ຫວຽດນາມ - ກໍາປູເຈຍ ສືບຕໍ່ເພີ່ມພູນຄູນສ້າງ ແລະພັດທະນາການຮ່ວມມືດ້ານປ້ອງກັນຊາດ

ທ່ານພົນໂທ ຮວ່າງຊວັນຈ໊ຽນ ຢັ້ງຢືນວ່າ ຫວຽດນາມ ແລະກຳປູເຈຍ ແມ່ນສອງປະເທດບ້ານໃກ້ເຮືອນຄຽງມີການພົວພັນທີ່ເປັນມູນເຊື້ອອັນດີງາມ. ຫວຽດນາມ ຍາມໃດກໍ່ຖືເປັນສຳຄັນ ແລະສະຫງວນບຸລິມະສິດແຖວໜ້າໃຫ້ແກ່ການປັບປຸງ ແລະພັດທະນາການພົວພັນບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ຍືນຍົງຍາວນານກັບ ກຳປູເຈຍ; ສະໜັບສະໜູນ ກໍາປູເຈຍ ເອກະລາດ, ສັນຕິພາບ, ພັດທະນາ ແລະສວມບົດບາດໃຫຍ່ກວ່າໃນພາກພື້ນ ແລະເວທີສາກົນ.

ທ່ານພົນເອກ Tea Seiha ແລະທ່ານພົນໂທ ຮວ່າງຊວັນຈ໊ຽນ. ພາບ: ກ່ຽວຈິງ

ທ່ານພົນໂທ ຮວ່າງຊວັນຈ໊ຽນ ແຈ້ງໃຫ້ທ່ານພົນເອກ Tea Seiha ຮັບຊາບກ່ຽວກັບການເຈລະຈານະໂຍບາຍປ້ອງກັນຊາດຫວຽດນາມ-ກຳປູເຈຍ ຄັ້ງທີ 7 ທີ່ໄດ້ດຳເນີນປະສົບຜົນສຳເລັດຢ່າງຈົບງາມດ້ວຍຄວາມເຫັນດີເປັນເອກະພາບສືບຕໍ່ເພີ່ມທະວີການຮ່ວມມື, ຜັນຂະຫຍາຍຈຸດສຸມການຮ່ວມມືຕ່າງຢ່າງມີປະສິດທິຜົນ, ຄື: ການແລກປ່ຽນຄະນະຜູ້ແທນທຸກຂັ້ນ; ການຮ່ວມມືປົກປັກຮັກສາຊາຍແດນ, ທະຫານເຮືອ, ຕຳຫຼວດທະເລດ້ວຍບັນດາກົນໄກ, ການເຄື່ອນໄຫວຢ່າງມີເນື້ອແທ້, ມີປະສິດທິຜົນ; ບຳລຸງສ້າງຊັບພະຍາກອນມະນຸດ; ສືບຕໍ່ຮັກສາກົນໄກທາບທາມຄຳເຫັນ, ເຈລະຈາຢ່າງມີປະສິດທິຜົນ; ການພົບປະແລກປ່ຽນນາຍທະຫານໜຸ່ມ; ການສົມທົບກັນໂຄສະນາ, ສຶກສາໃຫ້ພົນທະຫານລຸ້ນຕ່າງໆຂອງແຕ່ລະປະເທດ, ໂດຍສະເພາະແມ່ນຄົນຮຸ່ນໜຸ່ມກ່ຽວກັບປະຫວັດສາດ, ຄວາມໝາຍ, ຄວາມສຳຄັນຂອງການພົວພັນມິດຕະພາບລະຫວ່າງປະຊາຊົນ ແລະກອງທັບສອງປະເທດ; ສືບຕໍ່ສະໜັບສະໜູນກັນທີ່ບັນດາເວທີປາໄສຫຼາຍຝ່າຍ, ໂດຍສະເພາະແມ່ນກົນໄກໂດຍອາຊຽນ ນຳພາ; ສືບຕໍ່ປະສານສົມທົບ, ໜູນຊ່ວຍກັນຍູ້ແຮງການຊອກຫາ, ທ້ອນໂຮມ ແລະສົ່ງອັດຖິທະຫານອາສາສະໝັກ ແລະຊ່ຽວຊານຫວຽດນາມ ທີ່ເສຍສະຫຼະຊີວິດຢູ່ ກຳປູເຈຍ ໃນປາງສົງຄາມກັບຄືນປະເທດຢ່າງມີປະສິດທິຜົນ.

ທ່ານພົນເອກ Tea Seiha ສະແດງຄວາມຂອບອົກຂອບໃຈຕໍ່ພັກ, ລັດ, ກະຊວງປ້ອງກັນປະເທດຫວຽດນາມ ທີ່ຍາມໃດກໍ່ສະໜັບສະໜູນ, ຊ່ວຍເຫຼືອ, ໜູນຊ່ວຍກຳປູເຈຍ ໃນໄລຍະສົງຄາມ ກໍ່ຄືໃນວິວັດແຫ່ງການສ້າງສາ, ພັດທະນາປະເທດ. ພິເສດໃນຊຸມປີມໍ່ໆມານີ້, ກອງທັບປະຊາຊົນຫວຽດນາມ ໄດ້ຜັນຂະຫຍາຍຫຼາຍລາຍການຮ່ວມມື, ໃນນັ້ນຊ່ວຍເຫຼືອ ກຳປູເຈຍ ບຳລຸງກໍ່ສ້າງພະນັກງານ, ນາຍທະຫານກອງທັບຢ່າງມີປະສິດທິຜົນ. ທ່ານພົນເອກ Tea Seiha ຢັ້ງຢືນວ່າ ຈະສືບຕໍ່ສະໜັບສະໜູນບັນດາການເຄື່ອນໄຫວໂດຍຫວຽດນາມ ຈັດຕັ້ງ; ປາດຖະໜາວ່າ ໃນໄລຍະຈະມາເຖິງກະຊວງປ້ອງກັນປະເທດຫວຽດນາມ ສືບຕໍ່ສະໜັບສະໜູນ, ຊ່ວຍເຫຼືອ ກຳປູເຈຍ ໃນທຸກຂົງເຂດໃຫ້ມີປະສິດທິຜົນກວ່າອີກ; ສະແດງຄວາມປາດຖະໜາວ່າ ໃນໄລຍະຈະມາເຖິງການພົວພັນຫວຽດນາມ-ກຳປູເຈຍ ເວົ້າລວມ ແລະການຮ່ວມມືດ້ານປ້ອງກັນຊາດ ເວົ້າສະເພາະສືບຕໍ່ໄດ້ຮັບການເພີ່ມພູນຄູນສ້າງ ແລະພັດທະນາຢ່າງຈົບງາມ.

ໂດຍ: ແສງເດືອນ