ທ່ານພົນເອກ ຫງວຽນເຕິນເກືອງ ພົບປະກັບລັດຖະມົນຕີກະຊວງບັນດາກໍາລັງປະກອບອາວຸດປະຕິວັດກູບາ
ກປ.ອອນໄລ - ວັນທີ 21 ທັນວາ, ທີ່ສໍານັກງານກະຊວງປ້ອງກັນປະເທດ, ທ່ານພົນເອກ ຫງວຽນເຕິນເກືອງ, ຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ໄດ້ໃຫ້ການຕ້ອນຮັບທ່ານພົນໂທ Álvaro Lopez Miera, ກໍາມະການກົມການເມືອງພັກກອມມູນິດກູບາ, ລັດຖະມົນຕີກະຊວງບັນດາກໍາລັງປະກອບອາວຸດ ປະຕິວັດກູບາ ເນື່ອງໃນໂອກາດເຂົ້າຮ່ວມພິທີສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ, 35 ປີແຫ່ງວັນບຸນປ້ອງກັນຊາດທົ່ວປວງຊົນ ແລະງານວາງສະແດງປ້ອງກັນຊາດສາກົນຫວຽດນາມ ປີ 2024.
    |
 |
|
ທ່ານພົນເອກ ຫງວຽນເຕິນເກືອງ ພົບປະກັບທ່ານພົນໂທ Álvaro Lopez Miera. ພາບ: qdnd.vn |
ທີ່ການຕ້ອນຮັບ, ທ່ານພົນເອກ ຫງວຽນເຕິນເກືອງ ໄດ້ແບ່ງປັນ ຄວາມຫຍຸ້ງຍາກ, ສິ່ງທ້າທາຍທີ່ປະຊາຊົນກູບາ ພວມປະເຊີນໜ້າ ຍ້ອນຜົນກະທົບຈາກການປິດລ້ອມ, ຂວໍ້າບາດ, ພິເສດແມ່ນ ຄວາມເສຍຫາຍຈາກໄພທຳມະຊາດທີ່ເກີດຂຶ້ນໃນເດືອນຕຸລາ ແລະ ພະຈິກ ຜ່ານມາ; ພ້ອມທັງຢືນຢັນວ່າ ພັກ, ລັດ, ກອງທັບ ແລະ ປະຊາຊົນຫວຽດນາມ ຍາມໃດກໍ່ພ້ອມແລ້ວທີ່ຈະສະໜັບສະໜູນ ແລະ ຊ່ວຍເຫຼືອ ກູບາ ຈົນສຸດຄວາມສາມາດຂອງຕົນ.
|
|
 |
|
ທ່ານພົນເອກ ຫງວຽນເຕິນເກືອງ ມອບຂອງຂວັນທີ່ລະນຶກ ໃຫ້ທ່ານພົນໂທ Álvaro Lopez Miera. ພາບ: qdnd.vn |
ທ່ານພົນເອກ ຫງວຽນເຕິນເກືອງ ເນັ້ນໜັກວ່າ, ສາຍພົວພັນຮ່ວມມືລະຫວ່າງກອງທັບປະຊາຊົນຫວຽດນາມ ແລະບັນດາກໍາລັງປະກອບອາວຸດປະຕິວັດກູບາ ຍາມໃດກໍ່ໄດ້ຮັບຄວາມເອົາໃຈໃສ່ ຊຸກຍູ້ຈາກການນໍາລຸ້ນຕ່າງໆຂອງສອງປະເທດ, ສອດຄ່ອງກັບສາຍພົວພັນມິດຕະພາບທີ່ເປັນມູນເຊື້ອແບບພິເສດຫວຽດນາມ - ກູບາ, ໃນນັ້ນມີຫຼາຍຂົງເຂດຮ່ວມມືບັນລຸໄດ້ໝາກຜົນອັນຕັ້ງໜ້າຄື: ການແລກປ່ຽນຄະນະຜູ້ແທນ, ວຽກງານພັກ, ວຽກງານການເມືອງ, ອຸດສາຫະກຳປ້ອງກັນຊາດ, ການບຳລຸງສ້າງ...; ຢືນຢັນວ່າ, ກົມໃຫຍ່ເສນາທິການ ກອງທັບປະຊາຊົນຫວຽດນາມ ຈະຕັ້ງໜ້າຊີ້ນຳບັນດາອົງການ, ກົມກອງທີ່ກ່ຽວຂ້ອງຜັນຂະຫຍາຍເນື້ອໃນການຮ່ວມມືດ້ານປ້ອງກັນຊາດທີ່ໄດ້ຕົກລົງເປັນເອກະພາບຢ່າງແທດຈິງ, ມີປະສິດທິຜົນ, ສອດຄ່ອງກັບເງື່ອນໄຂ ແລະຄວາມສາມາດຂອງແຕ່ລະຝ່າຍ.
|
|
 |
|
ທ່ານພົນເອກ ຫງວຽນເຕິນເກືອງ, ທ່ານພົນໂທ Álvaro Lopez Miera ພ້ອມດ້ວຍຜູ້ແທນທີ່ການພົບປະ. ພາບ: qdnd.vn |
ສ່ວນທ່ານພົນໂທ Álvaro Lopez Miera ໄດ້ສົ່ງຄຳອວຍພອນອັນອົບອຸ່ນມາຍັງກອງທັບປະຊາຊົນຫວຽດນາມ ເນື່ອງໃນໂອກາດສະເຫຼີມສະຫຼອງ 80 ປີແຫ່ງວັນສ້າງຕັ້ງ; ສະແດງຄວາມປະທັບໃຈຕໍ່ກັບງານວາງສະແດງປ້ອງກັນຊາດສາກົນຫວຽດນາມ ປີ 2024; ໂດຍຖືວ່າ, ງານວາງສະແດງປ້ອງກັນຊາດສາກົນຫວຽດນາມ 2024 ໄດ້ສະແດງໃຫ້ເຫັນວ່າ, ກອງທັບປະຊາຊົນຫວຽດນາມ ນັບມື້ນັບພັດທະນາຢ່າງຍອດຢ້ຽມ. ເນື່ອງໃນໂອກາດນີ້, ທ່ານພົນໂທ Álvaro Lopez Miera ໄດ້ແຈ້ງໃຫ້ທ່ານພົນເອກ ຫງວຽນເຕິນເກືອງ ຮັບຊາບໂດຍຫຍໍ້ກ່ຽວກັບສະພາບການຢູ່ປະເທດກູບາ.
ທ່ານພົນໂທ Álvaro Lopez Miera ເນັ້ນໜັກວ່າ, ສາຍພົວພັນສະໜິດຕິດພັນລະຫວ່າງກອງທັບສອງປະເທດ ໄດ້ ແລະກໍາລັງສືບທອດຜົນງານ ທີ່ປະທານໂຮ່ຈີມິນ ແລະປະທານ Fidel Castro ກໍ່ຕັ້ງ, ໄດ້ຮັບການທຸ້ມເທເຫື່ອແຮງເພີ່ມພູມຄູນສ້າງ ໂດຍການນຳ ແລະປະຊາຊົນຫຼາຍລຸ້ນຄົນຂອງສອງປະເທດ; ປາດຖະໜາວ່າ ໃນໄລຍະຈະມາເຖິງ, ກອງທັບສອງປະເທດຈະສືບຕໍ່ຊຸກຍູ້ການພົວພັນຮ່ວມມືຢ່າງແທດຈິງ ແລະມີປະສິດທິຜົນ.
ໂດຍ: ທູຈາງ