ທີມທະຫານເຮືອປະຊາຊົນຫວຽດນາມ ຍາດໄດ້ຫຼຽນເງິນໃນການແຂ່ງຂັນຊິງ “ຂັນທະເລ”
ກປ.ອອນໄລ - ວັນທີ 28 ສິງຫາ, ຕາມແຈ້ງການທາງການຂອງໜ່ວຍກໍາມະການ, ທີມທະຫານເຮືອປະຊາຊົນຫວຽດນາມ ຍາດໄດ້ຫຼຽນເງິນ ໃນການແຂ່ງຂັນຊິງ “ຂັນທະເລ” ໃນຂອບເຂດອາມີເກມ 2021, ຖັດຈາກທີມທະຫານເຮືອສະຫະພັນລັດເຊຍ, ສ່ວນທີມທະຫານເຮືອຈີນ ຖັດຈາກທີມທະຫານເຮືອປະຊາຊົນຫວຽດນາມ. ນອກຈາກນີ້, ຄະນະຈັດຕັ້ງຍັງໄດ້ມອບລາງວັນບຸກຄົນຫົວໜ້າຂະແໜງການເດີນທະເລດີເດັ່ນທີ່ສຸດ ໃຫ້ຮ້ອຍໂທ ຫງວຽນຕ໊ຽນຢຸຍ, ຫົວໜ້າຂະແໜງເດີນທະເລ, ກໍາປັ່ນ 016-ກວາງຈຸງ (ກອງພົນນ້ອຍ 162, ທະຫານເຮືອເຂດ 4).
    |
 |
|
ຫົວໜ້າຄະນະປະຕິບັດງານ ແລະຜູ້ບັນຊາການກໍາປັ່ນ 016-ກວາງຈຸງ ອວຍພອນໜ່ວຍຍິງ ທີ່ໄດ້ປະຕິບັດທັງສອງລາຍການຍິງປືນໃຫຍ່ AK 176 ແລະຍິງ maket ໝາກມິນລອຍ ດ້ວຍປືນ 14,5mm ດີທີ່ສຸດ. ພາບ: qdnd.vn |
ໃນວັນດຽວກັນ, ໜ່ວຍກໍາມະການ ກໍໄດ້ປະກາດທີມກູ້ໄພກູ້ຊີບຂອງທີມທະຫານເຮືອປະຊາຊົນຫວຽດນາມ ໄດ້ຮັບລາງວັນທີໜຶ່ງຮ່ວມກັບທີມປະເທດເຈົ້າພາບສະຫະພັນລັດເຊຍ ໃນລາຍການນໍາໃຊ້ພາຫະນະກູ້ໄພກູ້ຊີບ. ດ້ວຍການແຂ່ງຂັນທີ່ສ້າງຄວາມປະທັບໃຈຄື, ຈັງຫວະລອຍນໍ້າ, ພາຍເຮືອໄວ, ຊັດເຈນ, ທີມກູ້ໄພກູ້ຊີບຂອງທະຫານເຮືອປະຊາຊົນຫວຽດນາມ ໄດ້ຮັບຄວາມຊົມເຊີຍ, ນິຍົມນັບຖືຈາກກອງເຊຍຂອງທັງທີມຫວຽດນາມ ແລະທີມຕ່າງປະເທດ. ໃນລາຍການແຂ່ງຂັນຕໍ່ສູ້ປ້ອງກັນກໍາປັ່ນ, ທີມທະຫານເຮືອປະຊາຊົນຫວຽດນາມ ໄດ້ຮັບລາງວັນທີໜຶ່ງພ້ອມກັບທີມປະເທດເຈົ້າພາບສະຫະພັນລັດເຊຍ.
ນອກນັ້ນ, ທີມທະຫານເຮືອປະຊາຊົນຫວຽດນາມ ໄດ້ແຂ່ງຂັນດີເດັ່ນໃນລາຍການແຂ່ງຂັນບົນທະເລ, ຄື: ຍິງປືນໃຫຍ່ AK 176, ຍິງ maket ໝາກມິນລອຍ ດ້ວຍປືນ 14,5mm ແລະທັກສະການເດີນທະເລ. ໃນນັ້ນ, ທີມຫວຽດນາມ ຍາດໄດ້ລາງວັນທີໜຶ່ງໃນລາຍການຍິງປືນໃຫຍ່ AK 176, ຖັດຈາກນັ້ນແມ່ນທີມປະເທດເຈົ້າພາບສະຫະພັນລັດເຊຍ ໄດ້ລາງວັນທີສອງ ແລະທີມຈີນ ໄດ້ລາງວັນທີສາມ. ສອງລາຍການແຂ່ງຂັນບົນທະເລທີ່ຍັງເຫຼືອ, ທີມທະຫານເຮືອປະຊາຊົນຫວຽດນາມ ລ້ວນແຕ່ຢືນອັນດັບທີ 2 ດ້ວຍຜົນງານສູງ.
ພິທີອັດການແຂ່ງຂັນ ແລະມອບລາງວັນໃຫ້ແກ່ການແຂ່ງຂັນຊິງຂັນທະເລຢູ່ນະຄອນ Vladivostok, ສະຫະພັນລັດເຊຍ ໄດ້ຈັດຂຶ້ນໃນວັນທີ 29 ສິງຫາ 2021 ຢູ່ທ່າເຮືອຂອງກອງກໍາປັ່ນປາຊີຟິກ ສັງກັດທະຫານເຮືອສະຫະພັນລັດເຊຍ.
ໂດຍ: ກວຽດເຕິມ