ທີ່ການເຈລະຈາ, ສອງຝ່າຍໄດ້ແລກປ່ຽນກ່ຽວກັບສະພາບການໂລກ, ພາກພື້ນ ແລະບັນດາບັນຫາທີ່ຕ່າງຝ່າຍຕ່າງມີຄວາມສົນໃຈ; ຢັ້ງຢືນບັນດາກົນໄກ ໂດຍ ອາຊຽນ ຊັກນໍາ ສືບຕໍ່ເສີມຂະຫຍາຍບົດບາດຊຸກຍູ້ການເຈລະຈາ ແລະການຮ່ວມມືພາຍໃນກຸ່ມ ກໍ່ຄືກັບບັນດາຄູ່ຮ່ວມມືພາຍນອກເພື່ອສັນຕິພາບ, ສະຖຽນລະພາບຂອງພາກພື້ນ. ກ່ຽວກັບບັນຫາຢູ່ທະເລ, ທ່ານພົນໂທ ຮວ່າງຊວນຈ໊ຽນ ເນັ້ນໜັກວ່າ, ຫວຽດນາມ ມີແຜນນະໂຍບາຍຮັກສາສັນຕິພາບ, ສະຖຽນລະພາບ, ຮັບປະກັນຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນເຮືອ ແລະການບິນຢູ່ທະເລຕາເວັນອອກ; ແກ້ໄຂການຂັດແຍ້ງກັນໂດຍສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນ ມີສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ (UNCLOS) ປີ 1982; ປະຕິບັດຖະແຫຼງການ ວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ໃຫ້ມີປະສິດທິຜົນ ແລະຄົບຖ້ວນ, ມຸ່ງໄປເຖິງການສ້າງກົດແຫ່ງການປະພຶດຢູ່ທະເລຕາເວັນອອກ (COC) ຢ່າງແທດຈິງ, ມີປະສິດທິຜົນ, ສອດຄ່ອງກັບກົດໝາຍສາກົນ.
    |
 |
|
ທ່ານພົນໂທ ຮວ່າງຊວນຈ໊ຽນ ແລະທ່ານພົນເອກ Chay Saing Yun ລົງນາມບົດບັນທຶກການເຈລະຈານະໂຍບາຍດ້ານປ້ອງກັນຊາດ ຫວຽດນາມ-ກໍາປູເຈຍ ຄັ້ງທີ 7. ພາບ: ກ່ຽວຈິງ |
ກ່ຽວກັບການຮ່ວມມືດ້ານປ້ອງກັນຊາດສອງຝ່າຍ, ສອງຝ່າຍໄດ້ເນັ້ນໜັກວ່າ ນັບແຕ່ການເຈລະຈາ ຄັ້ງທີ 6 (ເດືອນ ເມສາ 2023), ການຮ່ວມມືດ້ານປ້ອງກັນຊາດ ຫວຽດນາມ-ກໍາປູເຈຍ ສອງຝ່າຍໄດ້ຜັນຂະຫຍາຍຢ່າງເລິກເຊິ່ງກວ້າງຂວາງ, ແທດຈິງ ແລະມີປະສິດທິຜົນ, ພົ້ນເດັ່ນແມ່ນ: ການແລກປ່ຽນຄະນະຜູ້ແທນ, ການພົບປະທຸກຂັ້ນ; ການບໍາລຸງກໍ່ສ້າງຊັບພະຍາກອນມະນຸດ; ຮັກສາກົນໄກການເຈລະຈາຢ່າງມີປະສິດທິຜົນ, ໂດຍສະເພາະແມ່ນການເຈລະຈາດ້ານປ້ອງກັນຊາດ; ການແລກປ່ຽນຂໍ້ມູນຂ່າວສານ,...; ການສົມທົບ, ໜູນຊ່ວຍການຊອກຫາ, ທ້ອນໂຮມ, ຈັດສົ່ງອັດຖິນັກຮົບອາສາສະໝັກ ແລະນັກຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມ ຢູ່ກໍາປູເຈຍ ກັບຄືນປະເທດຢ່າງມີປະສິດທິຜົນ...
ໃນໄລຍະຈະມາເຖິງ, ບົນພື້ນຖານການຜັນຂະຫຍາຍຄວາມຮັບຮູ້ລວມລະຫວ່າງການນໍາຂັ້ນສູງສອງປະເທດ, ສອງຝ່າຍສືບຕໍ່ເພີ່ມທະວີການຮ່ວມມື, ຜັນຂະຫຍາຍບາງຈຸດສຸມການຮ່ວມມືໃຫ້ມີປະສິດທິຜົນ;... ສືບຕໍ່ສະໜັບສະໜູນເຊິ່ງກັນ ແລະກັນຢູ່ເວທີປາໄສຫຼາຍຝ່າຍ, ໂດຍສະເພາະແມ່ນບັນດາກົນໄກ ໂດຍອາຊຽນ ຊັກນໍາ; ສືບຕໍ່ສົມທົບ, ໜູນຊ່ວຍການຊອກຫາ, ທ້ອນໂຮມ, ຈັດສົ່ງອັດຖິທະຫານອາສາສະໝັກ ແລະນັກຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມ ຢູ່ກໍາປູເຈຍ ກັບຄືນປະເທດຢ່າງມີປະສິດທິຜົນ...
ທ່ານພົນໂທ ຮວ່າງຊວນຈ໊ຽນ ໃຫ້ຮູ້ວ່າ ຫວຽດນາມ ຫວັງວ່າ ການນໍາກະຊວງປ້ອງກັນປະເທດກໍາປູເຈຍ ຈະສະໜັບສະໜູນບັນດາເຫດການ ໂດຍຫວຽດນາມ ຈັດຕັ້ງ, ພິເສດແມ່ນບັນດາການເຄື່ອນໄຫວສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ ແລະງານວາງສະແດງປ້ອງກັນຊາດສາກົນຫວຽດນາມ ຄັ້ງທີ 2 ເຊິ່ງຈະຈັດຂຶ້ນໃນທ້າຍປີນີ້. ທ່ານພົນໂທ ຮວ່າງຊວນຈ໊ຽນ ໄດ້ເຊື້ອເຊີນ ແລະຫວັງວ່າການນໍາກະຊວງປ້ອງກັນປະເທດກໍາປູເຈຍ ຈະພ້ອມກັບບັນດາວິສາຫະກິດທີ່ມີອິດທິພົນຊື່ສຽງມາເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ ຄັ້ງທີ 2.
ສິ້ນສຸດການເຈລະຈາ, ທ່ານພົນໂທ ຮວ່າງຊວນຈ໊ຽນ ແລະທ່ານພົນເອກ Chay Saing Yun ໄດ້ລົງນາມໃນບົດບັນທຶກການເຈລະຈານະໂຍບາຍດ້ານປ້ອງກັນຊາດ ຫວຽດນາມ-ກໍາປູເຈຍ ຄັ້ງທີ 7.
ໂດຍ: ໄຊນີດາ