ສະຫຼຸບຜົນການປະຕິບັດບັ້ນໂຄສະນາເຜີຍແຜ່, ໂຈມຕີ, ປາບປາມອາດຊະຍາກໍາຢາເສບຕິດຢູ່ເຂດຊາຍແດນຫວຽດນາມ-ລາວ

ທ່ານພົນໂທ ເລກຸ໊ຍເວືອງ, ຮອງລັດຖະມົນຕີກະຊວງຕໍາຫຼວດຫວຽດນາມ ເປັນປະທານກອງປະຊຸມ; ທ່ານພົນຕີ ສົມຫວັງ ທໍາມະສິດ, ຮອງລັດຖະມົນຕີກະຊວງປ້ອງກັນຄວາມສະຫງົບລາວ ເປັນປະທານຮ່ວມກອງປະຊຸມ.

ກ່າວຄໍາເຫັນໄຂກອງປະຊຸມ, ທ່ານພົນໂທ ເລກຸ໊ຍເວືອງ ຮອງລັດຖະມົນຕີກະຊວງຕໍາຫຼວດຫວຽດນາມ ໃຫ້ຮູ້ວ່າ, ຫວຽດນາມ ແລະລາວ ແມ່ນສອງປະເທດບ້ານໃກ້ເຮືອນຄຽງ, ຢູ່ໃກ້ເຂດ “ສາມຫຼ່ຽມພັດທະນາ” - ແມ່ນໃຈກາງຜະລິດ, ຊື້ຂາຍຢາເສບຕິດຜິດກົດໝາຍໃຫຍ່ທີ່ສຸດໃນໂລກ. ດ້ວຍເຫດນັ້ນ, ສອງປະເທດ ຫວຽດນາມ - ລາວ ຈຶ່ງຖືກຮັບຜົນສະທ້ອນໂດຍກົງຈາກການເຄື່ອນໄຫວອາດຊະຍາກໍາຢາເສບຕິດ ອັນໄດ້ສ້າງສະພາບການທີ່ສັບສົນກ່ຽວກັບຄວາມສະຫງົບ, ຄວາມເປັນລະບຽບຮຽບຮ້ອຍຂອງສອງປະເທດ.

ທ່ານພົນໂທ ເລກຸ໊ຍເວືອງ ຮອງລັດຖະມົນຕີກະຊວງຕໍາຫຼວດຫວຽດນາມ ກ່າວຄໍາເຫັນໄຂກອງປະຊຸມ. ພາບ: cand.com.vn.

ທ່ານພົນໂທ ເລກຸ໊ຍເວືອງ ເນັ້ນໜັກວ່າ, ເລື່ອງຍູ້ແຮງການພົວພັນຮ່ວມມືສາກົນໃນການຕ້ານ ແລະສະກັດກັ້ນຢາເສບຕິດເວົ້າລວມ, ພິເສດແມ່ນການພົວພັນຮ່ວມມືລະຫວ່າງບັນດາປະເທດບ້ານໃກ້ເຮືອນຄຽງແມ່ນການຮຽກຮ້ອງຄວາມເປັນຈິງຢ່າງພາວະວິໄສ. ໂດຍຮັບຮູ້ຢ່າງຈະແຈ້ງຄວາມສໍາຄັນຂອງບັນຫານີ້, ໃນຊຸມປີຜ່ານມາ, ບັນດາອົງການທີ່ກ່ຽວຂ້ອງຂອງຫວຽດນາມ ໄດ້ຍູ້ແຮງການຜັນຂະຫຍາຍປະຕິບັດບັນດາໂຄງການ, ແຜນການ, ພ້ອມທັງຊຸກຍູ້ຢ່າງແຮງ ແລະມີຫຼາຍຂໍ້ລິເລີ່ມໃນບັນດາການເຄື່ອນໄຫວຮ່ວມມືສາກົນກັບບັນດາປະເທດ, ເຂດແຄວ້ນຢູ່ພາກພື້ນ ແລະໃນໂລກໃນຄວາມມານະພະຍາຍາມລວມໃນການຕໍ່ສູ້, ສະກັດກັ້ນ, ມຸ່ງໄປເຖິງການຍູ້ຖອຍຢາເສບຕິດໃຫ້ອອກໄປຈາກຊີວິດສັງຄົມ.

ບັນຍາກາດທີ່ກອງປະຊຸມ. ພາບ: cand.com.vn.

ທ່ານ ເລກຸ໊ຍເວືອງ ປາດຖະໜາວ່າ, ບັນດາກໍາລັງທີ່ກ່ຽວຂ້ອງຂອງສອງຝ່າຍຈະສຸມໃສ່ແລກປ່ຽນ, ຕີລາຄາບັນດາໝາກຜົນທີ່ບັນລຸໄດ້, ຊີ້ໃຫ້ເຫັນບັນດາບັນຫາທີ່ຍັງຈໍາກັດ, ຈາກນັ້ນຖອດຖອນບົດຮຽນເພື່ອແນໃສ່ຍົກສູງວຽກງານສົມທົບກັນຕໍ່ສູ້ຕ້ານ ແລະສະກັດກັ້ນອາດຊະຍາກໍາຢາເສບຕິດຢູ່ເຂດຊາຍແດນລະຫວ່າງສອງປະເທດຫວຽດ ນາມ - ລາວ ໃນໄລຍະຈະມາເຖິງໃຫ້ມີປະສິດທິຜົນກວ່າອີກ.

ໂດຍ: ໄຊຊະນະ