ນັກຂ່າວ: ກ່ອນອື່ນໝົດ, ສະເໜີສະຫາຍແຈ້ງບັນດາໝາກຜົນ ເຊິ່ງຄະນະກອງທັບປະຊາຊົນຫວຽດນາມ ບັນລຸໄດ້ໃນການໄປຊ່ວຍເຫຼືອປະເທດເພື່ອນມຽນມາ ແກ້ໄຂຜົນຮ້າຍຢ້ອນຫຼັງຈາກເຫດແຜ່ນດິນໄຫວ?

ທ່ານພົນຈັດຕະວາ ຟ້າມວັນຕີ້: ໂດຍປະຕິບັດຕາມການຊີ້ນຳຂອງຜູ້ປະຈຳການຄະນະເລຂາທິການ, ນາຍົກລັດຖະມົນຕີ, ຄະນະພັກການທະຫານສູນກາງ, ກະຊວງປ້ອງກັນປະເທດ ໄດ້ຈັດສົ່ງຄະນະລວມມີນາຍ ແລະພົນທະຫານຈຳນວນ 80 ຄົນ ໄປຍັງມຽນມາ ເຂົ້າຮ່ວມການກູ້ຊີບກູ້ໄພ ແຕ່ວັນທີ 30 ມີນາ. ພາຍຫຼັງໄປຮອດສະໜາມບິນ Yangon, ຄະນະໄດ້ເຄື່ອນຍ້າຍດ້ວຍລົດໄປຮອດນະຄອນຫຼວງ Naypyidaw ເຊິ່ງມີໄລຍະທາງກວ່າ 500km, ໃນຕອນກາງຄືນ ແລະຕອນເຊົ້າມື້ຕໍ່ມາໄດ້ເຮັດວຽກກັບອົງການທີ່ກ່ຽວຂ້ອງຂອງ ມຽນມາ ເພື່ອກຳນົດເຂດຊອກຫາ, ກໍ່ຄືວິທີການປະສານສົມທົບເພື່ອຮັບປະກັນໃຫ້ວຽກງານຊອກຫາໄດ້ດຳເນີນໄປຢ່າງສະດວກ ແລະມີປະສິດທິຜົນທີ່ສຸດ.

ຢູ່ Naypyidaw, ຄະນະໄດ້ຜັນຂະຫຍາຍໜ້າທີ່ຊອກຫາຜູ້ຖືກເຄາະຮ້າຍຢູ່ 3 ບ່ອນ, ລວມມີຄອນໂດ Bala Tidi, ໂຮງໝໍ Ottara Thiri ແລະໂຮງແຮມ Aye Chan Thar. ຢູ່ 3 ບ່ອນນີ້, ຄະນະໄດ້ນໍາໃຊ້ໝາດົມກິ່ນ ພ້ອມກັບເຄື່ອງຊອກຫາສະເພາະກິດ ພົບເຫັນ 32 ບ່ອນທີ່ມີຜູ້ຖືກເຄາະຮ້າຍ ຕິດຄ້າງຢູ່ໃນຕຶກອາຄານທີ່ຖືກພັງລົງ ແລະດຳເນີນການຊອກຫາຢູ່ 20 ບ່ອນ, ເຄື່ອນຍ້າຍສົບຜູ້ຖືກເຄາະຮ້າຍ 21 ສົບ. ພິເສດ,  ຄະນະໄດ້ປະສານສົມທົບກັບກຳລັງກູ້ໄພຂອງມຽນມາ ແລະຕວກກີ ກອບກູ້ຜູ້ລອດຊີວິດ ໄດ້ຄົນໜຶ່ງ ອາຍຸ 26 ປີ. ນອກຈາກນັ້ນ, ຢູ່ບ່ອນດັ່ງກ່າວ, ຄະນະໄດ້ຊອກເຫັນຊັບສິນ, ອຸປະກອນທີ່ມີຄ່າຂຶ້ນເຖິງຫຼາຍແສນໂດລາສະຫະລັດ, ຫຼັງຈາກນັ້ນກໍມອບໃຫ້ໂຮງໝໍ Ottara Thiri ແລະປະຊາຊົນ.

leftcenterrightdel
ທ່ານພົນຈັດຕະວາ ຟ້າມວັນຕີ້. ພາບ: ແອັງຫວູ.

ຄວນເວົ້າຕື່ມອີກວ່າ, ສະພາບດິນຟ້າອາກາດ ຢູ່ເຂດທີ່ຄະນະປະຕິບັດໜ້າທີ່ ມີຄວາມຮ້າຍແຮງ, ອາກາດຮ້ອນອົບເອົ້າ,  ຕາມປົກກະຕິອຸນຫະພູມຂຶ້ນສູງເຖິງ 40 ອົງສາ, ສົບຂອງຜູ້ເຄາະຮ້າຍຖືກເນົ່າເປື່ອຍ ຫຼືຖືກຈົມຢູ່ໃນນ້ຳພາໃຫ້ເກີດມົນລະພິດ. ບ່ອນທີ່ຕຶກອາຄານພັງລົງນັ້ນເຕັມໄປດ້ວຍຄວາມອັນຕະລາຍຕໍ່ກັບກຳລັງກູ້ໄພໃນການປະຕິບັດໜ້າທີ່. ຜ່ານການແລກປ່ຽນກັບຝ່າຍ ມຽນມາ, ພວກຂ້າພະເຈົ້າ ໄດ້ຮູ້ວ່າ ກ່ອນໜ້ານັ້ນມີບາງຄະນະກູ້ໄພຕ່າງປະເທດ ໄດ້ມາສຳຫຼວດເຂດດັ່ງກ່າວແລ້ວແຕ່ວ່າບໍ່ໄດ້ລົງມືປະຕິບັດຍ້ອນວ່າມີລັກສະນະສັບສົນ, ອັນຕະລາຍ. ຫົວໜ້າກົມດັບເພີງ, ກູ້ໄພກູ້ຊີບ (ກະຊວງພາຍໃນມຽນມາ) ເຄົາລົບນັບຖືໝາກຜົນດັ່ງກ່າວ ແລະໃຫ້ຮູ້ວ່າ ຄະນະຫວຽດນາມ ແມ່ນຄະນະທີ່ຊອກເຫັນສົບຜູ້ຖືກເຄາະຮ້າຍໄດ້ຫຼາຍທີ່ສຸດ, ພ້ອມທັງມີຫຼາຍກິດຈະກຳທີ່ມີຄວາມໝາຍທີ່ສຸດໃນບັນດາຄະນະກູ້ໄພຕ່າງປະເທດ ທີ່ມານະຄອນຫຼວງ Naypyidaw.

ໄປຄຽງຄູ່ກັບວຽກງານກູ້ໄພ, ຄະນະໄດ້ດຳເນີນການຊ່ວຍເຫຼືອດ້ານມະນຸດສະທຳ ຢູ່ບ່ອນທີ່ໄດ້ຮັບຜົນສະທ້ອນຈາກເຫດແຜ່ນດິນໄຫວ, ໃນນັ້ນໄດ້ໜູນຊ່ວຍ ແລະມອບອາຫານແຫ້ງປະລິມານ 40 ໂຕນ ແລະຕູບ (ບໍ່ນັບເຄື່ອງທີ່ກະຊວງປ້ອງກັນປະເທດ ຕົກລົງຊ່ວຍເຫຼືອຕື່ມ) ໃຫ້ແກ່ຝ່າຍ ມຽນມາ; ບັນດາສະມາຊິກໃນຄະນະກໍ່ໄດ້ບໍລິຈາກເງິນ  ເພື່ອຊ່ວຍເຫຼືອຄອບຄົວຜູ້ຖືກເຄາະຮ້າຍ ຈຳນວນ 5.000 ໂດລາສະຫະລັດ; ໄດ້ຈັດຕັ້ງການກວດ ແລະແຈກຢາຍຢຸກຢາໂດຍບໍ່ເກັບຄ່າໃຫ້ປະຊາຊົນທ້ອງຖິ່ນໄດ້ກວ່າ 200 ເທື່ອຄົນ ໃນສະພາບທີ່ໂຮງໝໍຢູ່ Naypyidaw ຖືກເສຍຫາຍຢ່າງໜັກໜ່ວງຈາກເຫດແຜ່ນດິນໄຫວ, ຂາດແຄນຢາ ແລະວັດຖຸອຸປະກອນການແພດ.

ໃນໄລຍະເວລາທີ່ຢູ່ມຽນມາ, ຄະນະໄດ້ປະຕິບັດວຽກງານການທູດ, ພົບປະແລກປ່ຽນ ແລະແບ່ງປັນບົດຮຽນກູ້ໄພກູ້ຊີບກັບອົງການກ່ຽວຂ້ອງຂອງມຽນມາ, ຕວກກີ, ສະຫະລັດອາຣັບ ເອມິເຣດ (UAE)...

ນັກຂ່າວ: ຄະນະກອງທັບປະຊາຊົນຫວຽດນາມ ຖອດຖອນໄດ້ບົດຮຽນໃດແດ່ ພາຍຫຼັງໄປປະຕິບັດງານຄັ້ງນີ້, ຂໍຮຽນສະຫາຍ?

ທ່ານພົນຈັດຕະວາ ຟ້າມວັນຕີ້: ເລື່ອງກອງທັບປະຊາຊົນຫວຽດນາມ ຈັດສົ່ງກຳລັງໄປເຂົ້າຮ່ວມການກູ້ໄພເຫດແຜ່ນດິນໄຫວຢູ່ມຽນມາ ໄດ້ປະກອບສ່ວນແຜ່ຂະຫຍາຍຈິດໃຈ ສາກົນອັນສູງສົ່ງ, ມູນເຊື້ອອັນດີງາມຂອງຊາດ ແລະຄຸນທາດຂອງທະຫານລຸງໂຮ່, ພິເສດມີຄວາມໝາຍເລິກເຊິ່ ງໃນການພົວພັນຫວຽດນາມ-ມຽນມາ, ຜ່ານນັ້ນໄດ້ແບ່ງປັນ ແລະຊ່ວຍເຫຼືອປະຊາຊົນປະເທດເພື່ອນຜ່ານຜ່າຄວາມຫຍຸ້ງຍາກທີ່ສຸດໃນໄລຍະປະຈຸບັນ.

ການເຂົ້າຮ່ວມໜູນຊ່ວຍແກ້ໄຂຜົນຮ້າຍຢ້ອນຫຼັງຈາກເຫດແຜ່ນດິນໄຫວຢູ່ມຽນມາ ກໍ່ຖອດຖອນໄດ້ບັນດາບົດຮຽນອັນລ້ຳຄ່າ ເພື່ອໃຫ້ກຳລັງກູ້ຊີບກູ້ໄພຂອງກອງທັບປະຊາຊົນຫວຽດນາມ ສືບຕໍ່ຍົກສູງກຳລັງຄວາມສາມາດດ້ານວິຊາສະເພາະ. ຕາມຂ້າພະເຈົ້າ, ບັນດາບົດຮຽນນີ້ກໍ່ຕ້ອງໄດ້ສະຫຼຸບ, ຖອດຖອນບົດຮຽນ, ສ້າງເປັນເອກະສານເພື່ອຮັບໃຊ້ການຈັດສົ່ງຄະນະກູ້ຊີບກູ້ໄພ ໄປຕ່າງປະເທດ ແລະເຮັດວຽກໃນສະພາບແວດລ້ອມທີ່ມີຫຼາຍປະເທດເຂົ້າຮ່ວມໃນອະນາຄົດ.

ນັກຂ່າວ: ພາຍຫຼັງຊຸມວັນທີ່ປະຕິບັດໜ້າທີ່ໜັກໜ່ວງ ແລະປະສົບກັບຄວາມຫຍຸ້ງຍາກຫຼາຍຢ່າງ, ປະຈຸບັນ, ສຸຂະພາບ, ຈິດໃຈຂອງບັນດາສະມາຊິກໃນຄະນະຄືແນວໃດ, ຂໍຮຽນສະຫາຍ?

ທ່ານພົນຈັດຕະວາ ຟ້າມວັນຕີ້: ການຜັນຂະຫຍາຍວຽກງານກະກຽມ ແລະຜັນຂະຫຍາຍຢູ່ພື້ນທີ່ຕົວຈິງ, ຄະນະໄດ້ຮັບການຊີ້ນຳຢ່າງໃກ້ຊິດຕິດແທດ, ເອົາໃຈໃສ່, ລະດົມກຳລັງໃຈຂອງຄະນະພັກການທະຫານສູນກາງ, ກະຊວງປ້ອງກັນປະເທດ ແລະບັນດາອົງການກ່ຽວຂ້ອງ. ເມື່ອມີໜ້າຢູ່ມຽນມາ, ຄະນະກໍ່ໄດ້ຮັບການໜູນຊ່ວຍຈາກສະຖານທູດ, ຫ້ອງການທີ່ປຶກສາທູດປ້ອງກັນຊາດຫວຽດນາມ ປະຈຳ ມຽນມາ, Mytel-ຮ່ວມທຸລະກິດຂອງກຸ່ມບໍລິສັດອຸດສາຫະກຳ-ໂທລະຄົມມະນາຄົມກອງທັບ (Viettel) ຢູ່ມຽນມາ ຢ່າງມີປະສິດທິຜົນ... ການໜູນຊ່ວຍ, ລະດົມກໍາລັງໃຈຢ່າງທັນການ ພ້ອມດ້ວຍນ້ຳໃຈຮັບຜິດຊອບ, ສາມັກຄີ, ມີວິໄນດີ, ຄວາມຮູ້ຄວາມສາມາດ ແລະຄຸນທາດຂອງສະມາຊິກໃນຄະນະແຕ່ລະສະຫາຍກໍ່ແມ່ນປັດໄຈຊ່ວຍໃຫ້ພວກຂ້າພະເຈົ້າ ເຮັດສຳເລັດໜ້າທີ່ທີ່ໄດ້ຮັບມອບໝາຍ.

ປະຈຸບັນ, ທົ່ວຄະນະມີສຸຂະພາບ ແລະຈິດໃຈດີ ແລະມີຄວາມປິຕິຊົມຊື່ນຍ້ອນວ່າໄດ້ເຮັດສຳເລັດໜ້າທີ່ທີ່ເຕັມໄປດ້ວຍຄວາມໝາຍ, ນັ້ນແມ່ນຊ່ວຍປະເທດ ແລະປະຊາຊົນ ມຽນມາ ບັນເທົາຄວາມເຈັບປວດທຸກໂສກ, ການສູນເສຍອັນໃຫຍ່ຫຼວງຈາກເຫດແຜ່ນດິນໄຫວ.

ດ້ວຍຈິດໃຈທີ່ມີຄວາມຮັບຜິດຊອບ, ຄວາມມານະພະຍາຍາມ ແລະບັນດາໝາກຜົນທີ່ບັນລຸໄດ້ໃນວຽກງານໜູນຊ່ວຍປະເທດເພື່ອນ, ທ່ານພົນເອກ ຟານວັນຢາງ, ກຳມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດ ໄດ້ຝາກຈົດໝາຍຍ້ອງຍໍຊົມເຊີຍ ແລະລະດົມກຳລັງໃຈ. ຜູ້ບັນຊາຄະນະກໍ່ໄດ້ ສະເໜີກະຊວງປ້ອງກັນປະເທດ ມີການຍ້ອງຍໍຊົມເຊີຍຕາມຮູບການທີ່ເໝາະສົມໃຫ້ແກ່ບັນດາກົມກອງ, ບຸກຄົນທີ່ເຮັດສຳເລັດໜ້າທີ່ໃນການເຂົ້າຮ່ວມກູ້ໄພເຫດແຜ່ນດິນໄຫວ ຢູ່ມຽນມາ.

ນັກຂ່າວ: ຂໍຂອບໃຈສະຫາຍ!

ໂດຍ: ແສງເດືອນ