ທ່ານພົນເອກ ຟານວັນຢາງ ຂອບໃຈທ່ານນາຍົກລັດຖະມົນຕີ Han Duck-soo ໄດ້ສະຫຼະເວລາຕ້ອນຮັບຄະນະ. ເນື່ອງໃນໂອກາດນີ້, ທ່ານພົນເອກ ຟານວັນຢາງ ສົ່ງຄໍາຢ້ຽມຢາມຖາມຂ່າວຂອງທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ເຖິງທ່ານນາຍົກລັດຖະມົນຕີ Han Duck-soo.

ອວຍພອນທ່ານພົນເອກ ຟານວັນຢາງ ມາຢ້ຽມຢາມ ສ ເກົາຫຼີ ຢ່າງເປັນທາງການ ຄັ້ງທໍາອິດ ໃນນາມເປັນລັດຖະມົນຕີກະຊວງປ້ອງກັນປະເທດຫວຽດນາມ, ທ່ານນາຍົກລັດຖະມົນຕີ Han Duck-soo ຖືວ່າ ການຢ້ຽມຢາມມີຄວາມໝາຍພິເສດເມື່ອຫວຽດນາມ ແລະ ສ ເກົາຫຼີຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານ (ເດືອນ ທັນວາ ປີ 2022).

leftcenterrightdel
ທ່ານພົນເອກ ຟານວັນຢາງ ພົບປະກັບທ່ານນາຍົກລັດຖະມົນຕີ ສ ເກົາຫຼີ Han Duck-soo. ພາບ: ງອກຫາ.

ທ່ານ Han Duck-soo ເນັ້ນໜັກວ່າ ສ ເກົາຫຼີ ຖືຫວຽດນາມ ແມ່ນໜຶ່ງໃນບັນດາຄູ່ຮ່ວມມືສໍາຄັນທີ່ສຸດໃນພາກພື້ນ; ປາດຖະໜາຢາກເປີດກວ້າງການຮ່ວມມືກັບຫວຽດນາມ ໃນຫຼາຍຂົງເຂດ ຄື ການທູດ, ເສດຖະກິດ...; ຫວັງວ່າ ສອງປະເທດສືບຕໍ່ເພີ່ມທະວີການຮ່ວມມືດ້ານປ້ອງກັນຊາດ, ໃນນັ້ນມີອຸດສາຫະກໍາປ້ອງກັນຊາດ. ທ່ານ Han Duck-soo ກໍ່ສະເໜີລັດຖະບານຫວຽດນາມ ສະໜັບສະໜູນ ສ ເກົາຫຼີ ເປັນເຈົ້າພາບຈັດງານວາງສະແດງໂລກ Busan Expo 2030.

ກ່າວຄໍາເຫັນທີ່ການພົບປະ, ທ່ານ ຟານວັນຢາງ ແຈ້ງໃຫ້ທ່ານ Han Duck-soo ຊາບກ່ຽວກັບໝາກຜົນອັນດີງາມຂອງການພົບປະເຈລະຈາກັບທ່ານ Lee Jong-sup ລັດຖະມົນຕີກະຊວງປ້ອງກັນປະເທດ ສ ເກົາຫຼີ. ສອງຝ່າຍ ຕີລາຄາໝາກຜົນການຮ່ວມມືດ້ານປ້ອງກັນຊາດໃນໄລຍະຜ່ານມາ ແລະເຫັນດີເປັນເອກະພາບຕໍ່ບັນດາມາດຕະການຍູ້ແຮງການຮ່ວມມືດ້ານປ້ອງກັນຊາດໃນໄລຍະຈະມາເຖິງກວ່າອີກໃຫ້ສົມກັບການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ. ກ່ຽວກັບບັນຫາແກ້ໄຂຜົນຮ້າຍຢ້ອນຫຼັງຈາກສົງຄາມ, ທ່ານພົນເອກ ຟານວັນຢາງ ປາດຖະໜາວ່າ ລັດຖະບານ ແລະອົງການທີ່ກ່ຽວຂ້ອງຂອງ ສ ເກົາຫຼີ ເອົາໃຈໃສ່ໜູນຊ່ວຍຫວຽດນາມ ແກ້ໄຂຜົນຮ້າຍຢ້ອນຫຼັງຈາກສົງຄາມ. ນີ້ແມ່ນບັນຫາມະນຸດສະທໍາທີ່ລັດຖະບານ ແລະປະຊາຊົນຫວຽດນາມ ເອົາໃຈໃສ່ທີ່ສຸດ. ທ່ານພົນເອກ ຟານວັນຢາງ ກໍ່ປາດຖະໜາວ່າ ທ່ານ Han Duck-soo ສືບຕໍ່ເອົາໃຈໃສ່, ສະໜັບສະໜູນເພື່ອໃຫ້ກະຊວງປ້ອງກັນປະເທດສອງປະເທດຮ່ວມມືຢ່າງແທດຈິງ, ມີປະສິດທິຜົນໃນໄລຍະຈະມາເຖິງກວ່າອີກ.

ໃນຂອບເຂດການຢ້ຽມຢາມ, ທ່ານພົນເອກ ຟານວັນຢາງ ໄດ້ໄປຢ້ຽມຢາມກຸ່ມບໍລິສັດ Hanwha, ຢ້ຽມຢາມ ແລະໂອ້ລົມກັບພະນັກງານສະຖານທູດຫວຽດນາມ ປະຈໍາ ສ ເກົາຫຼີ.

ໂດຍ: ຈາງຫງວຽນ