ຮອງຜູ້ບັນຊາການກຳລັງປ້ອງກັນຝັ່ງທະເລຍີ່ປຸ່ນ ເຂົ້າຢ້ຽມຂໍ່ານັບຜູ້ບັນຊາການຕໍາຫຼວດທະເລເຂດ 2
ກປ.ອອນໄລ - ຕອນບ່າຍວັນທີ 20 ມັງກອນ, ຢູ່ນະຄອນດານັງ, ທ່ານພັນເອກ Takahashi Toru ຮອງຜູ້ບັນຊາການກຳລັງປ້ອງກັນຝັ່ງທະເລຍີ່ປຸ່ນ ແລະນາຍທະຫານເສນາ ກຳປັ່ນ Akitsushima, ຜູ້ຕາງໜ້າສະຖານທູດຍີ່ປຸ່ນ ປະຈໍາ ຫວຽດນາມ ແລະສະຖານກົງສູນໃຫຍ່ຍີ່ປຸ່ນ ປະຈໍາ ນະຄອນດານັງ ໄດ້ເຂົ້າຢ້ຽມຂໍ່ານັບທ່ານພົນຈັດຕະວາ ເຈິ່ນກວາງຕ໊ວນ, ຜູ້ບັນຊາການຕໍາຫຼວດທະເລເຂດ 2.
    |
 |
|
ທ່ານພັນເອກ Takahashi Toru ຮອງຜູ້ບັນຊາການກຳລັງປ້ອງກັນຝັ່ງທະເລຍີ່ປຸ່ນ ແລະທ່ານພົນຈັດຕະວາ ເຈິ່ນກວາງຕ໊ວນ ຜູ້ບັນຊາການຕໍາຫຼວດທະເລເຂດ 2. ພາບ: qdnd.vn |
ໃນບັນຍາກາດທີ່ຈິງໃຈ, ເປີດອົກເປີດໃຈ, ທ່ານພົນຈັດຕະວາ ເຈິ່ນກວາງຕ໊ວນ ໄດ້ສະແດງຄວາມປິຕິຊົມຊື່ນທີ່ໄດ້ຕ້ອນຮັບທ່ານພັນເອກ Takahashi Toru ຮອງຜູ້ບັນຊາການກຳລັງປ້ອງກັນຝັ່ງທະເລຍີ່ປຸ່ນ ແລະຄະນະປະຕິບັດງານກຳລັງປ້ອງກັນຝັ່ງທະເລຍີ່ປຸ່ນ ມາຢ້ຽມຢາມ ແລະເຂົ້າຢ້ຽມຂໍ່ານັບ, ພ້ອມທັງເນັ້ນໜັກວ່າ ໃນຊຸມປີຜ່ານມາ, ຕໍາຫຼວດທະເລຫວຽດນາມ ແລະກຳລັງປ້ອງກັນຝັ່ງທະເລຍີ່ປຸ່ນ ໄດ້ຕັ້ງໜ້າຜັນຂະຫຍາຍບັນດາການເຄື່ອນໄຫວ, ຄື: ແລກປ່ຽນຄະນະຜູ້ແທນ, ຝຶກແອບລວມ ແລະແບ່ງປັນບົດຮຽນໃນການປະຕິບັດກົດໝາຍຢູ່ທະເລ.
ສ່ວນທ່ານພັນເອກ Takahashi Toru ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນຂອງກອງບັນຊາການຕໍາຫຼວດທະເລເຂດ 2 ແລະຕີລາຄາສູງກຳລັງຄວາມສາມາດ, ການເປັນມືອາຊີບຂອງກໍາລັງຕໍາຫຼວດທະເລຫວຽດນາມ. ທ່ານຮອງຜູ້ບັນຊາການກໍາລັງປ້ອງກັນຝັ່ງທະເລຍີ່ປຸ່ນ ເຊື່ອໝັ້ນວ່າ ການຢ້ຽມຢາມຂອງກໍາປັ່ນ Akitsushima ໃນຄັ້ງນີ້ ຈະສືບຕໍ່ປະກອບສ່ວນຮັດແໜ້ນນໍ້າໃຈມິດຕະພາບ, ເພີ່ມທະວີຄວາມເຂົ້າໃຈ ແລະຄວາມໄວ້ເນື້ອເຊື່ອໃຈເຊິ່ງກັນ ແລະກັນ, ເພື່ອເປົ້າໝາຍຮັກສາຄວາມໝັ້ນຄົງ, ຄວາມປອດໄພ ແລະຄວາມເສລີໃນການເດີນທະເລຢູ່ພາກພື້ນ.
ໂດຍ: ເຈິ່ນຮວ່ຽນ