ກະຊວງປ້ອງກັນປະເທດລາວ ຈັດພິທີສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ

ຜູ້ແທນເຂົ້າຮ່ວມພິທີ. ພາບ: ຫາຍຕ໊ຽນ

ທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ປະຈໍາ ລາວ. ພາບ: ຫາຍຕ໊ຽນ

ທີ່ພິທີສະເຫຼີມສະຫຼອງ, ທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ປະຈໍາ ລາວ ໄດ້ແບ່ງປັນສອງເນື້ອໃນ, ຄື: ຂະບວນການກໍ່ສ້າງ, ຕໍ່ສູ້ ແລະເຕີບໃຫຍ່ຂອງກອງທັບປະຊາຊົນຫວຽດນາມ ໃນຕະຫຼອດ 80 ປີຜ່ານມາ; ການພົວພັນຮ່ວມມືລະຫວ່າງກະຊວງປ້ອງກັນປະເທດຫວຽດນາມ ແລະກະຊວງປ້ອງກັນປະເທດລາວ.

ກ່ຽວກັບການຮ່ວມມືລະຫວ່າງສອງກະຊວງປ້ອງກັນປະເທດຫວຽດນາມ ແລະລາວ, ທ່ານ ຫງວຽນມິງເຕິມ ໃຫ້ຮູ້ວ່າ ນີ້ແມ່ນຂົງເຂດການຮ່ວມມືເຊິ່ງການນຳຂັ້ນສູງສອງພັກ, ສອງລັດກໍານົດວ່າ ແມ່ນເສົາຄໍ້າໃນສາຍພົວພັນລະຫວ່າງສອງປະເທດ, ປະກອບສ່ວນຮັກສາສະຖຽນລະພາບດ້ານການເມືອງຂອງແຕ່ລະປະເທດ. ສອງຝ່າຍໄດ້ໜູນຊ່ວຍກັນຢ່າງມີປະສິດທິຜົນໃນການແລກປ່ຽນບົດຮຽນປະສົບການເປັນປະຈຳ, ສົມທົບກັນຕໍ່ສູ້ປ້ອງກັນ, ຕ້ານອາດຊະຍາກໍາຂ້າມຊາດ, ອາດຊະຍາກຳຢາເສບຕິດ, ອາດຊະຍາກຳການຄ້າມະນຸດ, ອາດຊະຍາກຳນໍາໃຊ້ເຕັກໂນໂລຊີສູງ…

ທ່ານພົນໂທ ຄໍາລຽງ ອຸທະໄກສອນ ລັດຖະມົນຕີກະຊວງປ້ອງກັນປະເທດລາວ. ພາບ: ຫາຍຕ໊ຽນ

ສ່ວນທ່ານພົນໂທ ຄໍາລຽງ ອຸທະໄກສອນ ລັດຖະມົນຕີກະຊວງປ້ອງກັນປະເທດລາວ ໃຫ້ຮູ້ວ່າ ພັກ, ລັດຖະບານ, ກອງທັບ ແລະປະຊາຊົນລາວ ຍາມໃດກໍ່ຮັບຮູ້ຢ່າງເລິກເຊິ່ງວ່າທຸກໆໄຊຊະນະໃນພາລະກິດປະຕິວັດປົດປ່ອຍຊາດໃນເມື່ອກ່ອນຂອງລາວ ກໍ່ຄືພາລະກິດແຫ່ງການປົກປັກຮັກສາ, ສ້າງສາ ແລະພັດທະນາປະເທດໃນທຸກວັນນີ້ລ້ວນແຕ່ຕິດພັນກັບຄວາມສາມັກຄີ ແລະການຊ່ວຍເຫຼືອອັນລໍ້າຄ່າຂອງພັກ, ລັດຖະບານ ແລະປະຊາຊົນຫວຽດນາມ, ພິເສດແມ່ນກອງທັບປະຊາຊົນຫວຽດນາມ ອ້າຍນ້ອງ. ພ້ອມທັງຢືນຢັນວ່າ ພັກ, ລັດ, ກອງທັບ ແລະປະຊາຊົນລາວ ເດັດດ່ຽວປົກປັກຮັກສາຊັບສິນອັນລໍ້າຄ່າດັ່ງກ່າວ, ຄື: ຮັກສາ “ແກ້ວຕາຂອງຕົນ” ແລະຈະສືບຕໍ່ແນ່ວແນ່ໃນການເພີ່ມທະວີສາຍພົວພັນມິດຕະພາບ, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງລາວ - ຫວຽດນາມ ໃຫ້ນັບມື້ນັບພັດທະນາ, ຂຽວສົດງົດງາມ,  ໝັ້ນຄົງຂະໜົງແກ່ນໄປຊົ່ວກາລະນານ.

ໂດຍ: ເຈິ່ນຮວ່ຽນ