ກອງປະຊຸມສະຫຼຸບງານພົບປະແລກປ່ຽນມິດຕະພາບປ້ອງກັນຊາດເຂດຊາຍແດນຫວຽດນາມ - ລາວ ຄັ້ງທີ 2

ບັນດາຄໍາຄິດເຫັນທີ່ກອງປະຊຸມຕີລາຄາສູງງານພົບປະແລກປ່ຽນມິດຕະພາບປ້ອງກັນຊາດເຂດຊາຍແດນຫວຽດນາມ - ລາວ ຄັ້ງທີ 2 ໄດ້ຈັດຂຶ້ນດ້ວຍການເຄື່ອນໄຫວຫຼາຍຢ່າງທີ່ອຸດົມສົມບູນ ແລະມີຄວາມໝາຍ. ຈຸດພົ້ນເດັ່ນຂອງງານພົບປະຄັ້ງນີ້ ນັ້ນແມ່ນເປັນຄັ້ງທຳອິດທີ່ສອງຝ່າຍໄດ້ສົມທົບກັນຈັດຕັ້ງການພົບປະແລກປ່ຽນວຽກງານການເມືອງ ແລະນາຍທະຫານໜຸ່ມຂອງກອງທັບສອງປະເທດດ້ວຍຫົວຂໍ້ວ່າ “ຄວາມເຊື່ອໝັ້ນທີ່ບໍລິສຸດຢ່າງສະເໝີຕົ້ນສະເໝີປາຍ” ດ້ວຍຮູບການໂອ້ລົມສົນທະນາ ແລະໄດ້ຮັບການຖ່າຍທອດສົດທາງໂທລະພາບ.

ຜູ້ແທນເຂົ້າຮ່ວມກອງປະຊຸມ. ພາບ: qdnd.vn

ຕາມບັນດາຜູ້ແທນແລ້ວ, ງານພົບປະແລກປ່ຽນມິດຕະພາບປ້ອງກັນຊາດເຂດຊາຍແດນຫວຽດນາມ - ລາວ ຄັ້ງທີ 2 ສືບຕໍ່ເປັນການຢັ້ງຢືນແມ່ນຮູບແບບຮ່ວມມືທີ່ມີປະສິດທິຜົນ, ເປັນເອກະລັກສະເພາະ, ມີຄວາມໝາຍດ້ານການເມືອງຢ່າງເລິກເຊິ່ງ; ໄດ້ຮັບຄວາມເອົາໃຈໃສ່ເປັນພິເສດ, ການສຸມໃສ່ນໍາພາ, ຊີ້ນໍາ, ການຈັດຕັ້ງປະຕິບັດຈາກຄະນະພັກການການທະຫານສູນກາງ ແລະກະຊວງປ້ອງກັນປະເທດ. ຜົນສຳເລັດຂອງງານພົບປະແລກປ່ຽນໄດ້ປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈທາງດ້ານການເມືອງ, ຄວາມເຂົ້າໃຈເຊິ່ງກັນ ແລະ ກັນ, ຮັດແໜ້ນນໍ້າໃຈສາມັກຄີ ແລະຄວາມສະໜິດຕິດພັນລະຫວ່າງປະຊາຊົນ, ອໍານາດການປົກຄອງທ້ອງຖິ່ນ ແລະກະຊວງປ້ອງກັນປະເທດສອງປະເທດ.

ກ່າວຄຳເຫັນສະຫຼຸບກອງປະຊຸມ, ທ່ານພົນໂທ ຮ່ວາງຊວນຈ໊ຽນ, ຮອງລັດຖະມົນຕີກະຊວງປ້ອງກັນປະເທດ ໄດ້ຍ້ອງຍໍຊົມເຊີຍບັນດາອົງການ, ກົມກອງທີ່ກ່ຽວຂ້ອງຂອງກະຊວງປ້ອງກັນປະເທດ ໄດ້ຕັ້ງໜ້າ ແລະເປັນເຈົ້າການຜັນຂະຫຍາຍວຽກງານກະກຽມ; ຂອບອົກຂອບໃຈບັນດາກະຊວງ, ຄະນະ,  ຂະແໜງການ, ທ້ອງຖິ່ນທີ່ໄດ້ສົມທົບກັນຢ່າງແໜ້ນແຟ້ນ, ຮັບປະກັນໃຫ້ງານພົບປະແລກປ່ຽນມິດຕະພາບປ້ອງກັນຊາດເຂດຊາຍແດນ ຫວຽດນາມ-ລາວ ຄັ້ງທີ 2 ປະສົບຜົນສຳເລັດຢ່າງຮອບດ້ານ, ມີຄວາມໝາຍແທດຈິງ ແລະ ແຜ່ຂະຫຍາຍຢ່າງກວ້າງຂວາງ.

ທ່ານພົນໂທ ຮ່ວາງຊວນຈ໊ຽນ ມອບໃບຍ້ອງຍໍຂອງລັດຖະມົນຕີກະຊວງປ້ອງກັນປະເທດ ໃຫ້ແກ່ບັນດາໝູ່ຄະນະ. ພາບ: qdnd.vn

ບົນພື້ນຖານໝາກຜົນທີ່ບັນລຸໄດ້ຜ່ານການຈັດຕັ້ງງານພົບປະແລກປ່ຽນຄັ້ງນີ້, ທ່ານພົນໂທ ຮວ່າງຊວນຈ໊ຽນ ຮຽກຮ້ອງໃຫ້ບັນດາອົງການ, ກົມກອງທີ່ກ່ຽວຂ້ອງຂອງກະຊວງປ້ອງກັນປະເທດ ອີງຕາມໜ້າທີ່ທີ່ໄດ້ຮັບມອບໝາຍ, ສືບຕໍ່ເສີມຂະຫຍາຍຈິດໃຈຮັບຜິດຊອບ, ສົມທົບກັນຢ່າງແໜ້ນແຟ້ນ; ປາດຖະໜາວ່າ ບັນດາກະຊວງ, ຄະນະ, ຂະແໜງການ, ທ້ອງຖິ່ນຈະສືບຕໍ່ເອົາໃຈໃສ່ ແລະໜູນຊ່ວຍໃນການຈັດຕັ້ງເຫດການສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ, 35 ປີແຫ່ງວັນບຸນທົ່ວປວງຊົນປ້ອງກັນຊາດ, ງານວາງສະແດງປ້ອງກັນຊາດສາກົນ ຫວຽດນາມ 2024 ກໍຄືການເຄື່ອນໄຫວພົວພັນຕ່າງປະເທດດ້ານປ້ອງກັນຊາດສຳຄັນອື່ນໆໃນໄລຍະຈະມາເຖິງ.

ໂດຍ: ທູຈາງ