ພົນເອກ ຟານວັນຢາງ ພົບປະເຈລະຈາກັບລັດຖະມົນຕີກະຊວງປ້ອງກັນປະເທດເບລາຣຸດ

ທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດຫວຽດນາມ ແລະທ່ານພົນຕີ Khrenin Viktor Gennadievich ລັດຖະມົນຕີກະຊວງປ້ອງກັນປະເທດເບລາຣຸດ. ພາບ: ທູຈາງ

ທີ່ການພົບປະເຈລະຈາ, ລັດຖະມົນຕີສອງທ່ານ ສະແດງຄວາມປິຕິຊົມຊື່ນ ແລະເຫັນດີເປັນເອກະພາບຖືວ່າ ເລື່ອງຫວຽດນາມ ແລະເບລາຣຸດ ຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດໃນການຢ້ຽມຢາມຄັ້ງນີ້ຂອງທ່ານ ໂຕເລິມ ແມ່ນພື້ນຖານ ແລະກຳລັງໜູນ ເພື່ອສອງປະເທດກ້າວເຂົ້າສູ່ໄລຍະການຮ່ວມມືໃໝ່ໃນຫຼາຍຂົງເຂດ, ໃນນັ້ນມີການຮ່ວມມືດ້ານປ້ອງກັນຊາດ.

ກ່ຽວກັບທິດທາງການຮ່ວມມືໃນໄລຍະຈະມາເຖິງ, ສອງຝ່າຍເຫັນດີເປັນເອກະພາບຊີ້ນໍາບັນດາອົງການ, ກົມກອງຂອງສອງກະຊວງປ້ອງກັນປະເທດ ສົມທົບກັນຢ່າງແໜ້ນແຟ້ນ, ຜັນຂະຫຍາຍແຜນການຮ່ວມມືດ້ານປ້ອງກັນຊາດ ປີ 2025 ຢ່າງມີປະສິດທິຜົນ; ຄົ້ນຄວ້າ, ພິຈາລະນາເປີດກວ້າງການຮ່ວມມືກ່ຽວກັບການບໍາລຸງສ້າງຜ່ານຫຼັກສູດໄລຍະສັ້ນ, ແລກປ່ຽນບົດຮຽນໃນຂົງເຂດເຊິ່ງສອງຝ່າຍມີທ່າແຮງ ແລະຄວາມຕ້ອງການ; ເພີ່ມທະວີການຮ່ວມມືດ້ານເຕັກນິກການທະຫານ; ສະໜັບສະໜູນ ແລະເຂົ້າຮ່ວມເຫດການຫຼາຍຝ່າຍສາກົນໂດຍກະຊວງປ້ອງກັນປະເທດສອງປະເທດ ຈັດຕັ້ງ...

ສະມາຊິກຄະນະຜູ້ແທນຫວຽດນາມ ທີ່ການພົບປະເຈລະຈາ. ພາບ: ທູຈາງ

ສະມາຊິກຄະນະຜູ້ແທນເບລາຣຸດ ທີ່ການພົບປະເຈລະຈາ. ພາບ: ທູຈາງ

ເຫັນດີເປັນເອກະພາບກັບຂໍ້ສະເໜີຂອງທ່ານພົນເອກ ຟານວັນຢາງ ແລະບັນດາບັນຫາທີ່ສອງຝ່າຍໄດ້ແລກປ່ຽນແນໃສ່ເພີ່ມທະວີການຮ່ວມມື, ທ່ານພົນຕີ Khrenin Viktor Gennadievich ສະແດງຄວາມເຊື່ອໝັ້ນວ່າ ການພົບປະເຈລະຈາຄັ້ງນີ້ຈະນໍາການພົວພັນດ້ານປ້ອງກັນຊາດສອງຝ່າຍສືບຕໍ່ພັດທະນາຢ່າງແທດຈິງ, ມີປະສິດທິຜົນ, ປະກອບສ່ວນຊຸກຍູ້ການພົວພັນຮ່ວມມືມິດຕະພາບທີ່ເປັນມູນເຊື້ອລະຫວ່າງ ຫວຽດນາມ-ເບລາຣຸດ ໃຫ້ນັບມື້ນັບພັດທະນາ, ສອດຄ່ອງກັບຜົນປະໂຫຍດຂອງສອງປະເທດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະການພັດທະນາຂອງແຕ່ລະປະເທດ ແລະພາກພື້ນ.

ບັນຍາກາດທີ່ການພົບປະເຈລະຈາ. ພາບ: ທູຈາງ

ພາຍຫຼັງການພົບປະເຈລະຈາ, ທ່ານພົນເອກ ຟານວັນຢາງ ແລະທ່ານພົນຕີ Khrenin Viktor Gennadievich ໄດ້ເປັນສັກຂີພິຍານພິທີລົງນາມໃນກົດລະບຽບການເຄື່ອນໄຫວຂອງກຸ່ມປະຕິບັດງານສອງຝ່າຍກ່ຽວກັບການຮ່ວມມືດ້ານປ້ອງກັນຊາດລະຫວ່າງ ຫວຽດນາມ-ເບລາຣຸດ. ກ່ອນໜ້ານັ້ນ, ພາຍໃຕ້ການເປັນສັກຂີພິຍານຂອງທ່ານ ໂຕເລິມ ແລະທ່ານ Aleksandr Lukashenko ປະທານາທິບໍດີເບລາຣຸດ, ລັດຖະມົນຕີສອງທ່ານ ໄດ້ມອບຈົດໝາຍເຈດຕະນາກ່ຽວກັບການເພີ່ມທະວີການຮ່ວມມືບໍາລຸງສ້າງນາຍ ແລະພົນທະຫານ ແລະນັກຊ່ຽວຊານລະຫວ່າງກະຊວງປ້ອງກັນປະເທດຫວຽດນາມ ແລະກະຊວງປ້ອງກັນປະເທດເບລາຣຸດ.

* ຕອນບ່າຍວັນທີ 11 ພຶດສະພາ, ຢູ່ນະຄອນຫຼວງ Minsk, ໃນຂອບເຂດການພົບປະຂອງທ່ານ ໂຕເລິມ ກັບສະມາຄົມມິດຕະພາບ ແລະພົບປະແລກປ່ຽນວັດທະນະທໍາກັບຕ່າງປະເທດຂອງ ເບລາຣຸດ, ສະມາຄົມມິດຕະພາບ ເບລາຣຸດ-ຫວຽດນາມ ແລະອະດີດນັກຊ່ຽວຊານເບລາຣຸດ ທີ່ເຄີຍຊ່ວຍເຫຼືອຫວຽດນາມ, ທ່ານພົນເອກ ຟານວັນຢາງ ໄດ້ມີການພົບປະກັບທ່ານ Braga Vasili Ivanovich, ປະທານສະຫະພັນນັກຮົບເກົ່າເບລາຣຸດ ທີ່ເຄີຍເຂົ້າຮ່ວມຊ່ວຍເຫຼືອຫວຽດນາມ.

ໂດຍ: ເຈິ່ນຮວ່ຽນ