ຫວຽດນາມ - ຍີ່ປຸ່ນ ຊຸກຍູ້ການຮ່ວມມືດ້ານປ້ອງກັນຊາດ

ທ່ານພົນໂທ ຟ້າມຮວ່າຍນາມ ແລກປ່ຽນກັບທ່ານພົນຈັດຕະວາ Aoi Kei. ພາບ: ວັນຮ໊ຽວ.

ທີ່ການຕ້ອນຮັບ, ທ່ານພົນໂທ ຟ້າມຮວ່າຍນາມ ຕີລາຄາສູງເລື່ອງກະຊວງປ້ອງກັນປະເທດຍີ່ປຸ່ນ ແລະກອງທຶນສັນຕິພາບ Sasakawa ໄດ້ສົມທົບກັນຢ່າງແໜ້ນແຟ້ນກັບກະຊວງປ້ອງກັນປະເທດຫວຽດນາມ ໃນການຜັນຂະຫຍາຍລາຍການພົບປະແລກປ່ຽນນາຍທະຫານຂັ້ນນາຍພັນ, ນາຍຮ້ອຍ ຫວຽດນາມ - ຍີ່ປຸ່ນ ໃນ 7 ປີຜ່ານມາ. ການເຄື່ອນໄຫວນີ້ປະກອບສ່ວນເພີ່ມທະວີການພົວພັນມິດຕະພາບ, ການຮ່ວມມື, ຄວາມເຂົ້າໃຈ ແລະຄວາມໄວ້ເນື້ອເຊື່ອໃຈເຊິ່ງກັນ ແລະກັນລະຫວ່າງພະນັກງານ, ນາຍທະຫານ ກະຊວງປ້ອງກັນປະເທດຂອງສອງປະເທດ, ກອງທັບປະຊາຊົນຫວຽດນາມ ແລະກໍາລັງປ້ອງກັນຍີ່ປຸ່ນ ເວົ້າສະເພາະ, ເວົ້າລວມແມ່ນປະຊາຊົນສອງປະເທດ.

ທ່ານພົນໂທ ຟ້າມຮວ່າຍນາມ ມອບຂອງຂວັນເປັນທີ່ລະນຶກໃຫ້ທ່ານພົນຈັດຕະວາ Aoi Kei. ພາບ: ວັນຮ໊ຽວ.

ບົນພື້ນຖານການພົວພັນອັນດີງາມລະຫວ່າງສອງປະເທດ, ການຮ່ວມມືດ້ານປ້ອງກັນຊາດທີ່ສອງຝ່າຍໄດ້ຊຸກຍູ້ໃນຫຼາຍຂົງເຂດ, ບັນລຸບາດກ້າວສໍາຄັນ. ການນໍາຂັ້ນສູງກະຊວງປ້ອງກັນປະເທດ, ກອງທັບສອງປະເທດ ຢ້ຽມຢາມເຊິ່ງກັນ ແລະກັນ ແລະພົບປະຢູ່ນອກເວທີປາໄສຫຼາຍຝ່າຍເປັນປະຈຳ; ການຮ່ວມມືລະຫວ່າງບັນດາເຫຼົ່າທັບ, ເຫຼົ່າຮົບ, ການບໍາລຸງກໍ່ສ້າງຊັບພະຍາກອນມະນຸດ, ໂຄງການໜູນຊ່ວຍຍົກສູງຄວາມສາມາດ, ແກ້ໄຂຜົນຮ້າຍຢ້ອນຫຼັງຈາກສົງຄາມ... ໄດ້ຮັບການເອົາໃຈໃສ່, ຊຸກຍູູ້, ຜັນຂະຫຍາຍຢ່າງແທດຈິງ; ສອງຝ່າຍຕັ້ງໜ້າສະໜັບສະໜູນເຊິ່ງກັນ ແລະກັນ ທີ່ເວທີປາໄສປ້ອງກັນຊາດຫຼາຍຝ່າຍ, ເປັນຕົ້ນແມ່ນໃນຂອບເຂດກອງປະຊຸມລັດຖະມົນຕີປ້ອງກັນປະເທດອາຊຽນ ເປີດກວ້າງ (ADMM+). ທ່ານພົນໂທ ຟ້າມຮວ່າຍນາມ ຢັ້ງຢືນວ່າ ການປະກອບສ່ວນເຂົ້າໃນຜົນງານໃນການພົວພັນດ້ານປ້ອງກັນຊາດຫວຽດນາມ-ຍີ່ປຸ່ນ ໃນຊຸມປີຜ່ານມາແມ່ນມີລາຍການພົບປະແລກປ່ຽນນາຍທະຫານຂັ້ນນາຍພັນ, ນາຍຮ້ອຍ ໂດຍກອງທຶນສັນຕິພາບ Sasakawa ສະເໜີ ແລະໜູນຊ່ວຍຈັດຕັ້ງ.

ທ່ານພົນໂທ ຟ້າມຮວ່າຍນາມ ກັບທ່ານພົນຈັດຕະວາ Aoi Kei ແລະບັນດາສະມາຊິກໃນຄະນະ. ພາບ: ວັນຮ໊ຽວ.

ທ່ານພົນຈັດຕະວາ Aoi Kei ຜູ້ບັນຊາການ ກອງບັນຊາການລະບົບບັນຊາສື່ສານ, ກໍາລັງປ້ອງກັນໜ້າດິນຍີ່ປຸ່ນ, ຫົວໜ້າຄະນະ ສະແດງຄວາມຫວັງວ່າ ການຮ່ວມມືລະຫວ່າງສອງຝ່າຍຈະນັບມື້ນັບໄດ້ຮັບການຮັດແໜ້ນ, ພິເສດແມ່ນໃນຂົງເຂດປ້ອງກັນຊາດ, ປ້ອງກັນຄວາມສະຫງົບ. ທ່ານພົນຈັດຕະວາ Aoi Kei ເຊື່ອໝັ້ນວ່າ ລາຍການພົບປະແລກປ່ຽນຄັ້ງນີ້ຈະປະກອບສ່ວນເພີ່ມທະວີການພົວພັນສາມັກຄີ, ມິດຕະພາບ ແລະການຮ່ວມມືລະຫວ່າງພະນັກງານ, ນາຍທະຫານກະຊວງປ້ອງກັນປະເທດຂອງສອງປະເທດ, ລະຫວ່າງກອງທັບປະຊາຊົນຫວຽດນາມ ແລະກໍາລັງປ້ອງກັນຍີ່ປຸ່ນ.

ໂດຍ: ໄຊຊະນະ