ຫວຽດນາມ-ສ.ເກົາຫຼີ ເຈລະຈານະໂຍບາຍດ້ານປ້ອງກັນຊາດຄັ້ງທີ 9
ກປ.ອອນໄລ - ຕອນບ່າຍວັນທີ 16 ກັນຍາ, ຢູ່ສໍານັກງານກະຊວງປ້ອງກັນປະເທດ, ທ່ານພົນໂທ ຮວ່າງຊວນຈ໊ຽນ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ແລະ ທ່ານ Park Jae Min ຮອງລັດຖະມົນຕີກະຊວງປ້ອງກັນປະເທດສ.ເກົາຫຼີ ໄດ້ເປັນປະທານຮ່ວມການເຈລະຈານະໂຍບາຍປ້ອງກັນຊາດລະຫວ່າງ ຫວຽດນາມ-ສ.ເກົາຫຼີ ຄັ້ງທີ 9.
|
|
ບັນຍາກາດທີ່ການເຈລະຈາ. ພາບ: qdnd.vn. |
ທີ່ການເຈລະຈາ, ສອງຝ່າຍໄດ້ແລກປ່ຽນກ່ຽວກັບບັນຫາສາກົນ, ພາກພື້ນທີ່ຕ່າງຝ່າຍຕ່າງມີຄວາມສົນໃຈ ເພື່ອແນໃສ່ເພີ່ມທະວີຄວາມເຂົ້າໃຈ ແລະຄວາມໄວ້ເນື້ອເຊື່ອໃຈ. ກ່ຽວກັບການຮ່ວມມືດ້ານປ້ອງກັນຊາດສອງຝ່າຍ, ສອງຝ່າຍໄດ້ຕີລາຄາສູງໝາກຜົນການຮ່ວມມືທີ່ບັນລຸໄດ້ນັບແຕ່ການເຈລະຈານະໂຍບາຍປ້ອງກັນຊາດຫວຽດນາມ-ສ.ເກົາຫຼີ ຄັ້ງທີ 8 (ປີ 2019) ໃນທຸກໆຂົງເຂດ, ຄື: ການແລກປ່ຽນຄະນະຜູ້ແທນ, ບໍາລຸງສ້າງພະນັກງານ, ຄວາມໝັ້ນຄົງທາງທະເລ, ແກ້ໄຂຜົນຮ້າຍຢ້ອນຫຼັງຈາກສົງຄາມ... ສອງຝ່າຍເຫັນດີເປັນເອກະພາບວ່າ ໃນໄລຍະຈະມາເຖິງ ຈະສືບຕໍ່ຮັກສາ ແລະເສີມຂະຫຍາຍໝາກຜົນທີ່ບັນລຸໄດ້, ໃນນັ້ນສຸມໃສ່ເພີ່ມທະວີການຮ່ວມມືດ້ານອຸດສາຫະກຳປ້ອງກັນຊາດ, ແກ້ໄຂຜົນຮ້າຍຢ້ອນຫຼັງຈາກສົງຄາມ, ຄວາມໝັ້ນຄົງທາງທະເລ, ເຂົ້າຮ່ວມການເຄື່ອນໄຫວຮັກສາສັນຕິພາບສະຫະປະຊາຊາດ, ການປ້ອງກັນ, ຕ້ານໂລກລະບາດໂຄວິດ-19 ແລະສົມທົບກັນຢູ່ເວທີປາໄສຫຼາຍຝ່າຍ, ໂດຍສະເພາະແມ່ນກົນໄກຮ່ວມມືໂດຍອາຊຽນ ນຳພາ...
ໂດຍ: ທະນາພອນ