ສະຫະປະຊາຊາດ ສົ່ງຈົດໝາຍຊົມເຊີຍກອງຊ່າງແສງຫວຽດນາມ ຢູ່ Abyei
ກປ.ອອນໄລ - ຕອນເຊົ້າວັນທີ 11 ມິຖຸນາ, ໃນຂອບເຂດການຢ້ຽມຢາມຄະນະປະຕິບັດງານຄວາມໝັ້ນຄົງຊົ່ວຄາວຂອງສະຫະປະຊາຊາດ (ສປຊ) ຢູ່ເຂດ Abyei (UNISFA), ທ່ານພົນຕີ ຟ້າມເຈື່ອງເຊີນ, ຮອງຫົວໜ້າກົມໃຫຍ່ເສນາທິການ ກອງທັບປະຊາຊົນຫວຽດນາມ, ຫົວໜ້າຄະນະປະຕິບັດງານລະຫວ່າງຂະແໜງກ່ຽວກັບຫວຽດນາມ ເຂົ້າຮ່ວມການເຄື່ອນໄຫວຮັກສາສັນຕິພາບ ສປຊ ໄດ້ມີການພົບປະກັບທ່ານພົນຈັດຕະວາ Ameer Muhammad Umrani, ຜູ້ຮັກສາການຫົວໜ້າຄະນະປະຕິບັດງານ ທັງເປັນຜູ້ບັນຊາການກຳລັງການທະຫານຄະນະປະຕິບັດງານ UNISFA.
ເນື່ອງໃນໂອກາດນີ້, ທ່ານພົນຈັດຕະວາ Ameer Muhammad Umrani ໄດ້ອ່ານຈົດໝາຍຂອງທ່ານນາງ AnneMarie van den Berg, ຜູ້ຊ່ວຍວຽກເລຂາທິການໃຫຍ່ ສປຊ ກ່ຽວກັບລະບົບຕ່ອງໂສ້ການສະໜອງ ຂຶ້ນກັບກົມໜູນຊ່ວຍການເຄື່ອນໄຫວ, ຊົມເຊີຍກອງຊ່າງແສງ ເລກ 2 ຂອງຫວຽດນາມ ທີ່ປະຕິບັດໜ້າທີ່ຢູ່ເຂດ Abyei ໄດ້ກໍ່ສ້າງສຳເລັດຄ້າຍທະຫານອັດສະລິຍະຢູ່ຖານທັບ Highway, ຄ້າຍທະຫານອັດສະລິຍະທໍາອິດໂດຍກອງຊ່າງແສງການທະຫານກໍ່ສ້າງ.
|
|
ທ່ານພົນຈັດຕະວາ Ameer Muhammad Umrani ແລະທ່ານພົນຕີ ຟ້າມເຈື່ອງເຊີນ ມອບຈົດໝາຍຍ້ອງຍໍຂອງສະຫະປະຊາຊາດເຖິງທ່ານພັນເອກພິເສດ ຫງວຽນຫວຽດຮືງ, ຫົວໜ້າກອງຊ່າງແສງຫວຽດນາມ. ພາບ: ງອກຮືງ. |
ທີ່ການເຮັດວຽກ, ຜູ້ຕາງໜ້າບັນດາອົງການຂອງຄະນະປະຕິບັດງານ UNISFA ໃຫ້ຮູ້ວ່າ: ກອງຊ່າງແສງຫວຽດນາມ ຕ້ອງປະຕິບັດຫຼາຍໜ້າທີ່ພ້ອມກັນໃນເງື່ອນໄຂທີ່ຄະນະປະຕິບັດງານປະສົບກັບຄວາມຫຍຸ້ງຍາກຫຼາຍຢ່າງກ່ຽວກັບບຸກຄະລາກອນ, ພື້ນຖານດ້ານວັດຖຸ, ພາຫະນະອຸປະກອນ ແລະສະພາບດິນຟ້າອາກາດ. ບັນດາການນຳ ແລະຜູ້ບັນຊາການຄະນະປະຕິບັດງານ UNISFA ຕີລາຄາວ່າ ກອງຊ່າງແສງ ແລະບັນດານາຍທະຫານກອງທັບປະຊາຊົນຫວຽດນາມ ໄດ້ສຳເລັດໜ້າທີ່ທີ່ໄດ້ຮັບມອບໝາຍຢ່າງຈົບງາມ.
ທ່ານພົນຕີ ຟ້າມເຈື່ອງເຊີນ ປາດຖະໜາວ່າ ຜູ້ບັນຊາຂອງຄະນະປະຕິບັດງານ UNISFA ສືບຕໍ່ສ້າງເງື່ອນໄຂເພື່ອໃຫ້ບັນດາກໍາລັງຂອງຫວຽດນາມ ເຂົ້າຮ່ວມການເຄື່ອນໄຫວຮັກສາສັນຕິພາບ ສປຊ ປະຕິບັດສໍາເລັດໜ້າທີ່ຂອງຕົນ, ຮັບປະກັນຄວາມປອດໄພຢ່າງເດັດຂາດ, ປະກອບສ່ວນຮັກສາສັນຕິພາບໃນທົ່ວໂລກ ກໍ່ຄືຊີວິດອິ່ມໜຳສຳລານ ແລະຄວາມຜາສຸກຂອງ ປະຊາຊົນຢູ່ເຂດ Abyei.
ໂດຍ: ຈາງຫງວຽນ