ກອງບັນຊາການທະຫານນະຄອນໂຮ່ຈີມິນ ກວດພະຍາດ ແລະມອບຂອງຂວັນໃຫ້ປະຊາຊົນຢູ່ເຂດຊາຍແດນ ຫວຽດນາມ - ກຳປູເຈຍ
ກປ.ອອນໄລ - ວັນທີ 23 ມິຖຸນາ, ກອງບັນຊາການທະຫານນະຄອນໂຮ່ຈີມິນ ໄດ້ສົມທົບກັບສະມາຄົມມິດຕະພາບ ຫວຽດນາມ - ກຳປູເຈຍ ນະຄອນໂຮ່ຈີມິນ, ສະຫະພັນບັນດາອົງການຈັດຕັ້ງມິດຕະພາບແຂວງ ໄຕນິງ, ສະມາຄົມມິດຕະພາບ ຫວຽດນາມ - ກຳປູເຈຍ ແຂວງໄຕນິງ ແລະຄະນະແພດໝໍເຕິມຫວຽດ ໄດ້ຈັດຕັ້ງລາຍການກວດພະຍາດ, ແຈກຢາຍຢາ ແລະມອບຂອງຂວັນໃຫ້ແກ່ປະຊາຊົນທຸກຍາກຢູ່ຕາແສງ ເຕີນບິ່ງ, ເມືອງ ເຕີນບຽນ, ແຂວງ ໄຕນິງ ແລະຕາແສງ ກໍ້, ເມືອງ Kret, ແຂວງ Tuong Khmum (ກຳປູເຈຍ).
ໃນລາຍການ, ປະຊາຊົນຜູ້ທຸກຍາກ, ຜູ້ເຖົ້າແກ່, ເດັກກຳພ້າ, ນັກຮຽນທີ່ປະສົບກັບຄວາມຫຍຸ້ງຍາກ ໄດ້ຮັບການກວດພະຍາດ, ໃຫ້ຄຳປຶກສາດ້ານສຸຂະພາບ ແລະໄດ້ຮັບການແຈກຢາໂດຍບໍ່ເສຍຄ່າ. ນອກຈາກນັ້ນ, ຄະນະຈັດຕັ້ງຍັງໄດ້ມອບເງິນ 300 ກວ່າລ້ານດົ່ງເພື່ອກໍ່ສ້າງ “ເຮືອນແຫ່ງສາຍຈິດມິດໃຈທະຫານ - ປະຊາຊົນ” 2 ຫຼັງ ໃຫ້ແກ່ເມືອງ ເຕີນບຽນ, ແຂວງ ໄຕນິງ ແລະ 2 ຫຼັງ ໃຫ້ແກ່ຕາແສງ ເຕີນບິ່ງ, ເມືອງ ເຕີນບຽນ, ມອບຂອງຂວັນ 800 ພູດ ໃຫ້ບັນດາຄອບຄົວທີ່ປະສົບກັບຄວາມຫຍຸ້ງຍາກ ດ້ວຍມູນຄ່າ 160 ລ້ານດົ່ງ.
|
|
ຄະນະຈັດຕັ້ງມອບຂອງຂວັນໃຫ້ແກ່ປະຊາຊົນທີ່ປະສົບກັບຄວາມຫຍຸ້ງຍາກ. ພາບ: qdnd.vn |
ກ່າວຄຳເຫັນທີ່ລາຍການ, ທ່ານພົນຕີ ຫງວຽນວັນນາມ ຫົວໜ້າການທະຫານກອງບັນຊາການທະຫານນະຄອນໂຮ່ຈີມິນ, ປະທານສະມາຄົມມິດຕະພາບ ຫວຽດນາມ-ກໍາປູເຈຍ ນະຄອນໂຮ່ຈີມິນ ຢືນຢັນວ່າ: ລາຍການແມ່ນການເຄື່ອນໄຫວແທດຈິງ ແລະມີຄວາມໝາຍ, ປະກອບສ່ວນເຂົ້າໃນການເບິ່ງແຍງດູແລຊີວິດການເປັນຢູ່ຂອງປະຊາຊົນຢູ່ເຂດຊາຍແດນສອງປະເທດໃຫ້ດີກວ່າ; ເປັນພະຍານຫຼັກຖານໃຫ້ນໍ້າໃຈມິດຕະພາບແບບພິເສດລະຫວ່າງປະຊາຊົນສອງປະເທດຫວຽດນາມ ແລະກຳປູເຈຍ.
|
|
ແພດໝໍກວດພະຍາດໃຫ້ປະຊາຊົນ. ພາບ: qdnd.vn |
ທ່ານພົນຕີ ຫງວຽນວັນນາມ ໃຫ້ຮູ້ວ່າ: ໃນໄລຍະຈະມາເຖິງ, ກອງບັນຊາການທະຫານນະຄອນໂຮ່ຈີມິນ ແລະສະມາຄົມມິດຕະພາບຫວຽດນາມ-ກຳປູເຈຍ ນະຄອນໂຮ່ຈີມິນ ຈະສືບຕໍ່ສົມທົບກັບບັນດາກົມກອງ, ທ້ອງຖິ່ນຈັດຕັ້ງ ການເຄື່ອນໄຫວແທດຈິງຫຼາຍຢ່າງເພື່ອປະກອບສ່ວນປັບປຸງ ແລະພັດທະນາສາຍພົວພັນມິດຕະພາບ ແລະການຮ່ວມມືລະຫວ່າງສອງປະເທດໃຫ້ແໜ້ນແຟ້ນຂຶ້ນຕື່ມ.
ໂດຍ: ທູຈາງ