ນັກຂ່າວ: ຂໍຮຽນທ່ານເອກອັກຄະລັດຖະທູດ, ການຢ້ຽມຢາມທາງລັດຖະກິດເຖິງ ອິນໂດເນເຊຍ ຂອງທ່ານເລຂາທິການໃຫຍ່ ໂຕເລິມ ໃນຄັ້ງນີ້ມີຄວາມໝາຍຄືແນວໃດຕໍ່ກັບການພົວພັນຮ່ວມມືລະຫວ່າງສອງປະເທດ?

ທ່ານເອກອັກຄະລັດຖະທູດ ຕ້າວັນທົງ: ການຢ້ຽມຢາມທາງລັດຖະກິດເຖິງອິນໂດເນເຊຍ ຂອງທ່ານເລຂາທິການໃຫຍ່ ໂຕເລິມ ແລະພັນລະຍາ ໂງເຟືອງລີ ມີຄວາມໝາຍປະຫວັດສາດສຳຄັນສຳລັບການພົວພັນສອງປະເທດ.

ການຢ້ຽມຢາມໄດ້ດຳເນີນໄປໃນສະພາບການທີ່ການພົວພັນຄູ່ຮ່ວມມືຍຸດທະສາດ ຫວຽດນາມ-ອິນໂດເນເຊຍ ພັດທະນາຢ່າງແຂງແຮງ, ຮອບດ້ານ ແລະໝັ້ນແກ່ນໃນທຸກຂົງເຂດ, ນັບແຕ່ດ້ານການເມືອງ, ການທູດ, ການປ້ອງກັນຊາດ-ປ້ອງກັນຄວາມສະຫງົບເຖິງເສດຖະກິດ, ການທ່ອງທ່ຽວ, ວັດທະນະທຳ ແລະການພົບປະແລກປ່ຽນປະຊາຊົນ. ການນຳຂັ້ນສູງຂອງສອງປະເທດໄດ້ໄປຢ້ຽມຢາມເຊິ່ງກັນ ແລະກັນ  ກໍ່ຄືພົບປະຢູ່ນອກກອງປະຊຸມຫຼາຍຝ່າຍເປັນປະຈໍາ.

ໃນສະພາບການນັ້ນ, ການຢ້ຽມຢາມອິນໂດເນເຊຍ ຂອງທ່ານເລຂາທິການໃຫຍ່ ໂຕເລິມ ຈະແມ່ນກຳລັງໜູນສຳຄັນເພື່ອໃຫ້ສອງຝ່າຍປັບປຸງຄວາມເຂົ້າໃຈ ແລະຄວາມໄວ້ເນື້ອເຊື່ອໃຈດ້ານການເມືອງເຊິ່ງກັນ ແລະກັນ ໂດຍຜ່ານການພົບປະ ແລະການພົບປະຂັ້ນສູງ, ສ້າງພື້ນຖານການເມືອງອັນສຳຄັນເພື່ອເພີ່ມທະວີການພົວພັນສອງປະເທດຢູ່ໃນຊ່ອງທາງພັກ, ລັດຖະບານ, ສະພາແຫ່ງຊາດ, ທ້ອງຖິ່ນ ແລະການພົບປະແລກປ່ຽນປະຊາຊົນ.

ດ້ວຍຄວາມຕັດສິນໃຈນຳການພົວພັນສອງປະເທດຂຶ້ນສູ່ລະດັບສູງໃໝ່, ຄາດວ່າໃນການຢ້ຽມຢາມ, ການນຳສອງປະເທດຈະແລກປ່ຽນກ່ຽວກັບວິໄສທັດຍຸດທະສາດ ເພື່ອພັດທະນາການພົວພັນສອງຝ່າຍ, ບັນດາມາດຕະການຊຸກຍູ້ການຮ່ວມມືຫຼາຍດ້ານ, ພິເສດແມ່ນໃນຂົງເຂດໃໝ່, ຄື: ພະລັງງານສີຂຽວ, ກະສິກຳເຕັກໂນໂລຢີສູງ, ການຮ່ວມມືພົບປະແລກປ່ຽນວັດທະນະທຳ, ການສຶກສາ, ພັດທະນາການທ່ອງທ່ຽວ...

leftcenterrightdel
ທ່ານ ຕ້າວັນທົງ ເອກອັກຄະລັດຖະທູດຫວຽດນາມ ປະຈໍາ ອິນໂດເນເຊຍ. ພາບ: ສໍານັກຂ່າວສານຫວຽດນາມ

ນັກຂ່າວ: ປີຜ່ານມາ, ວົງເງິນການຄ້າລະຫວ່າງສອງປະເທດບັນລຸລະດັບສູງທີ່ສຸດນັບແຕ່ກ່ອນມາຮອດປະຈຸບັນແມ່ນກວ່າ 16 ຕື້ໂດລາສະຫະລັດ, ສະນັ້ນສອງຝ່າຍຕ້ອງເຮັດແນວໃດເພື່ອບັນລຸໄດ້ເປົ້າໝາຍ 18 ຕື້ໂດລາສະຫະລັດ ໃນປີ 2028, ຂໍຮຽນທ່ານເອກອັກຄະລັດຖະທູດ?

ທ່ານເອກອັກຄະລັດຖະທູດ ຕ້າວັນທົງ: ການພົວພັນ ຫວຽດນາມ-ອິນໂດເນເຊຍ ສືບຕໍ່ບັນລຸໄດ້ໝາກຜົນຕັ້ງໜ້າຫຼາຍຢ່າງໃນທຸກຂົງເຂດ, ໃນນັ້ນການຮ່ວມມືດ້ານການຄ້າ ແລະການລົງທຶນແມ່ນຈຸດພົ້ນເດັ່ນ. ປີ 2024, ອິນໂດເນເຊຍ ໄດ້ມີ 123 ໂຄງການລົງທຶນເຂົ້າຫວຽດນາມ ດ້ວຍຍອດຈຳນວນທຶນຈົດທະບຽນ 682,3 ລ້ານໂດລາສະຫະລັດ, ຢືນອັນດັບທີ 29 ໃນຈຳນວນ 143 ປະເທດທີ່ລົງທຶນເຂົ້າຫວຽດນາມ. ບັນດາກຸ່ມບໍລິສັດຂອງອິນໂດເນເຊຍ, ຄື: Ciputra, Traveloka, Vietmindo Energitama, Jafpa Comfeed Vietnam, Semen ອິນໂດເນເຊຍ Group, ໄດ້ມີໜ້າຢູ່ຫວຽດນາມ. ໃນຂະນະນັ້ນ, ບັນດາກຸ່ມບໍລິສັດຫວຽດນາມ, ຄື: FPT, Vinfast, Era Blue, Sunhouse ພວມຜັນຂະຫຍາຍບັນດາໂຄງການລົງທຶນດຳເນີນທຸລະກິດຢູ່ ອິນໂດເນເຊຍ.

ຫວຽດນາມ ແລະອິນໂດເນເຊຍ ລ້ວນແຕ່ແມ່ນພື້ນຖານເສດຖະກິດພັດທະນາຢ່າງວ່ອງໄວ. ອິນໂດເນເຊຍ ມີພື້ນຖານເສດຖະກິດໃຫຍ່ອັນດັບທີ 16 ໃນໂລກ, ແມ່ນຕະຫຼາດໃຫຍ່ທີ່ສຸດຂອງອາຊີຕາເວັນອອກສ່ຽງໃຕ້, ນອນໃນກຸ່ມ 10 ປະເທດການຜະລິດໃຫຍ່ທີ່ສຸດໃນໂລກ. ສອງປະເທດມີທ່າແຮງມີລັກສະນະຍຸດທະສາດຄວນກຳໄດ້ເພື່ອຂຸດຄົ້ນກາລະໂອກາດຮ່ວມມື, ແກ້ໄຂຄວາມຫຍຸ້ງຍາກ, ຂໍ້ຕິດຂັດ. ຜ່ານນັ້ນວິສາຫະກິດສອງປະເທດຈະມີເງື່ອນໄຂສະດວກກວ່າເພື່ອເຂົ້າເຖິງຕະຫຼາດຂອງກັນໄດ້ດີທີ່ສຸດ, ພິເສດໃນບັນດາຂົງເຂດຮ່ວມມືໃໝ່ຍັງມີຄວາມສາມາດບົ່ມຊ້ອນຫຼາຍຢ່າງ, ຄື: ອຸດສາຫະກຳ Halal, ເສດຖະກິດດີຈີຕອນ, ເສດຖະກິດສີຂຽວ, ການຫັນເປັນສີຂຽວ ແລະການພັດທະນາລະບົບຊີວະພາບລົດໄຟຟ້າ.

ດ້ວຍພື້ນຖານອັນໝັ້ນແກ່ນຂອງການພົວພັນ ແລະຄວາມມານະພະຍາຍາມຢ່າງບໍ່ຢຸດຢັ້ງໃນຂຸດຄົ້ນຄວາມສາມາດບົ່ມຊ້ອນຂອງທັງສອງຝ່າຍ, ຂ້າພະເຈົ້າ ເຊື່ອໝັ້ນວ່າ ສອງປະເທດຈະສາມາດບັນລຸໄດ້ເປົ້າໝາຍນຳວົງເງິນການຄ້າສອງຝ່າຍ 18 ຕື້ໂດລາສະຫະລັດໃນປີ 2028.

ນັກຂ່າວ: ຕາມທ່ານເອກອັກຄະລັດຖະທູດ ແລ້ວ, ການເຄື່ອນໄຫວຮ່ວມມືທ້ອງຖິ່ນ ແລະການພົບປະແລກປ່ຽນລະຫວ່າງຫວຽດນາມ ແລະອິນໂດເນເຊຍ ມີຄວາມໝາຍຄືແນວໃດໃນການເພີ່ມທະວີຄວາມເຂົ້າໃຈລະຫວ່າງປະຊາຊົນສອງປະເທດ ແລະຊຸກຍູ້ການພົວພັນຮ່ວມມືລະຫວ່າງສອງຝ່າຍ?

ທ່ານເອກອັກຄະລັດຖະທູດ ຕ້າວັນທົງ: ການພົວພັນພົບປະແລກປ່ຽນປະຊາຊົນໃນໄລຍະຜ່ານມາໄດ້ມີຄວາມກ້າວໜ້າພໍສົມຄວນ, ສວມບົດບາດຕັ້ງໜ້າ, ເປັນຂົວຕໍ່ຢ່າງມີປະສິດທິຜົນເພື່ອຊ່ວຍຊຸກຍູ້ເພີ່ມທະວີຄວາມເຂົ້າໃຈລະຫວ່າງປະຊາຊົນສອງປະເທດ, ປະກອບສ່ວນເຂົ້າໃນການພັດທະນາການພົວພັນຮອບດ້ານ ຫວຽດນາມ-ອິນໂດເນເຊຍ. ໃນນັ້ນເປັນໜ້າເອົາໃຈໃສ່ແມ່ນການເຕີບໂຕຢ່າງແຂງແຮງຂອງການທ່ອງທ່ຽວພາຍຫຼັງ Vietnam Airlines ແລະ VietJet Air ເປີດຖ້ຽວບິນໂດຍກົງເຊື່ອມຕໍ່ບັນດາສະຖານທີ່ລະຫວ່າງຮ່າໂນ້ຍ, ນະຄອນໂຮ່ຈີມິນ ແລະຈາກາຕາ, ບາລີ. ນີ້ແມ່ນໝາກຜົນເປັນໜ້າສົ່ງເສີມເພື່ອໃນໄລຍະຈະມາເຖິງ, ສອງປະເທດສືບຕໍ່ເສີມຂະຫຍາຍຄວາມສາມາດບົ່ມຊ້ອນກ່ຽວກັບການທ່ອງທ່ຽວ, ການຮ່ວມມືເພີ່ມເຕີມໃຫ້ກັນຜ່ານຜະລິດຕະພັນທ່ອງທ່ຽວຮ່ວມສໍາພັນການທ່ອງທ່ຽວ, ໂຄສະນາ, ເພີ່ມທະວີຄວາມເຂົ້າໃຈກ່ຽວກັບປະຫວັດສາດ, ມູນເຊື້ອ ແລະວັດທະນະທຳຂອງກັນ.

ຄຽງຂ້າງນັ້ນ, ເພີ່ມທະວີການພົບປະແລກປ່ຽນວັດທະນະທຳ, ອາຫານການກິນ, ການຮ່ວມມືດ້ານການສຶກສາກໍ່ຄືມີບົດບາດສຳຄັນ, ຜ່ານການເຄື່ອນໄຫວ, ຄື: ແລກປ່ຽນຄະນະສິລະປະ, ທ້ອງຖິ່ນ, ພັດທະນາເຄື່ອງໝາຍການຄ້າຂອງຜະລິດຕະພັນຫວຽດນາມ... ໃນໄລຍະຈະມາເຖິງ, ສອງຝ່າຍກໍ່ຈະພິຈາລະນາຊຸກຍູ້ເພື່ອໃຫ້ອິນໂດເນເຊຍ ກາຍເປັນໜຶ່ງໃນບັນດາສະຖານທີ່ເລືອກເຟັ້ນກວ່າຂອງນັກສຶກສາຫວຽດນາມ ຢູ່ອາຊີຕາເວັນອອກສ່ຽງໃຕ້, ສະໜອງທຶນການສຶກສາໃຫ້ນັກສຶກສາສອງຝ່າຍໄປຮໍ່າຮຽນ, ບຳລຸງວິຊາຊີບຢູ່ແຕ່ລະປະເທດ.

ນັກຂ່າວ: ນອກຈາກການພົວພັນສອງຝ່າຍແລ້ວ, ຫວຽດນາມ ແລະອິນໂດເນເຊຍ ລ້ວນແຕ່ແມ່ນສະມາຊິກທີ່ຕັ້ງໜ້າຂອງອາຊຽນ, ສະນັ້ນ, ສອງປະເທດມີແຜນການຮ່ວມມືຄືແນວໃດໃນຂອບເຂດອາຊຽນເພື່ອຊຸກຍູ້ເປົ້າໝາຍລວມຂອງພາກພື້ນ?

ທ່ານເອກອັກຄະລັດຖະທູດ ຕ້າວັນທົງ: ເສີມຂະຫຍາຍການພົວພັນທີ່ເປັນມູນເຊື້ອ, ມິດຕະພາບ ແລະສະໜິດຕິດພັນ, ຫວຽດນາມ ແລະອິນໂດເນເຊຍ ລ້ວນແຕ່ແມ່ນສະມາຊິກທີ່ຕັ້ງໜ້າຂອງອາຊຽນ ແລະມີບົດບາດ, ທີ່ຕັ້ງອັນແນ່ນອນໃນອາຊຽນ. ສອງປະເທດຖືເປັນສຳຄັນການຮ່ວມມືໃນຂອບເຂດອາຊຽນ ຜ່ານການເພີ່ມທະວີຄວາມເປັນເອກະພາບ, ສົມທົບລະຫວ່າງສອງປະເທດຢູ່ບັນດາອົງການ ແລະເວທີປາໄສຫຼາຍຝ່າຍ, ປະກອບສ່ວນເຂົ້າໃນການປັບປຸງຄວາມສາມັກຄີ ແລະບົດບາດໃຈກາງຂອງອາຊຽນ, ຮັກສາສັນຕິພາບ, ສະຖຽນລະພາບ, ການຮ່ວມມື ແລະພັດທະນາຢູ່ພາກພື້ນ ກໍ່ຄືໃນໂລກ. ສອງປະເທດກໍ່ສົມທົບກັນຢ່າງຕັ້ງໜ້າເພື່ອຜັນຂະຫຍາຍໂຄງການດໍາເນີນງານຂອງແຕ່ລະປະເທດໃນອາຍຸການອິນໂດເນເຊຍ ດຳລົງຕຳແໜ່ງເປັນປະທານອາຊຽນໃນປີ 2023 ແລະຫວຽດນາມ ຮັກສາບົດບາດນີ້ໃນປີ 2020. ອິນໂດເນເຊຍ ກໍ່ຕີລາຄາຂໍ້ລິເລີ່ມຂອງຫວຽດນາມ ໃນການຈັດຕັ້ງເວທີປາໄສອາຊຽນໃນອະນາຄົດ.

ປີ 2025 ກໍ່ແມ່ນປີສະເຫຼີມສະຫຼອງ 30 ປີແຫ່ງວັນຫວຽດນາມ ເຂົ້າເປັນສະມາຊິກອາຊຽນ (1995-2025). ເນື່ອງໃນໂອກາດນີ້, ໃນຂອບເຂດການຢ້ຽມຢາມອິນໂດເນເຊຍຂອງທ່ານເລຂາທິການໃຫຍ່ ໂຕເລິມ, ຄາດວ່າຈະມີການເຄື່ອນໄຫວຫຼາຍຢ່າງເພື່ອສະເຫຼີມສະຫຼອງເຫດການສຳຄັນນີ້, ໄດ້ສະແດງໃຫ້ເຫັນນະໂຍບາຍສະເໝີຕົ້ນສະເໝີປາຍຂອງຫວຽດນາມ ຖືເປັນສໍາຄັນການຮ່ວມມືໃນອາຊຽນ ເວົ້າລວມ ແລະການຮ່ວມມືລະຫວ່າງສອງປະເທດໃນອາຊຽນ ເວົ້າສະເພາະ.

ນັກຂ່າວ: ຂໍຂອບໃຈທ່ານ!.

ໂດຍ: ເຈິ່ນຮວ່ຽນ