ທ່ານພົນເອກ ຫງວຽນເຕິນເກືອງ ຕ້ອນຮັບຄະນະຜູ້ແທນກະຊວງພາຍໃນກໍາປູເຈຍ
ກປ.ອອນໄລ - ວັນທີ 25 ທັນວາ, ທີ່ສໍານັກງານກະຊວງປ້ອງກັນປະເທດ, ທ່ານພົນເອກ ຫງວຽນເຕິນເກືອງ, ຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງກະຊວງພາຍໃນກໍາປູເຈຍ ນຳໂດຍທ່ານພົນເອກ Samrith Dy, ຮອງລັດຖະມົນຕີ ກະຊວງພາຍໃນກໍາປູເຈຍ.
ທີ່ການຕ້ອນຮັບ, ທ່ານພົນເອກ ຫງວຽນເຕິນເກືອງ ເນັ້ນໜັກວ່າ ການຮ່ວມມືດ້ານການທະຫານ, ການປ້ອງກັນຊາດ ຫວຽດນາມ-ກໍາປູເຈຍ ສືບຕໍ່ພັດທະນາຢ່າງແທດຈິງ, ມີປະສິດທິຜົນໃນໄລຍະຜ່ານມາ, ແມ່ນໜຶ່ງໃນບັນດາເສົາຄໍ້າສຳຄັນຂອງການພົວພັນສອງປະເທດ, ສຸມໃສ່ຂົງເຂດ, ຄື: ການແລກປ່ຽນຄະນະຜູ້ແທນທຸກຂັ້ນ, ເປັນຕົ້ນແມ່ນຄະນະຜູ້ແທນຂັ້ນສູງ; ການກໍ່ສ້າງຊັບພະຍາກອນມະນຸດ; ການຮ່ວມມືຄຸ້ມຄອງ ແລະປົກປັກຮັກສາຊາຍແດນ, ໜູນຊ່ວຍປະຊາຊົນຢູ່ເຂດຊາຍແດນເພື່ອພັດທະນາເສດຖະກິດ-ສັງຄົມ; ແລກປ່ຽນບົດຮຽນດ້ານວິຊາສະເພາະ; ສົມທົບ ແລະສະໜັບສະໜູນເຊິ່ງກັນ ແລະກັນຢູ່ເວທີປາໄສ ແລະກົນໄກສາກົນຫຼາຍຝ່າຍ...
    |
 |
|
ທ່ານພົນເອກ ຫງວຽນເຕິນເກືອງ ແລກປ່ຽນກັບທ່ານພົນເອກ Samrith Dy. ພາບ: qdnd.vn. |
ເນື່ອງໃນໂອກາດນີ້, ທ່ານພົນເອກ ຫງວຽນເຕິນເກືອງ ໄດ້ຕີລາຄາສູງໝາກຜົນແຫ່ງການຮ່ວມມືລະຫວ່າງຂະແໜງກົດລັບສອງປະເທດ ຫວຽດນາມ-ກໍາປູເຈຍ, ພົ້ນເດັ່ນໃນບັນດາຂົງເຂດແລກປ່ຽນຄະນະຜູ້ແທນ; ການບຳລຸງສ້າງ, ຝຶກອົບຮົມ, ບໍາລຸງສ້າງລົງເລິກຂະແໜງການ; ຈັດສົ່ງນັກຊ່ຽວຊານ; ການຊ່ວຍເຫຼືອເຊິ່ງກັນ ແລະກັນ... ທ່ານພົນເອກ ຫງວຽນເຕິນເກືອງ ສະເໜີວ່າ ໃນໄລຍະຈະມາເຖິງ, ສອງຝ່າຍສືບຕໍ່ເອົາໃຈໃສ່ເປັນພິເສດເຖິງການຜັນຂະຫຍາຍເນື້ອໃນການຮ່ວມມືທີ່ໄດ້ຕົກລົງຢ່າງມີປະສິດທິຜົນ; ພ້ອມທັງຢືນຢັນວ່າ ການນຳກະຊວງປ້ອງກັນປະເທດຫວຽດນາມ ຍາມໃດກໍ່ສະໜັບສະໜູນ ແລະສ້າງເງື່ອນໄຂສະດວກ ເພື່ອໃຫ້ຂະແໜງກົດລັບສອງປະເທດເພີ່ມທະວີການຮ່ວມມື, ປະກອບສ່ວນເຮັດໃຫ້ການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຮອບດ້ານ ຫວຽດນາມ-ກໍາປູເຈຍ ເລິກເຊິ່ງຂຶ້ນກວ່າອີກ.
|
|
 |
|
ຜູ້ແທນຖ່າຍຮູບທີ່ລະນຶກ. ພາບ: qdnd.vn. |
ສ່ວນທ່ານພົນເອກ Samrith Dy ສະແດງຄວາມຂອບໃຈທ່ານພົນເອກ ຫງວຽນເຕິນເກືອງ ທີ່ໄດ້ສະຫຼະເວລາຕ້ອນຮັບຄະນະ, ພ້ອມທັງປາດຖະໜາວ່າ ກະຊວງປ້ອງກັນປະເທດຫວຽດນາມ ຈະສືບຕໍ່ເອົາໃຈໃສ່, ສະໜັບສະໜູນ, ຊ່ວຍເຫຼືອຂະແໜງກົດລັບຂອງກໍາປູເຈຍ, ຜ່ານນັ້ນປະກອບສ່ວນຊຸກຍູ້ການພົວພັນຮ່ວມມືໃນຂົງເຂດກົດລັບລະຫວ່າງສອງປະເທດໃຫ້ນັບມື້ນັບພັດທະນາ, ມີປະສິດທິຜົນ, ເຂົ້າສູ່ລວງເລິກ ແລະແທດຈິງ.
ໂດຍ: ເຈິ່ນຮວ່ຽນ