ຄະນະຜູ້ແທນກະຊວງປ້ອງກັນປະເທດຫວຽດນາມ ຢ້ຽມຢາມສູນການແພດສະຫວັດດີການຜູ້ອາຍຸສູງ Narita

ທ່ານພົນໂທ ຮວ່າງຊວນຈ໊ຽນ ເນັ້ນໜັກວ່າ: ການຮ່ວມມືດ້ານການແພດແມ່ນໜຶ່ງໃນບັນດາເນື້ອໃນບຸລິມະສິດເພື່ອຊຸກຍູ້, ຫັນການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ຍີ່ປຸ່ນ ເປັນລະອຽດ; ພ້ອມທັງໃຫ້ຮູ້ວ່າ, ລັດຖະບານ ແລະກະຊວງປ້ອງກັນປະເທດຫວຽດນາມ ເອົາໃຈໃສ່ທີ່ສຸດເຖິງການສົ່ງເສີມສຸຂະພາບໃຫ້ແກ່ຜູ້ອາຍຸສູງ. ນີ້ບໍ່ພຽງແຕ່ແມ່ນເປົ້າໝາຍຄວນໄດ້ຮັບການເບິ່ງແຍງດູແລ, ປົກປ້ອງເທົ່ານັ້ນ ຫາກຍັງແມ່ນແຫຼ່ງກຳລັງສຳຄັນໃນພາລະກິດສ້າງສາ ແລະປົກປັກຮັກສາປະເທດຊາດ.

ເລື່ອງເອົາໃຈໃສ່ເຖິງການສົ່ງເສີມສຸຂະພາບ, ປະຕິບັດນະໂຍບາຍສໍາລັບຜູ້ອາຍຸສູງເປັນຢ່າງດີມີຄວາມໝາຍມະນຸດສະທຳຢ່າງເລິກເຊິ່ງ, ປະກອບສ່ວນເສີມຂະຫຍາຍບົດບາດ, ຄວາມສາມາດບ່ົມຊ້ອນ, ປະສົບການ ແລະພູມປັນຍາຂອງກຳລັງນີ້ໃນການພັດທະນາເສດຖະກິດ, ການເມືອງ, ວັດທະນະທຳ, ສັງຄົມຂອງປະເທດ. ປະຈຸບັນ, ຂະແໜງການແພດທະຫານຂອງກະຊວງປ້ອງກັນປະເທດຫວຽດນາມ ພວມຜັນຂະຫຍາຍແຜນຮ່າງ “ກໍ່ສ້າງ ແລະພັດທະນາຂະແໜງຟື້ນຟູສຸຂະພາບ ແລະອາຍຸລະກຳ”.

ທ່ານພົນໂທ ຮວ່າງຊວນຈ໊ຽນ ຢ້ຽມຢາມສູນການແພດສະຫວັດດີການຜູ້ອາຍຸສູງ Narita. ພາບ: qdnd.vn

ສະແດງຄວາມປະທັບໃຈ ແລະຕີລາຄາສູງພື້ນຖານດ້ານວັດຖຸທີ່ທັນສະໄໝ, ໝູນໃຊ້ເຕັກໂນໂລຢີອັດສະລິຍະ ແລະອຸປະກອນທີ່ກ້າວໜ້າ, ແຫຼ່ງຊັບພະຍາກອນມະນຸດອັນດີເລີດ ຂອງສູນການແພດສະຫວັດດີການຜູ້ອາຍຸສູງ Narita, ທ່ານພົນໂທ ຮວ່າງຊວນຈ໊ຽນ ປາດຖະໜາວ່າ ທາງສູນຈະຕັ້ງໜ້າແບ່ງປັນປະສົບການໃນການກໍ່ສ້າງພື້ນຖານດ້ານວັດຖຸ, ການບໍລິຫານ, ບຳລຸງສ້າງ ແລະພັດທະນາແຫຼ່ງຊັບພະຍາກອນມະນຸດ... ກັບບັນດາກົມກອງແພດທະຫານຂອງກະຊວງປ້ອງກັນປະເທດຫວຽດນາມ, ໃນນັ້ນມີໂຮງໝໍກອງທັບ 175 ເຊິ່ງແມ່ນກົມກອງທີ່ພວມຜັນຂະຫຍາຍ “ໂຮງໝໍພະຍາບານຟື້ນຟູສຸຂະພາບ ແລະອາຍຸລະກໍາ". ທ່ານພົນໂທ ຮວ່າງຊວນຈ໊ຽນ ສະເໜີໃຫ້ສອງຝ່າຍສົມທົບກັນຢ່າງແໜ້ນແຟ້ນໃນການສຳຫຼວດສະພາບຕົວຈິງ, ແລກປ່ຽນວິຊາສະເພາະ ເພື່ອແນໃສ່ນໍາມາເຊິ່ງການບໍລິການດ້ານການແພດ ໃຫ້ມີຄຸນນະພາບສູງ, ຍົກສູງກໍາລັງຄວາມສາມາດເບິ່ງແຍງດູແລຜູ້ອາຍຸສູງ,  ພະນັກງານບຳນານພາຍໃນ ແລະນອກກອງທັບ.

ທ່ານພົນໂທ ຮວ່າງຊວນຈ໊ຽນ ຢ້ຽມຢາມສູນການແພດສະຫວັດດີການຜູ້ອາຍຸໂຮງໝໍພະຍາບານ Narita. ພາບ: qdnd.vn

ທ່ານພົນໂທ ຮ່ວາງຊວນຈ໊ຽນ ເຊື້ອເຊີນການນຳສູນ ມາຢ້ຽມຢາມຫວຽດນາມເພື່ອແລກປ່ຽນບົດຮຽນປະສົບການ ແລະຊຸກຍູ້ກາລະໂອກາດຮ່ວມມື. ກະຊວງປ້ອງກັນປະເທດຫວຽດນາມ ຈະສ້າງເງື່ອນໄຂສະດວກ ເພື່ອໃຫ້ສອງຝ່າຍຮ່ວມມືຢ່າງມີປະສິດທິຜົນ.

ໂດຍ: ທູຈາງ