ລາວ ໜູນຊ່ວຍບັນດາທ້ອງຖິ່ນຫວຽດນາມ ປ້ອງກັນ, ຕ້ານພະຍາດໂຄວິດ-19
ກປ.ອອນໄລ - ວັນທີ 18 ມິຖຸນາ, ຕາງໜ້າອໍານາດການປົກຄອງແຂວງ ບໍ່ແກ້ວ ໄດ້ໄປມອບເງິນສົດຈໍານວນ 200 ລ້ານກີບ (ເກືອບ 490 ລ້ານດົ່ງ) ຢູ່ສະຖານກົງສູນໃຫຍ່ຫວຽດນາມ ປະຈໍານະຄອນຫຼວງພະບາງ ເພື່ອໜູນຊ່ວຍ 3 ແຂວງຂອງຫວຽດນາມ ລວມມີ: ເຊີນລາ, ດ້ຽນບຽນ ແລະລາວກາຍ ປ້ອງກັນ, ຕ້ານພະຍາດໂຄວິດ-19.
ກ່າວຄໍາເຫັນທີ່ການພົບປະ, ຕາງໜ້າອໍານາດການປົກຄອງແຂວງບໍ່ແກ້ວ ຢັ້ງຢືນເຖິງການພົວພັນມິດຕະພາບທີ່ຍິ່ງໃຫຍ່ລະຫວ່າງລາວ ແລະຫວຽດນາມ; ພ້ອມທັງຫວັງວ່າບັນດາທ້ອງຖິ່ນຂອງຫວຽດນາມ ຈະສາມາດສະກັດກັ້ນການແຜ່ລະບາດຂອງພະຍາດໂຄວິດ-19 ໄດ້ໂດຍໄວ ແລະເຊື່ອໝັ້ນວ່າ ພັກ, ລັດຖະບານ ແລະປະຊາຊົນຫວຽດນາມ ຈະຄວບຄຸມ ແລະເອົາຊະນະໂລກລະບາດໄດ້ໂດຍໄວ.
|
|
ຕາງໜ້າອໍານາດການປົກຄອງແຂວງບໍ່ແກ້ວ ມອບເງິນໜູນຊ່ວຍ 3 ແຂວງຂອງຫວຽດນາມ ປ້ອງກັນ, ຕ້ານພະຍາດໂຄວິດ-19. ພາບ: ສໍານັກຂ່າວສານຫວຽດນາມ. |
ຕາມຜູ້ຕາງໜ້າອໍານາດການປົກຄອງແຂວງບໍ່ແກ້ວແລ້ວ, ນີ້ແມ່ນນໍ້າໃຈຂອງປະຊາຊົນແຂວງບໍ່ແກ້ວ ດ້ວຍຄວາມປາດຖະໜາຢາກຮ່ວມແຮງຮ່ວມໃຈພ້ອມກັບອໍານາດການປົກຄອງ ແລະປະຊາຂົນຫວຽດນາມ ຄວບຄຸມ ແລະດັບມອດການແຜ່ລະບາດຂອງພະຍາດໂຄວິດ-19 ໂດຍໄວ.
ຕ້ອນຮັບຜູ້ຕາງໜ້າອໍານາດການປົກຄອງແຂວງບໍ່ແກ້ວ, ທ່ານ ຫງວຽນດັງຮຸ່ງ ຫົວໜ້າກົງສູນໃຫຍ່ຫວຽດນາມ ປະຈໍານະຄອນຫຼວງພະບາງ ໄດ້ສະແດງຄວາມຂອບອົກຂອບໃຈຢ່າງເລິກເຊິ່ງຕໍ່ຂອງຂວັນທີ່ມີຄວາມໝາຍ ແລະທັນການຂອງເພື່ອນລາວທີ່ສະໜັບສະໜູນການຕໍ່ສູ້ຕ້ານພະຍາດໂຄ ວິດ-19 ຂອງຫວຽດນາມ; ພ້ອມທັງຢັ້ງຢືນວ່າຈະສົ່ງເງິນຈໍານວນດັ່ງກ່າວເມືອຫວຽດນາມ ໃນທັນທີເພື່ອຮັບໃຊ້ໃຫ້ແກ່ວຽກງານປ້ອງກັນ, ຕ້ານພະຍາດໂຄວິດ -19.
ໂດຍ: ໄຊຊະນະ