ອາເມລິກາ ຈະສົມທົບຢ່າງແໜ້ນແຟ້ນກັບຫວຽດນາມ ເພື່ອຮັບປະກັນປີ APEC 2027 ບັນລຸຜົນສຳເລັດ
ໃນຂອບເຂດການໄປປະຕິບັດງານຢູ່ອາເມລິກາ ເຂົ້າຮ່ວມຮອບເຈລະຈາ ຄັ້ງທີ 6 ສັນຍາການຄ້າຕອບໂຕ້ ຫວຽດນາມ - ອາເມລິກາ ແຕ່ວັນທີ 2-6 ກຸມພາ, ທ່ານນາງ ຫງວຽນມິງຮັ່ງ, ຮອງລັດຖະມົນຕີກະຊວງການຕ່າງປະເທດຫວຽດນາມ ໄດ້ມີການເຮັດວຽກກັບທ່ານນາງ Allison Hooker, ຮອງລັດຖະມົນຕີການຕ່າງປະເທດ ອາເມລິກາ, ທ່ານ Casey Mace, ຫົວໜ້າເຈົ້າໜ້າທີ່ຂັ້ນສູງ APEC ອາເມລິກາ, ທ່ານ Charles Freeman, ຮອງປະທານຫ້ອງການຄ້າອາເມລິກາ ແລະການນຳສູນແຫ່ງຊາດອາເມລິກາ ກ່ຽວກັບ APEC.
ທີ່ການເຮັດວຽກກັບທ່ານນາງ Allison Hooker ຮອງລັດຖະມົນຕີການຕ່າງປະເທດອາເມລິກາ, ທ່ານນາງ ຫງວຽນມິງຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ ຢືນຢັນວ່າ ຫວຽດນາມ ຖືເປັນສໍາຄັນການພົວພັນຄູ່ຮ່ວມມືຍຸດທະສາດຮອບດ້ານກັບອາເມລິກາ ແລະ ປາດຖະໜາຢາກໃຫ້ສອງປະເທດຮັກສາການເຄື່ອນໄຫວພົບປະຂັ້ນສູງຢ່າງເປັນປະຈຳ, ເພີ່ມທະວີການຮ່ວມມືໃນທຸກຂົງເຂດ, ພິເສດແມ່ນໃນຂົງເຂດເສດຖະກິດ, ການຄ້າ, ການລົງທຶນ, ວິທະຍາສາດ - ເຕັກໂນໂລຢີ, ນະວັດຕະກໍາ. ທ່ານນາງ ຫງວຽນມິງຮັ່ງ ເນັ້ນໜັກວ່າ ການເປັນເຈົ້າພາບຈັດຕັ້ງປີ APEC 2027 ແມ່ນການເຄື່ອນໄຫວພົວພັນຕ່າງປະເທດຫຼາຍຝ່າຍສໍາຄັນແຖວໜ້າຂອງຫວຽດນາມ ໃນໄລຍະຈະມາເຖິງ; ຫວຽດນາມ ໄດ້ ແລະກໍາລັງຕັ້ງໜ້າຜັນຂະຫຍາຍວຽກງານກະກຽມໃນທຸກຂົງເຂດ.
    |
 |
|
ທ່ານນາງ ຫງວຽນມິງຮັ່ງ, ຮອງລັດຖະມົນຕີກະຊວງການຕ່າງປະເທດຫວຽດນາມ ເຮັດວຽກກັບທ່ານນາງ Allison Hooker, ຮອງລັດຖະມົນຕີການຕ່າງປະເທດອາເມລິກາ. ພາບ: vov.vn |
ສ່ວນທ່ານນາງ Allison Hooker ຮອງລັດຖະມົນຕີການຕ່າງປະເທດອາເມລິກາ ປາດຖະໜາຢາກ ການພົວພັນລະຫວ່າງສອງປະເທດຈະສືບຕໍ່ພັດທະນາຢ່າງຕັ້ງໜ້າ, ໃນນັ້ນມີການບັນລຸໄດ້ສັນຍາການຄ້າຕອບໂຕ້ດຸ່ນດ່ຽງ ແລະຍຸຕິທໍາ, ຜ່ານນັ້ນສ້າງພື້ນຖານຊຸກຍູ້ການພົວພັນລະຫວ່າງສອງປະເທດໃນຂົງເຂດຕ່າງໆ. ທ່ານນາງ Allison Hooker ໄດ້ຕີລາຄາສູງບົດບາດ ແລະອິດທິພົນຊື່ສຽງຂອງຫວຽດນາມ ໃນເລື່ອງເປັນຄັ້ງທີ 3 ທີ່ເປັນເຈົ້າພາບຈັດຕັ້ງປີ APEC, ຮັບຮູ້ຈິດໃຈເປັນເຈົ້າການ, ຕັ້ງໜ້າຂອງຫວຽດນາມ ໃນວຽກງານກະກຽມໃຫ້ປີ APEC 2027; ທ່ານນາງ Allison Hooker ຢືນຢັນວ່າ ອາເມລິກາ ຈະສົມທົບຢ່າງແໜ້ນແຟ້ນກັບຫວຽດນາມ ເພື່ອຮັບປະກັນໃຫ້ປີ APEC 2027 ບັນລຸຜົນສຳເລັດ.
ໂດຍ: ທູຈາງ