໍ່ສົມທົບກັບກະຊວງການຕ່າງປະເທດຫວຽດນາມ ໃນການເພີ່ມພູນຄູນສ້າງ ແລະພັດທະນາການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະຮ່ວມມືຮອບດ້ານລະຫວ່າງລາວ-ຫວຽດນາມ ໃຫ້ແໜ້ນແຟ້ນກວ່າອີກ.
ໂດຍ: ຈາງຫງວຽນ