ການໂອ້ລົມສົນທະນາວຽກງານແມ່ຍິງກອງທັບ ຫວຽດນາມ-ລາວ

ທ່ານພັນເອກພິເສດນາງ ຫງວຽນທິທູຮ່ຽນ, ຫົວໜ້າຫ້ອງການສະຫະພັນແມ່ຍິງກອງທັບ, ກົມໃຫຍ່ການເມືອງກອງທັບປະຊາຊົນຫວຽດນາມ ແລະທ່ານພົນຈັດຕະວານາງ ໄພວອນ ອິນທະບຸດ ຫົວໜ້າຫ້ອງການສະຫະພັນແມ່ຍິງກອງທັບປະຊາຊົນລາວ ເປັນປະທານຮ່ວມການໂອ້ລົມສົນທະນາ. ເຂົ້າຮ່ວມລາຍການມີພະນັກງານແມ່ຍິງກອງທັບປະຊາຊົນ ລາວ 19 ສະຫາຍ ພ້ອມດ້ວຍພະນັກງານ, ລັດຖະກອນຫ້ອງການສະຫະພັນແມ່ຍິງກອງທັບ.

ທ່ານພັນເອກພິເສດນາງ ຫງວຽນທິທູຮ່ຽນ ແລະທ່ານພົນຈັດຕະວານາງ ໄພວອນ ອິນທະບຸດ ເປັນປະທານຮ່ວມການໂອ້ລົມສົນທະນາ. ພາບ: ຫາຍເວິນ.

ທີ່ການໂອ້ລົມສົນທະນາ, ແມ່ຍິງກອງທັບສອງປະເທດ ຫວຽດນາມ ແລະລາວ ໄດ້ພ້ອມກັນແລກປ່ຽນບົດຮຽນໃນການຈັດຕັ້ງ ແລະຜັນຂະຫຍາຍການເຄື່ອນໄຫວວຽກງານແມ່ຍິງ ແລະຂະບວນການແມ່ຍິງໃນກອງທັບປະຊາຊົນຫວຽດນາມ. ຜັນຂະຫຍາຍຂະບວນການແຂ່ງຂັນ “ແມ່ຍິງກອງທັບ ພູມປັນຍາ - ຈັນຍາບັນ, ປະຕິບັດສໍາເລັດໜ້າທີ່, ກໍ່ສ້າງຄອບຄົວຜາສຸກ, ສົມເປັນທະຫານລຸງໂຮ່ ໃນຍຸກໃໝ່” ຢ່າງມີປະສິດທິຜົນ, ກໍ່ສ້າງແມ່ຍິງກອງທັບໃນຍຸກໃໝ່ ດ້ວຍມາດຖານ “ພູມປັນຍາ, ຈັນຍາບັນ, ລະບຽບວິໄນ, ມີຄວາມເມດຕາກະລຸນາ”; ພິເສດໃນການຜັນຂະຫຍາຍປະຕິບັດ 2 ຂອດບຸກທະລຸຂອງແມ່ຍິງກອງທັບປະຊາຊົນຫວຽດນາມ ໄລຍະ 5 ປີ (2021-2026), ນັ້ນແມ່ນ: ໝູນໃຊ້ເຕັກໂນໂລຊີຂໍ້ມູນຂ່າວສານໃນການເຄື່ອນໄຫວສະຫະພັນ ແລະຍົກສູງຈໍານວນ, ຄຸນນະພາບຖັນແຖວພະນັກງານຍິງ; ສູ້ຊົນເພີ່ມອັດຕາແມ່ຍິງເຂົ້າຮ່ວມການນໍາພາ, ຄຸ້ມຄອງໃນທຸກຂົງເຂດທີ່ເໝາະສົມ.

ຜູ້ຕາງໜ້າຄະນະພະນັກງານແມ່ຍິງກອງທັບປະຊາຊົນລາວ ມອບຂອງຂວັນເປັນທີ່ລະນຶກໃຫ້ຫ້ອງການສະຫະພັນແມ່ຍິງກອງທັບ, ກົມໃຫຍ່ການເມືອງກອງທັບປະຊາຊົນຫວຽດນາມ. ພາບ: ຫາຍເວິນ.

ແມ່ຍິງກອງທັບສອງປະເທດ ໄດ້ພ້ອມກັນແລກປ່ຽນແບ່ງປັນບັນດາວິທີເຮັດທີ່ດີ, ຮູບແບບທີ່ມີຫົວຄິດປະດິດສ້າງໃນການປະຕິບັດ, ຜັນຂະຫຍາຍວຽກງານສະຫະພັນ ແລະຂະບວນການແຂ່ງຂັນ. ພ້ອມທັງປາດຖະໜາວ່າ ໃນໄລຍະຈະມາເຖິງ, ແມ່ຍິງກອງທັບປະຊາຊົນຫວຽດນາມ ແລະກອງທັບປະຊາຊົນລາວ ຈະສືບຕໍ່ມີບັນດາການເຄື່ອນໄຫວພົບປະແລກປ່ຽນ, ສົມທົບກັນໃນວຽກງານໂຄສະນາເຜີຍແຜ່, ສຶກສາອົບຮົມມູນເຊື້ອສາມັກຄີມິດຕະພາບ ແລະການຮ່ວມມືຮອບດ້ານໃນບັນດາການເຄື່ອນໄຫວເປັນປະຈຳ, ກໍຄື ໃນໂອກາດສະເຫຼີມສະຫຼອງວັນບຸນໃຫຍ່ ແລະເຫດການສໍາຄັນຂອງສອງປະເທດ ແລະກອງທັບປະຊາຊົນສອງປະເທດ. ສະຫະພັນແມ່ຍິງກອງທັບປະຊາຊົນຫວຽດນາມ ພ້ອມແລ້ວທີ່ຈະຮັບ ແລະຈັດຕັ້ງຊຸດຝຶກອົບຮົມໃຫ້ແກ່ພະນັກງານແມ່ຍິງກອງທັບປະຊາຊົນລາວ ກ່ຽວກັບວຽກງານແມ່ຍິງ ແລະຂະບວນການແມ່ຍິງໃນຊຸມປີຈະມາເຖິງ.

ບັນດາຜະລິດຕະພັນ ໂດຍເອື້ອຍນ້ອງແມ່ຍິງກອງທັບລາວ ຜະລິດເອງ ໄດ້ມອບໃຫ້ພະນັກງານ, ລັດຖະກອນຫ້ອງການສະຫະພັນແມ່ຍິງກອງທັບ, ກົມໃຫຍ່ການເມືອງກອງທັບປະຊາຊົນຫວຽດນາມ. ພາບ: ຫາຍເວິນ.

ຜ່ານລາຍການ, ໄດ້ຢັ້ງຢືນບັນດາຄຸນນຄ່າທີ່ເປັນມູນເຊື້ອອັນດີງາມ ແລະອາລົມຈິດທີ່ສະໜິດຕິດພັນລະຫວ່າງແມ່ຍິງກອງທັບປະຊາຊົນຫວຽດນາມ ແລະແມ່ຍິງກອງທັບປະຊາຊົນລາວ ຈະສືບຕໍ່ໄດ້ຮັບການສືບທອດ ແລະເພີ່ມພູນຄູນສ້າງໃຫ້ນັບມື້ນັບແໜ້ນແຟ້ນ, ສະໜິດຕິດພັນ; ພ້ອມທັງກໍານົດຄວາມຮັບຜິດຊອບຂອງແຕ່ລະກໍາລັງ ໃນການປະກອບສ່ວນເພີ່ມທະວີການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະກອງທັບປະຊາຊົນສອງປະເທດ.

ໂດຍ: ໄຊຊະນະ