ກະຊວງປ້ອງກັນປະເທດຫວຽດນາມ ຊົມເຊີຍວັນຊາດ ສປປ ລາວ

ຕາງໜ້າໃຫ້ການນຳກະຊວງປ້ອງກັນປະເທດ ແລະກົມໃຫຍ່ການເມືອງກອງທັບປະຊາຊົນຫວຽດນາມ, ທ່ານພົນຕີ ເລກວາງມິງ ອວຍພອນ ພະນັກງານ, ລັດຖະກອນຂອງສະຖານທູດ ໃນວັນບຸນໃຫຍ່ຂອງ ປະເທດລາວ. ທ່ານພົນຕີ ເລກວາງມິງ ເຊື່ອໝັ້ນວ່າ, ພາຍໃຕ້ການຊີ້ນຳນຳພາຂອງພັກປະຊາຊົນປະຕິວັດລາວ, ປະເທດລາວ ຈະບັນລຸໄດ້ຜົນງານໃຫຍ່ຫຼວງກວ່າເກົ່າ, ຢືນຢັນຖານະ ແລະບົດບາດໃນພາກພື້ນ ແລະ ສາກົນ.

ຄະນະຜູ້ແທນກະຊວງປ້ອງກັນປະເທດຫວຽດນາມ ມາອວຍພອນສະຖານທູດລາວ ປະຈໍາຫວຽດນາມ ເນື່ອງໃນໂອກາດສະເຫຼີມສະຫຼອງ 48 ປີແຫ່ງວັນຊາດ ສປປ ລາວ. ພາບ: qdnd.vn

ຕາມທ່ານພົນຕີ ເລກວາງມິງ ແລ້ວ, ໃນປີ 2023, ບັນດາອົງການ, ກົມກອງຂອງສອງກະຊວງປ້ອງກັນປະເທດ ໄດ້ສົມທົບກັນຢ່າງແໜ້ນແຟ້ນ, ປະຕິບັດແຜນການຮ່ວມມືປະຈຳປີສຳເລັດຜົນ, ບັນລຸໄດ້ບັນດາເປົ້າໝາຍ ແລະຄວາມຮຽກຮ້ອງຕ້ອງການທີ່ໄດ້ວາງໄວ້. ພົ້ນເດັ່ນແມ່ນວຽກງານໂຄສະນາ; ແລກປ່ຽນຄະນະຜູ້ແທນທຸກຂັ້ນ; ການບໍາລຸງສ້າງ, ຝຶກອົບຮົມພະນັກງານ; ສົມທົບກັນຄຸ້ມຄອງ ແລະປົກປັກຮັກສາຊາຍແດນ... ທ່ານພົນຕີ ເລກວາງມິງ ປາດຖະໜາວ່າ ທ່ານນາງ ຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ຫວຽດນາມ ຈະສະໜັບສະໜູນ, ສົມທົບກັນຢ່າງແໜ້ນແຟ້ນ, ສ້າງເງື່ອນໄຂເພື່ອໃຫ້ບັນດາອົງການທີ່ກ່ຽວຂ້ອງຂອງສອງປະເທດ ຜັນຂະຫຍາຍການເຄື່ອນໄຫວຮ່ວມມືດ້ານປ້ອງກັນຊາດສອງຝ່າຍຢ່າງຮອບດ້ານ ແລະມີປະສິດທິຜົນ, ໃນນັ້ນມີການຈັດຕັ້ງງານພົບປະແລກປ່ຽນມິດຕະພາບປ້ອງກັນຊາດເຂດຊາຍແດນຫວຽດນາມ - ລາວ - ກໍາປູເຈຍ ຄັ້ງທຳອິດ ທີ່ຄາດວ່າຈະດຳເນີນໃນເດືອນທັນວານີ້ ປະສົບຜົນສໍາເລັດ.

ທ່ານນາງ ຄຳເພົາ ເອີນທະວັນ ຕ້ອນຮັບທ່ານພົນຕີ ເລກວາງມິງ. ພາບ: qdnd.vn

ສ່ວນທ່ານນາງ ຄຳເພົາ ເອີນທະວັນ ສະແດງຄວາມຂອບໃຈຕໍ່ຄະນະຜູ້ແທນກະຊວງປ້ອງກັນປະເທດຫວຽດນາມ ທີ່ໄດ້ມາອວຍພອນ, ເບີກບານມວ່ນຊື່ນຮ່ວມກັບສະຖານທູດໃນໂອກາດສະເຫຼີມສະຫຼອງວັນສຳຄັນນີ້. ທ່ານນາງ ຄຳເພົາ ເອີນທະວັນ ຕີລາຄາສູງການຮ່ວມມືຢ່າງແໜ້ນແຟ້ນ ແລະມີຄວາມໝາຍຫຼາຍຢ່າງລະຫວ່າງກະຊວງປ້ອງກັນປະເທດສອງປະເທດ ໃນໄລຍະຜ່ານມາ, ປະກອບສ່ວນສຳຄັນເຂົ້າໃນການປັບປຸງ ແລະຮັດແໜ້ນສາຍພົວພັນມິດຕະພາບ ຫວຽດນາມ - ລາວ .

ທ່ານນາງ ຄຳເພົາ ເອີນທະວັນ ຢືນຢັນວ່າ ຍາມໃດກໍສະໜັບສະໜູນ ແລະພ້ອມແລ້ວທີ່ຈະສົມທົບກັນຢ່າງແໜ້ນແຟ້ນ ເພື່ອໃຫ້ສອງຝ່າຍຜັນຂະຫຍາຍບັນດາການເຄື່ອນໄຫວຮ່ວມມືດ້ານປ້ອງກັນຊາດສອງປະເທດຢ່າງຮອບດ້ານ, ມີປະສິດທິຜົນ, ໃນນັ້ນມີງານພົບປະແລກປ່ຽນມິດຕະພາບປ້ອງກັນຊາດເຂດຊາຍແດນຫວຽດນາມ - ລາວ - ກໍາປູເຈຍ ຄັ້ງທຳອິດ.

ໂດຍ: ທູຈາງ