ຂຸດຄົ້ນຄວາມສາມາດບົ່ມຊ້ອນຮ່ວມມືອັນໃຫຍ່ຫຼວງໃຫ້ມີປະສິດທິຜົນ
ຕອນເຊົ້າວັນທີ 5 ພຶດສະພາ, ຢູ່ສຳນັກງານປະທານປະເທດ, ທ່ານ ເລືອງເກື່ອງ ປະທານປະເທດຫວຽດນາມ ເປັນປະທານພິທີຕ້ອນຮັບທ່ານປະທານາທິບໍດີ Anura Kumara Dissanayaka ພ້ອມດ້ວຍຄະນະຜູ້ແທນຂັ້ນສູງ ສີລັງກາ. ພາຍຫຼັງພິທີຕ້ອນຮັບ, ທ່ານ ເລືອງເກື່ອງ ແລະທ່ານປະທານາທິບໍດີ ສີລັງກາ ໄດ້ດຳເນີນການພົບປະເຈລະຈາ.
ສອງຝ່າຍເຫັນດີເປັນເອກະພາບຖືວ່າ, ຄວາມໄວ້ເນື້ອເຊື່ອໃຈດ້ານການເມືອງສູງ, ນ້ຳໃຈມິດຕະພາບອົບອຸ່ນ, ການສະໜັບສະໜູນຢ່າງສຸດຈິດສຸດໃຈລະຫວ່າງສອງປະເທດ ແລະເລື່ອງສອງປະເທດແບ່ງປັນວິໄສທັດ, ທັດສະນະລວມແມ່ນພື້ນຖານເພື່ອນຳການພົວພັນສອງປະເທດພັດທະນາຂຶ້ນລະດັບສູງໃໝ່. ບົນຈິດໃຈດັ່ງກ່າວ, ສອງປະເທດເຫັນດີເປັນເອກະພາບປັບປຸງນ້ຳໃຈມິດຕະພາບທີ່ເປັນມູນເຊື້ອ ແລະຄວາມເຂົ້າອົກເຂົ້າໃຈກັນຢ່າງບໍ່ຢຸດຢັ້ງ, ຊຸກຍູ້ການຢ້ຽມຢາມຂັ້ນສູງ, ຂັ້ນຕ່າງໆເປັນປະຈຳກວ່າ, ເພີ່ມທະວີ ການຮ່ວມມືລະຫວ່າງສອງພັກກຳອຳນາດ, ພົບປະແລກປ່ຽນລະຫວ່າງບັນດາອົງການຈັດຕັ້ງປະຊາຊົນ, ສະມາຄົມສາມັກຄີມິດຕະພາບຂອງສອງປະເທດ; ຍົກສູງປະສິດທິຜົນບັນດາກົນໄກຮ່ວມມື, ພິເສດແມ່ນຄະນະກຳມະການປະສົມກ່ຽວກັບການຮ່ວມມືເສດຖະກິດ, ການຄ້າ, ວິທະຍາສາດເຕັກນິກເພື່ອກວດກາຄືນ ແລະວາງອອກມາດຕະການຮ່ວມມືລະອຽດ; ປັບປຸງ, ເພີ່ມເຕີມ, ຊຸກຍູ້ການເຊັນຂໍ້ຕົກລົງຮ່ວມມືທີ່ເໝາະສົມກັບສະຖານະການໃໝ່, ຄົ້ນຄວ້າການຍົກລະດັບການພົວພັນເມື່ອມີເງື່ອນໄຂຄົບຖ້ວນ ແລະທັງສອງຝ່າຍເຫັນດີເຫັນພ້ອມ.
    |
 |
|
ທ່ານ ເລືອງເກື່ອງ ປະທານປະເທດຫວຽດນາມ ແລະທ່ານ Anura Kumara Dissanayaka ປະທານາທິບໍດີ ສີລັງກາ. ພາບ: ທ໊າຍຮຶງ |
ສອງຝ່າຍເຫັນດີຕົກລົງຊຸກຍູ້ການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ, ຕຸລາການແທດຈິງກວ່າ, ສົ່ງເສີມເພີ່ມທະວີການແລກປ່ຽນ, ພົບປະແລກປ່ຽນ, ເປີດກວ້າງການຮ່ວມມືບຳລຸງສ້າງ, ຍົກສູງຄວາມສາມາດ, ປະສານສົມທົບໃນການປ້ອງກັນ ແລະຕ້ານອາດຊະຍາກຳຂ້າມຊາດ, ປະຕິບັດກົດໝາຍ, ພິຈາລະນາເຊັນຂໍ້ຕົກລົງຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ, ຕຸລາການ.
ການນຳສອງທ່ານເຫັນດີເປັນເອກະພາບວ່າ ໃນສະພາບການໂລກ, ພາກພື້ນມີການຜັນແປສັບສົນຫຼາຍຢ່າງ, ສອງປະເທດຈະສືບຕໍ່ມູນເຊື້ອປະສານສົມທົບກັນຢ່າງແໜ້ນແຟ້ນ ແລະສະໜັບສະໜູນກັນຢູ່ບັນດາອົງການຈັດຕັ້ງສາກົນ ແລະພາກພື້ນ, ໂດຍສະເພາະ ແມ່ນຢູ່ສະຫະປະຊາຊາດ, ຂະບວນການບໍ່ຮ່ວມກຸ່ມ, ຮ່ວມມືໃຕ້-ໃຕ້ ກໍ່ຄືໃນບັນຫາທີ່ຕ່າງຝ່າຍຕ່າງມີຄວາມສົນໃຈ. ສອງຝ່າຍຢັ້ງຢືນຄືນໃໝ່ຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ ແລະຄວາມເສລີໃນການເດີນທະເລ, ພ້ອມທັງເນັ້ນໜັກເຖິງຄວາມສຳຄັນຂອງການເຄົາລົບ ແລະປະຕິບັດຕາມກົດໝາຍສາກົນ, ພິເສດແມ່ນສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ ປີ 1982 (UNCLOS 1982). ທ່ານ ເລືອງເກື່ອງ ຊົມເຊີຍ ສີລັງກາ ເພີ່ມທະວີການພົວພັນ, ຮ່ວມມືແທດຈິງກັບບັນດາປະເທດ ອາຊີຕາເວັນອອກສ່ຽງໃຕ້ ແລະອາຊຽນ ກວ່າອີກ.
ສີລັງກາ ປາດຖະໜາຢາກຮຽນເອົາບົດຮຽນພັດທະນາຂອງຫວຽດນາມ
ຕອນບ່າຍວັນທີ 5 ພຶດສະພາ, ຢູ່ສຳນັກງານນາຍົກລັດຖະມົນຕີ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ພົບປະກັບທ່ານ Anura Kumara Dissanayaka ປະທານາທິບໍດີສີລັງກາ.
ທີ່ການພົບປະ, ທ່ານ Anura Kumara Dissanayaka ຢັ້ງຢືນວ່າ ລັດຖະບານ ແລະປະຊາຊົນ ສີລັງກາ ຍາມໃດກໍ່ຖືຫວຽດນາມ ແມ່ນແຫຼ່ງບັນດານໃຈ, ໃຫ້ກຳລັງໃຈເພື່ອໃຫ້ ສີລັງກາ ສືບຕໍ່ຊອກຫາເສັ້ນທາງເໝາະສົມເພື່ອນຳປະເທດຜ່ານຜ່າຄວາມຫຍຸ້ງຍາກ, ນັບມື້ນັບພັດທະນາກ້າວຂຶ້ນ. ທ່ານປະທານາທິບໍດີ ຕີລາຄາສູງ ຫວຽດນາມ ແມ່ນຮູບແບບພັດທະນາເສດຖະກິດປະສົບຜົນສຳເລັດ, ແມ່ນໜຶ່ງໃນບັນດາປະເທດທີ່ມີລະດັບການພັດທະນາເສດຖະກິດໄວທີ່ສຸດໃນໂລກ, ກາຍເປັນສູນການຜະລິດ, ນະວັດຕະກຳ, ດຶງດູດການລົງທຶນຕ່າງປະເທດ; ສະແດງຄວາມປາດຖະໜາຢາກຮຽນເອົາບັນດາບົດຮຽນນີ້ຈາກຫວຽດນາມ.
ໃນບັນຍາກາດໄມຕີຈິດມິດຕະພາບ ແລະໄວ້ເນື້ອເຊື່ອໃຈ, ທ່ານ ຟ້າມມິງຈິ໊ງ ໄດ້ແບ່ງປັນບັນດາການກຳນົດທິດຍຸດທະສາດ, ເປົ້າໝາຍ, ມາດຕະການ, ບົດຮຽນປະສົບການຂອງ ຫວຽດນາມ ໃນການພັດທະນາເສດຖະກິດ, ປ່ຽນແປງໃໝ່ຮູບແບບການເຕີບໂຕ, ພັດທະນາວິທະຍາສາດ ແລະເຕັກໂນໂລຢີ, ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ. ທ່ານປະທານາທິບໍດີ ສີລັງກາ ຕີລາຄາສູງການແບ່ງປັນຂອງທ່ານນາຍົກລັດຖະມົນຕີ ຟ້າມມິງຈິ໊ງ ແລະປາດຖະໜາຢາກສອງຝ່າຍສືບຕໍ່ແບ່ງປັນ, ແລກປ່ຽນບົດ ຮຽນໃນໄລຍະຈະມາເຖິງ.
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະກັບທ່ານ Anura Kumara Dissanayaka ປະທານາທິບໍດີສີລັງກາ. ພາບ: ທ໊າຍຮຶງ |
ທ່ານປະທານາທິບໍດີ ສີລັງກາ ເຫັນດີເປັນເອກະພາບສ້າງເງື່ອນໄຂສະດວກໃຫ້ແກ່ວິສາຫະກິດຫວຽດນາມ ສົ່ງອອກສິນຄ້າທີ່ ສີລັງກາ ມີຄວາມຕ້ອງການ ແລະຫວຽດນາມ ມີທ່າແຮງ; ມີນະໂຍບາຍບຸລິມະສິດໃຫ້ນັກລົງທຶນຫວຽດນາມ ມາ ສີລັງກາ ລົງທຶນບັນດາໂຄງການຈຸດສຸມ.
ການນຳສອງທ່ານກໍ່ເຫັນດີເປີດກວ້າງການຮ່ວມມືການຫັນປ່ຽນດີຈີຕອນ, ຫັນປ່ຽນສີຂຽວ, ພັດທະນາກະສີກຳເຕັກໂນໂລຢີສູງ, ເພີ່ມທະວີການຮ່ວມມືດ້ານວິທະຍາສາດ ແລະເຕັກໂນໂລຢີ, ໂດຍສະເພາະແມ່ນເຕັກໂນໂລຢີໃໝ່.
ການນຳສອງທ່ານຕີລາຄາສູງເລື່ອງ ຫວຽດນາມ ແລະສີລັງກາ ແບ່ງປັນຫຼາຍທັດສະນະລວມກ່ຽວກັບບັນຫາພາກພື້ນ ແລະສາກົນ ແລະເຫັນດີເປັນເອກະພາບຖືວ່າ ໃນສະພາບການພາກພື້ນ ແລະໂລກຜັນແປຫຼາຍຢ່າງຄືປະຈຸບັນ, ສອງປະເທດຄວນເພີ່ມທະວີການຮ່ວມມື, ສະໜັບສະໜູນກັນ, ກາຍເປັນເພື່ອນມິດສະໜິດສະໜົມ ແລະໄວ້ເນື້ອເຊື່ອໃຈຢູ່ບັນດາເວທີປາໄສຫຼາຍຝ່າຍພາກພື້ນ ແລະສາກົນ.
ເພີ່ມທະວີການຮ່ວມມືລັດຖະສະພາ
ກໍ່ໃນຕອນບ່າຍວັນທີ 5 ພຶດສະພາ, ຢູ່ຫໍສະພາແຫ່ງຊາດ, ທ່ານ ເຈິ່ນແທັງເໝີນ ປະທານສະພາແຫ່ງຊາດຫວຽດນາມ ພົບປະກັບທ່ານ Anura Kumara Dissanayaka ປະທານາທິບໍດີ ສີລັງກາ.
ທີ່ການພົບປະ, ທ່ານ ເຈິ່ນແທັງເໝີນ ເນັ້ນໜັກວ່າ ການພົວພັນມິດຕະພາບທີ່ເປັນມູນເຊື້ອລະຫວ່າງຫວຽດນາມ ແລະສີລັງກາ ພັດທະນາຢ່າງບໍ່ຢຸດຢັ້ງໃນຕະຫຼອດ 55 ປີຜ່ານມານັບແຕ່ເມື່ອສອງປະເທດສ້າງຕັ້ງການພົວພັນທາງການທູດ, ໃນນັ້ນການຮ່ວມມື ລະຫວ່າງລັດຖະສະພາສອງປະເທດປະກອບສ່ວນຢ່າງຕັ້ງໜ້າເຂົ້າຜົນງານລວມ, ທັງແງ່ມູມສອງຝ່າຍ ແລະທີ່ບັນດາເວທີປາໄສລັດຖະສະພາຫຼາຍຝ່າຍ; ຢັ້ງຢືນວ່າ ສະພາແຫ່ງຊາດຫວຽດນາມ ຕີລາຄາສູງການຮ່ວມມືລະຫວ່າງສອງອົງການນິຕິບັນຍັດຂອງສອງປະເທດໃນໄລຍະຜ່ານມາ; ຊົມເຊີຍເລື່ອງສະພາແຫ່ງຊາດ ສີລັງກາ ໄດ້ສ້າງຕັ້ງກຸ່ມສະມາຊິກລັດຖະສະພາມິດຕະພາບ ສີລັງກາ-ຫວຽດນາມ ແລະປາດຖະໜາຢາກສອງຝ່າຍເຊັນບົດບັນທຶກຮ່ວມມືລະຫວ່າງສອງສະພາແຫ່ງຊາດ, ຜ່ານນັ້ນຊຸກຍູ້ການພົບປະຂັ້ນສູງ, ແລກປ່ຽນບົດຮຽນນິຕິກຳ ແລະຕິດຕາມກວດກາ, ປະກອບສ່ວນສ້າງເງື່ອນໄຂສະດວກໃຫ້ການພັດທະນາເສດຖະກິດ-ສັງຄົມຂອງແຕ່ລະປະເທດ.
|
|
 |
|
ທ່ານ ເຈິ່ນແທັງເໝີນ ປະທານສະພາແຫ່ງຊາດຫວຽດນາມ ແລະທ່ານປະທານາທິບໍດີ Anura Kumara Dissanayaka. ພາບ: ທ໊າຍຮຶງ |
ທ່ານປະທານາທິບໍດີ ສີລັງກາ ເຫັນດີເປັນເອກະພາບຕໍ່ການສະເໜີຂອງທ່ານປະທານສະພາແຫ່ງຊາດຫວຽດນາມ, ເນັ້ນໜັກວ່າ ສະພາແຫ່ງຊາດສອງປະເທດມີບົດບາດສຳຄັນໃນການຊຸກຍູ້ການຮ່ວມມືແທດຈິງ, ມີປະສິດທິຜົນ, ພິເສດແມ່ນໃນຂົງເຂດ ເຊິ່ງສອງ ຝ່າຍມີທ່າແຮງ ແລະປະສານສົມທົບແກ້ໄຂບັນຫາພາກພື້ນ, ສາກົນທີ່ຕ່າງຝ່າຍຕ່າງມີຄວາມສົນໃຈ. ທ່ານປະທານາທິບໍດີ ຕີລາຄາສູງບົດບາດຂອງກຸ່ມສະມາຊິກລັດຖະສະພາມິດຕະພາບ ສີລັງກາ-ຫວຽດນາມ ແລະບັນດາສະມາຄົມມິດຕະພາບລະຫວ່າງສອງ ປະເທດ; ສະເໜີສອງຝ່າຍເພີ່ມທະວີການແລກປ່ຽນຄະນະ, ແບ່ງປັນບົດຮຽນໃນການປະສານສົມທົບລະຫວ່າງລັດຖະບານ ແລະສະພາແຫ່ງຊາດ, ວຽກງານລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ເພີ່ມທະວີການຮ່ວມມືດ້ານເສດຖະກິດ, ການຄ້າ, ການລົງທຶນ; ເຊື່ອມຕໍ່ເສດຖະກິດ.
ສອງຝ່າຍກໍ່ເຫັນດີເປັນເອກະພາບສືບຕໍ່ສົມທົບກັນຢ່າງແໜ້ນແຟ້ນ ແລະສະໜັບສະໜູນກັນຢູ່ບັນດາເວທີປາໄສພາກພື້ນ, ສາກົນ; ເພີ່ມທະວີການແບ່ງປັນຂໍ້ມູນ, ປະສານສົມທົບຫຼັກໝັ້ນໃນບັນຫາພາກພື້ນ, ສາກົນທີ່ຕ່າງຝ່າຍຕ່າງມີຄວາມສົນໃຈ.
ໂດຍ: ແສງເດືອນ