ນັກຮົບເກົ່າຫວຽດນາມ ແລະລາວ ເປັນຂົວເຊື່ອມຕໍ່ມິດຕະພາບລະຫວ່າງສອງປະເທດ

ສະຫາຍພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດຫວຽດນາມ ຕ້ອນຮັບສະຫາຍພົນໂທ ແສງນວນ ໄຊຍະລາດ ປະທານສະຫະພັນນັກຮົບເກົ່າແຫ່ງຊາດລາວ. ພາບ: ເຟືອງລີງ.

ທີ່ການຕ້ອນຮັບ, ເມື່ອເນັ້ນໜັກເຖິງມູນເຊື້ອ, ປະຫວັດສາດ, ສະຫາຍພົນເອກ ຟານວັນຢາງ ຖືວ່າ ຫວຽດນາມ ແລະລາວ ແມ່ນສອງປະເທດມີສາຍພົວພັນອັນຍິ່ງໃຫຍ່, ຄວາມສາມັກຄີແບບພິເສດ, ຍາມໃດກໍ່ຊ່ວຍເຫຼືອເຊິ່ງກັນ ແລະກັນໃນໄລຍະຕ່າງໆ. ເພື່ອບັນລຸໄດ້ບັນດາຜົນງານຄືດັ່ງກ່າວນັ້ນແມ່ນມີການປະກອບສ່ວນຢ່າງຫຼວງຫຼາຍຂອງບັນດານັກຮົບເກົ່າ ແລະບັນດານັກຮົບວິລະຊົນທີ່ເສຍສະຫຼະຊີວິດເພື່ອຊາດຂອງສອງປະເທດ. ພັກ, ລັດ, ກອງທັບ ແລະປະຊາຊົນຫວຽດນາມ ຍາມໃດກໍ່ຈົດຈຳການຊ່ວຍເຫຼືອຢ່າງສຸດອົກສຸດໃຈຂອງພັກ, ລັດ, ກອງທັບ ແລະປະຊາຊົນລາວ.

ບັນຍາກາດທີ່ການຕ້ອນຮັບ. ພາບ: ເຟືອງລີງ.

ພ້ອມທັງຢັ້ງຢືນວ່າ ກະຊວງປ້ອງກັນປະເທດຫວຽດນາມ ຍາມໃດກໍ່ເອົາໃຈໃສ່ ແລະສະໜັບສະໜູນການຮ່ວມມືລະຫວ່າງສູນກາງສະຫະພັນນັກຮົບເກົ່າຫວຽດນາມ ແລະສະຫະພັນນັກຮົບເກົ່າແຫ່ງຊາດລາວ, ສະຫາຍພົນເອກ ຟານວັນຢາງ ເຊື່ອໝັ້ນວ່າ ໃນໄລຍະຈະມາເຖິງ, ນັກຮົບເກົ່າຫວຽດນາມ ແລະລາວ ຈະສືບຕໍ່ເປັນຂົວເຊື່ອມຕໍ່ມິດຕະພາບຂອງນັກຮົບເກົ່າຮຸ່ນຕ່າງໆຂອງສອງປະເທດ, ຜ່ານນັ້ນສືບຕໍ່ໂຄສະນາ, ສຶກສາອົບຮົມໃຫ້ບັນດາສະມາຊິກ, ຍາດຕິພີ່ນ້ອງຂອງບັນດາສະມາຊິກ ແລະຮຸ່ນໜຸ່ມສອງປະເທດກ່ຽວກັບປະຫວັດສາດ, ຄວາມໝາຍ ແລະຄວາມສຳຄັນຂອງສາຍພົວພັນ, ນໍ້າໃຈສາມັກຄີສະໜິດຕິດພັນລະຫວ່າງສອງປະເທດ, ສອງກອງທັບ.

ສະຫາຍພົນເອກ ຟານວັນຢາງ ມອບສັນຍາລັກທີ່ລະນຶກໃຫ້ສະຫາຍພົນໂທ ແສງນວນ ໄຊຍະລາດ. ພາບ: ເຟືອງລີງ.

ສະຫາຍພົນເອກ ຟານວັນຢາງ, ສະຫາຍພົນໂທ ແສງນວນ ໄຊຍະລາດ ແລະຄະນະຜູ້ແທນສອງປະເທດ. ພາບ: ເຟືອງລີງ.

ຂອບໃຈການຕ້ອນຮັບຂອງສະຫາຍພົນເອກ ຟານວັນຢາງ, ສະຫາຍພົນໂທ ແສງນວນ ໄຊຍະລາດ ຖືວ່າ ໃນໄລຍະຜ່ານມາ, ພັກ, ລັດ, ກອງທັບ ແລະປະຊາຊົນລາວ ຍາມໃດກໍ່ໄດ້ຮັບການຊ່ວຍເຫຼືອຈາກພັກ, ລັດ, ກອງທັບ ແລະປະຊາຊົນຫວຽດນາມ ໃນຫຼາຍຂົງເຂດ. ໃນນັ້ນມີການສົມທົບ, ຊ່ວຍເຫຼືອລະຫວ່າງສູນກາງສະຫະພັນນັກຮົບເກົ່າຫວຽດນາມ ແລະສະຫະພັນນັກຮົບເກົ່າລາວ ໃນບັນດາການເຄື່ອນໄຫວພົບປະແລກປ່ຽນ, ແລກປ່ຽນຄະນະຜູ້ແທນ, ໂຄສະນາ ແລະຂົນຂວາຍສະມາຊິກ ແລະຄອບຄົວກ່ຽວກັບສາຍພົວພັນມິດຕະພາບແບບພິເສດລະຫວ່າງສອງປະເທດ, ສອງກອງທັບ.

ສະຫາຍພົນໂທ ແສງນວນ ໄຊຍະລາດ ຫວັງວ່າ ໃນໄລຍະຈະມາເຖິງ ກະຊວງປ້ອງກັນປະເທດຫວຽດນາມ ຈະເອົາໃຈໃສ່, ສົມທົບກັນໜູນຊ່ວຍສະຫະພັນນັກຮົບເກົ່າລາວ ໃນຫຼາຍຂົງເຂດ, ໃນການເຄື່ອນໄຫວວຽກງານ.

ໂດຍ: ເຈິ່ນຮວ່ຽນ