ກຳປັ່ນຕໍາຫຼວດທະເລ 8002 ເຂົ້າທຽບທ່າກຳປັ່ນມະນີລາ, ຟີລິບປິນ
ກປ.ອອນໄລ - ຕອນເຊົ້າວັນທີ 5 ສິງຫາ, ກໍາປັ່ນຕໍາຫຼວດທະເລ 8002 (ແມ່ທັບເຮືອ 21, ຕໍາຫຼວດທະເລເຂດ 2) ພ້ອມດ້ວຍຄະນະປະຕິບັດງານຕໍາຫຼວດທະເລຫວຽດນາມ ໂດຍທ່ານພັນເອກ ຮວ່າງກວກດາດ, ຮອງຜູ້ບັນຊາການຕໍາຫຼວດທະເລເຂດ 2 ເປັນຫົວໜ້າຄະນະໄດ້ໄປຮອດທ່າກຳປັ່ນມານີລາ (ຟີລິບປິນ) ເລີ່ມຕົ້ນດຳເນີນການຢ້ຽມຢາມ ແລະພົບປະແລກປ່ຽນກັບກໍາລັງປ້ອງກັນຝັ່ງທະເລຟີລິບປິນ.
ກ່າວຄຳເຫັນທີ່ພິທີຕ້ອນຮັບ, ການນໍາສູນຄົ້ນຄວ້າຍຸດທະວິທີ ແລະການຮ່ວມມືສາກົນ (ກໍາລັງປ້ອງກັນຝັ່ງທະເລຟີລິບປິນ), ເນັ້ນໜັກວ່າ: ການຢ້ຽມຢາມໄດ້ສະແດງໃຫ້ເຫັນການເຂົ້າສູ່ລວງເລິກຂອງການພົວພັນລະຫວ່າງກໍາລັງປ້ອງກັນຝັ່ງທະເລຟີລິບປິນ ກັບຕໍາຫຼວດທະເລຫວຽດນາມ, ປະກອບສ່ວນເພີ່ມທະວີການພົວພັນຮ່ວມມືລະຫວ່າງສອງປະເທດ. ການມີໜ້າຂອງກຳປັ່ນຕໍາຫຼວດທະເລຫວຽດນາມ 8002 ແມ່ນສັນຍາລັກທີ່ເຂັ້ມແຂງໃຫ້ບັນດາເປົ້າໝາຍລວມ, ພິເສດແມ່ນໃນຂົງເຂດຄວາມປອດໄພ, ຄວາມໝັ້ນຄົງໃນການເດີນທະເລ ແລະສະແດງໃຫ້ເຫັນການເປັນສະມາຊິກຢ່າງຕັ້ງໜ້າໃນເວທີປາໄສຕໍາຫຼວດທະເລອາຊຽນ.
    |
 |
|
ຄະນະນາຍທະຫານກໍາລັງປ້ອງກັນຝັ່ງທະເລຟີລິບປິນ ຢ້ຽມຢາມກຳປັ່ນຕໍາຫຼວດທະເລ 8002. ພາບ: qdnd.vn |
ທ່ານພັນເອກ ຮວ່າງກວກດາດ ຢືນຢັນວ່າ ການຢ້ຽມຢາມ ແລະພົບປະແລກປ່ຽນຄັ້ງນີ້ ຈະປະກອບສ່ວນເພີ່ມທະວີສາຍພົວພັນມິດຕະພາບ, ການຮ່ວມມື, ຄວາມເຂົ້າອົກເຂົ້າໃຈ ແລະຄວາມໄວ້ເນື້ອເຊື່ອໃຈເຊິ່ງກັນ ແລະກັນລະຫວ່າງກອງທັບປະຊາຊົນຫວຽດນາມ, ກໍາລັງຕໍາຫຼວດທະເລຫວຽດນາມ ກັບກອງທັບ ແລະກໍາລັງປ້ອງກັນຝັ່ງທະເລຟີລິບປິນ.
ຕາມແຜນການແລ້ວ, ຄະນະປະຕິບັດງານຕໍາຫຼວດທະເລຫວຽດນາມ ຈະເຂົ້າຢ້ຽມຂໍ່ານັບການນໍາກໍາລັງປ້ອງກັນຝັ່ງທະເລຟີລິບປິນ ແລະຢ້ຽມຢາມສໍານັກງານກໍາລັງປ້ອງກັນຝັ່ງທະເລຟີລິບປິນ, ພົບປະແລກປ່ຽນ, ແຂ່ງຂັນກິລາມິດຕະພາບ ແລະຝຶກແອບການຊອກຫາ ກູ້ໄພ, ປ້ອງກັນ, ຕ້ານອັກຄີໄພ, ລະເບີດບົນທະເລກັບກໍາລັງປ້ອງກັນຝັ່ງທະເລຟີລິບປິນ...
ໂດຍ: ທະນາພອນ