ຫວຽດນາມ-ອາແຊກໄບຊານ ຊຸກຍູ້ການຮ່ວມມືດ້ານປ້ອງກັນຊາດສອງຝ່າຍໃຫ້ນັບມື້ນັບມີປະສິດທິຜົນ

ສະແດງຄວາມປິຕິຊົມຊື່ນທີ່ການພົບປະກັບທ່ານພົນເອກ ຟານວັນຢາງ ຢູ່ນະຄອນຫຼວງ Baku, ທ່ານ Hasanov ລັດຖະມົນຕີກະຊວງປ້ອງກັນປະເທດອາແຊກໄບຊານ ຖືວ່າ ການຢ້ຽມຢາມຂອງທ່ານເລຂາທິການໃຫຍ່ ໂຕເລິມ ຈະປະກອບສ່ວນປັບປຸງ ແລະພັດທະນາສາຍພົວພັນມິດຕະພາບທີ່ເປັນມູນເຊື້ອລະຫວ່າງ ຫວຽດນາມ ແລະອາແຊກໄບຊານ  ເວົ້າລວມ ແລະລະຫວ່າງກະຊວງປ້ອງກັນປະເທດສອງປະເທດເວົ້າສະເພາະ. ທ່ານລັດຖະມົນຕີ Hasanov ປາດຖະໜາວ່າ ບົນພື້ນຖານການພົວພັນອັນດີງາມລະຫວ່າງສອງປະເທດ, ສອງກະຊວງປ້ອງກັນປະເທດ ຈະຍູ້ແຮງການເຄື່ອນໄຫວພົບປະ, ແລກປ່ຽນ, ຍົກອອກມາດຕະການ ແນໃສ່ຊຸກຍູ້ການຮ່ວມມືດ້ານປ້ອງກັນຊາດສອງຝ່າຍໃຫ້ນັບມື້ນັບມີປະສິດທິຜົນ ແລະແທດຈິງ.

ທ່ານພົນໂທ Zakir Hasanov ລັດຖະມົນຕີກະຊວງປ້ອງກັນປະເທດອາແຊກໄບຊານ ຕ້ອນຮັບທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດຫວຽດນາມ. ພາບ: qdnd.vn

ລັດຖະມົນຕີສອງທ່ານ ຕີລາຄາວ່າ ການພົວພັນຮ່ວມມືດ້ານປ້ອງກັນຊາດຫວຽດນາມ-ອາແຊກໄບຊານ  ໃນໄລຍະຜ່ານມາບັນລຸໄດ້ໝາກຜົນທີ່ຕັ້ງໜ້າ, ພ້ອມທັງເຫັນດີໂດຍຖືວ່າ ການນຳກະຊວງປ້ອງກັນປະເທດ ແລະບັນດາອົງການທີ່ກ່ຽວຂ້ອງຂອງສອງຝ່າຍຄວນສືບຕໍ່ເອົາໃຈໃສ່, ຄົ້ນຄວ້າເປີດກວ້າງເນື້ອໃນການຮ່ວມມືແນໃສ່ຂຸດຄົ້ນຄວາມສາມາດບົ່ມຊ້ອນໃນຂົງເຂດນີ້ໃຫ້ດີກວ່າອີກ.

ທ່ານພົນໂທ Zakir Hasanov ລັດຖະມົນຕີກະຊວງປ້ອງກັນປະເທດອາແຊກໄບຊານ ແລະທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດຫວຽດນາມ. ພາບ: qdnd.vn

ເພື່ອຜັນຂະຫຍາຍບົດບັນທຶກຊ່ວຍຈໍາກ່ຽວກັບການຮ່ວມມືດ້ານປ້ອງກັນຊາດທີ່ໄດ້ລົງນາມຢ່າງມີປະສິດທິຜົນ, ບົນພື້ນຖານຂໍ້ສະເໜີຂອງທ່ານພົນເອກ ຟານວັນຢາງ, ສອງຝ່າຍໄດ້ເຫັນດີຈະຄົ້ນຄວ້າ,  ສົມທົບກັນຜັນຂະຫຍາຍບາງທິດທາງຮ່ວມມືດ້ານປ້ອງກັນຊາດໃນໄລຍະຈະມາເຖິງ, ກ່ອນອື່ນໝົດແມ່ນເພີ່ມທະວີການແລກປ່ຽນຄະນະຜູ້ແທນທຸກຂັ້ນແນໃສ່ເພີ່ມທະວີການພົວພັນມິດຕະພາບ, ຄວາມເຂົ້າໃຈເຊິ່ງກັນ ແລະກັນ, ຊຸກຍູ້ຂົງເຂດຮ່ວມມືທີ່ມີຄວາມສາມາດບົ່ມຊ້ອນ; ຜັນຂະຫຍາຍບົດບັນທຶກຊ່ວຍຈໍາກ່ຽວກັບການຮ່ວມມືດ້ານປ້ອງກັນຊາດລະຫວ່າງກະຊວງປ້ອງກັນປະເທດສອງປະເທດຢ່າງມີປະສິດທິຜົນ, ໂດຍສຸມໃສ່ຂົງເຂດຮ່ວມມືທີ່ສອງຝ່າຍມີຄວາມຕ້ອງການ ແລະມີທ່າແຮງ.

ສອງຝ່າຍກໍ່ເຫັນດີເປັນເອກະພາບຍູ້ແຮງການຮ່ວມມືດ້ານການບໍາລຸງກໍ່ສ້າງ, ໃນນັ້ນ, ກະຊວງປ້ອງກັນປະເທດຫວຽດນາມ ພ້ອມແລ້ວທີ່ຈະຮັບເອົານັກຮຽນການທະຫານຂອງ ອາແຊກໄບຊານ ມາຮຽນພາສາຫວຽດ ແລະເຂົ້າຮ່ວມຊຸດຝຶກອົບຮົມເຈົ້າໜ້າທີ່ປ້ອງກັນຊາດສາກົນຢູ່ຫວຽດນາມ.

ທ່ານພົນໂທ Zakir Hasanov ລັດຖະມົນຕີກະຊວງປ້ອງກັນປະເທດອາແຊກໄບຊານ ແລກປ່ຽນກັບທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດຫວຽດນາມ. ພາບ: qdnd.vn

ລັດຖະມົນຕີສອງທ່ານ ກໍ່ເຫັນດີເປັນເອກະພາບສ້າງເງື່ອນໄຂສະດວກເພື່ອຊຸກຍູ້ວິສາຫະກິດປ້ອງກັນຊາດສອງປະເທດພົບປະ,  ຊອກຫາກາລະໂອກາດຮ່ວມມືໃນຂົງເຂດການຄ້າການທະຫານ, ອຸດສາຫະກຳປ້ອງກັນຊາດ; ຊຸກຍູ້ການສ້າງກົນໄກກຸ່ມເຮັດວຽກລະດັບຊ່ຽວຊານລະຫວ່າງກະຊວງປ້ອງກັນປະເທດສອງປະເທດ ເພື່ອຊອກຮູ້ ແລະແລກປ່ຽນບັນດາຂົງເຂດຮ່ວມມືທີ່ມີຄວາມສາມາດບົ່ມຊ້ອນອື່ນໆ. ກະຊວງປ້ອງກັນປະເທດຫວຽດນາມ ຊົມເຊີຍບັນດາວິສາຫະກິດ ແລະຮາກຖານອຸສາຫະກໍາປ້ອງກັນຊາດອາແຊກໄບຊານ ເຂົ້າຮ່ວມວາງສະແດງຜະລິດຕະພັນທີ່ງານວາງສະແດງປ້ອງກັນຊາດສາກົນຫວຽດນາມ.

ເນື່ອງໃນໂອກາດນີ້, ລັດຖະມົນຕີສອງທ່ານ ໄດ້ແລກປ່ຽນບົດບັນທຶກຊ່ວຍຈຳກ່ຽວກັບການຮ່ວມມືດ້ານປ້ອງກັນຊາດໂດຍມີການເປັນສັກຂີພິຍານຂອງທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ແລະທ່ານ Ilham Aliyev ປະທານາທິບໍດີ ອາແຊກໄບຊານ.

ໂດຍ: ທູຈາງ