ເບລາຣຸດ ເປັນປະເທດທີ່ມີກຳລັງບົ່ມຊ້ອນທາງດ້ານອຸດສາຫະກຳ, ກະສິກຳ, ວິທະຍາສາດ, ການສຶກສາ ແລະປ້ອງກັນຊາດ, ຢືນຢູ່ອັນດັບທີ 3 ໃນບັນດາປະເທດສາທາລະນະລັດສັງກັດໂຊວຽດ ໃນເມື່ອກ່ອນ.

ຫວຽດນາມ ແລະເບລາຣຸດ ໄດ້ສືບທອດສາຍພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຫຼາຍດ້ານອັນດີງາມລະຫວ່າງຫວຽດນາມ ແລະໂຊວຽດ ໃນເມື່ອກ່ອນ. ສອງປະເທດໄດ້ສ້າງຕັ້ງການພົວພັນທາງການທູດຢ່າງເປັນທາງການໃນວັນທີ 24 ມັງກອນ 1992. ຜ່ານຫຼາຍທົດສະວັດ, ການພົວພັນມິດຕະພາບ, ຄວາມສາມັກຄີ ແລະການຮ່ວມມືລະຫວ່າງຫວຽດນາມ ແລະເບລາຣຸດ ຍາມໃດລັດ, ລັດຖະບານ ແລະປະຊາຊົນສອງປະເທດ ກໍ່ໄດ້ເພີ່ມພູນຄູນສ້າງ ແລະພັດທະນາຢ່າງບໍ່ຢຸດຢັ້ງ. ເບລາຣຸດ ຢືນຢັນວ່າ ຍາມໃດກໍ່ຖືການພົວພັນກັບຫວຽດນາມ ເປັນສໍາຄັນ, ຖືວ່າ ຫວຽດນາມ ແມ່ນແບບຢ່າງ ເພື່ອຜ່ານຜ່າໄລຍະຖືກຂວ້ຳບາດ ເພື່ອມີພື້ນຖານເສດຖະກິດພັດທະນາຢ່າງວ່ອງໄວ ແລະແນວທາງພົວພັນຕ່າງປະເທດເອກະລາດ,  ເປັນເຈົ້າຕົນເອງຄືໃນປະຈຸບັນ.

leftcenterrightdel
ທ່ານນາຍົກລັດຖະມົນຕີເບລາຣຸດ Roman Golovchenko ມາຢ້ຽມຢາມຫວຽດນາມ ຢ່າງເປັນທາງການແຕ່ວັນທີ 6 – 9 ທັນວາ. ພາບ: ສໍານັກຂ່າວສານຫວຽດນາມ

ບົນພື້ນຖານນັ້ນ, ໃນໄລຍະຜ່ານມາການພົວພັນຮ່ວມມືລະຫວ່າງ ຫວຽດນາມ - ເບລາຣຸດ ໄດ້ພັດທະນາຢ່າງຕັ້ງໜ້າ, ນຳມາເຊິ່ງໝາກຜົນໃນຫຼາຍຂົງເຂດ. ກ່ຽວກັບດ້ານການເມືອງ ແລະການທູດ, ສອງຝ່າຍໄດ້ຮັກສາການພົບປະແລກປ່ຽນຄະນະຜູ້ແທນຢູ່ທຸກຂັ້ນເປັນປະຈຳ, ພິເສດແມ່ນຂັ້ນສູງ; ຮ່ວມມືຢ່າງແໜ້ນແຟ້ນ ແລະສະໜັບສະໜູນເຊິ່ງກັນ ແລະກັນຢູ່ສະຫະປະຊາຊາດ, ຂະບວນການບໍ່ຮ່ວມກຸ່ມ, ເວທີປາໄສ ແລະອົງການຈັດຕັ້ງສາກົນຕ່າງໆ. ເບລາຣຸດ ສະໜັບສະໜູນຫວຽດນາມ ອອກສະໝັກເຂົ້າສະພາເສດຖະກິດ - ສັງຄົມຂອງສະຫະປະຊາຊາດ, ຄະນະກຳມະການກົດໝາຍສາກົນ, ຄະນະກຳມະການລະຫວ່າງລັດຖະບານກ່ຽວກັບສົນທິສັນຍາວ່າດ້ວຍການຮັກສາມໍລະດົກວັດທະນະທຳນາມມະທໍາ ປີ 2003, ສະພາສິດທິມະນຸດສະຫະປະຊາຊາດ... ຫວຽດນາມ ພ້ອມແລ້ວທີ່ຈະເປັນຂົວຕໍ່ຊ່ວຍໃຫ້ເບລາຣຸດ ປັບປຸງການຮ່ວມມືຫຼາຍດ້ານກັບບັນດາປະເທດສະມາຊິກອາຊຽນ.

ໃນຂົງເຂດການຮ່ວມມືດ້ານເສດຖະກິດ, ການຄ້າ ແລະການລົງທຶນ, ຫວຽດນາມ ແລະເບລາຣຸດ ມີທ່າແຮງບົ່ມຊ້ອນຫຼາຍຢ່າງສາມາດເພີ່ມເຕີມໃຫ້ກັນ. ວົງເງິນການຄ້າສອງຝ່າຍໃນ 9 ເດືອນຕົ້ນປີ 2023 ບັນລຸ 46,42 ລ້ານໂດລາສະຫະລັດ. ປະຈຸບັນ, ເບລາຣຸດ ມີ 3 ໂຄງການລົງທຶນຢູ່ຫວຽດນາມ ດ້ວຍຍອດຈຳນວນທຶນ 32,25 ລ້ານໂດລາສະຫະລັດ, ໃນນັ້ນ ພົ້ນເດັ່ນແມ່ນໂຄງການ ປະກອບລົດໂອໂຕ MAZ Asia ຢູ່ແຂວງ ຮືງອຽນ. ສອງຝ່າຍພວມຕັ້ງໜ້າຜັນຂະຫຍາຍສັນຍາການຄ້າເສລີລະຫວ່າງຫວຽດນາມ ແລະສະຫະພັນເສດຖະກິດເອີລົບ (EAEU), ເຊິ່ງ ເບລາຣຸດ ເປັນສະມາຊິກ.

ການຮ່ວມມືໃນຂົງເຂດປ້ອງກັນຊາດ- ປ້ອງກັນຄວາມສະຫງົບ, ການທ່ອງທ່ຽວ, ວັດທະນະທຳ, ການສຶກສາ - ບໍາລຸງສ້າງ, ການພົບປະແລກປ່ຽນປະຊາຊົນ...  ສອງຝ່າຍກໍ່ໄດ້ສືບຕໍ່ຊຸກຍູ້. ເບລາຣຸດ ໄດ້ຊ່ວຍຫວຽດນາມ ບຳລຸງກໍ່ສ້າງພະນັກງານ ແລະນັກຊ່ຽວຊານທີ່ມີລະດັບວິຊາການສູງຫຼາຍຄົນ. ສອງຝ່າຍໄດ້ສ້າງຕັ້ງສະມາຄົມມິດຕະພາບສາມັກຄີ, ຜ່ານນັ້ນ ຄວາມເຂົ້າໃຈ ແລະການແບ່ງປັນລະຫວ່າງປະຊາຊົນສອງປະເທດ ຈະນັບມື້ນັບໄດ້ຮັບການປັບປຸງ ແລະພັດທະນາ.

ການຢ້ຽມຢາມຫວຽດນາມ ຂອງທ່ານນາຍົກລັດຖະມົນຕີ Roman Golovchenko ໄດ້ຢືນຢັນນະໂຍບາຍຂອງ ເບລາຣຸດ ທີ່ເອົາໃຈໃສ່ ແລະປາດຖະໜາຢາກເພີ່ມທະວີການພົວພັນກັບຫວຽດນາມ. ການຢ້ຽມຢາມກໍ່ສະແດງໃຫ້ເຫັນການຖືເປັນສໍາຄັນຂອງ ຫວຽດນາມ ຕໍ່ການພົວພັນກັບປະເທດເພື່ອນມິດທີ່ເປັນມູນເຊື້ອຂອງໂຊວຽດ ໃນເມື່ອກ່ອນ, ໃນນັ້ນມີ ເບລາຣຸດ, ພ້ອມກັນນັ້ນກໍ່ຢືນຢັນແນວທາງພົວພັນຕ່າງປະເທດຂອງຫວຽດນາມ ເປັນເອກະລາດ, ເປັນເຈົ້າຕົນເອງ, ສັນຕິພາບ, ການຮ່ວມມື ແລະພັດທະນາ, ຫັນເປັນຫຼາຍຮູບຫຼາຍແບບ, ຫຼາຍຝ່າຍ, ສືບຕໍ່ນໍາ ການພົວພັນເຂົ້າສູ່ລວງເລິກຕາມເນື້ອໃນຈິດໃຈຂອງກອງປະຊຸມໃຫຍ່ຄັ້ງທີ XIII ຂອງພັກ. ບົນພື້ນຖານນັ້ນ, ພວກຂ້າພະເຈົ້າເຊື່ອໝັ້ນວ່າ ການຢ້ຽມຢາມ ຫວຽດນາມ ຂອງທ່ານນາຍົກລັດຖະມົນຕີ ເບລາຣຸດ Roman Golovchenko ຈະປະສົບຜົນສຳເລັດຢ່າງຈົບງາມ, ສ້າງພື້ນຖານຊຸກຍູ້ການພົວພັນ ສອງຝ່າຍໃຫ້ເຂົ້າສູ່ລວງເລິກ, ແທດຈິງ ແລະມີປະສິດທິຜົນ.

ໂດຍ: ທະນາພອນ