ຫວຽດນາມ ຍາມໃດກໍ່ຖືເປັນສຳຄັນໃນການຮັກສາ ແລະປັບປຸງການພົວພັນກັບ ບຸນກາຣີ
ຕີລາຄາສູງຕໍ່ໝາກຜົນທີ່ດີງາມຂອງການການພົບປະລະຫວ່າງທ່ານປະທານາທິບໍດີ ບຸນກາຣີ ກັບການນຳຫວຽດນາມ ແລະບັນດາບາດກ້າວພັດທະນາຢ່າງຕັ້ງໜ້າໃນການພົວພັນຫວຽດນາມ-ບຸນກາຣີ, ທ່ານ ໂຕເລິມ ໄດ້ແລກປ່ຽນກັບ ທ່ານ Rumen Radev ກ່ຽວກັບທິດທາງ, ມາດຕະການເພື່ອແນໃສ່ຊຸກຍູ້, ນຳການພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດຂຶ້ນສູ່ລະດັບສູງໃໝ່, ເພີ່ມທະວີການຮ່ວມມືຮອບດ້ານ, ພິເສດແມ່ນໃນຂົງເຂດທີ່ ບຸນກາຣີ ມີທ່າແຮງ ແລະຫວຽດນາມ ມີຄວາມຕ້ອງການ...
    |
 |
|
ທ່ານເລຂາທິການໃຫຍ່ ໂຕເລີມ ຕ້ອນຮັບທ່ານ Rumen Radev ປະທານາທິບໍດີແຫ່ງ ບຸນກາຣີ. ພາບ: ດັງຄວາ |
ທ່ານ Rumen Radev ຢັ້ງຢືນວ່າ ບຸນກາຣີ ຍາມໃດກໍ່ເຄົາລົບການພົວພັນທີ່ເປັນມູນເຊື້ອອັນດີງາມລະຫວ່າງສອງປະເທດ, ຖືຫວຽດນາມ ແມ່ນຄູ່ຮ່ວມມືແຖວໜ້າຂອງ ບຸນກາຣີ ຢູ່ອາຊີຕາເວັນອອກສ່ຽງໃຕ້; ຖືການຮ່ວມມືລະຫວ່າງບັນດາພັກການເມືອງຂອງ ບຸນກາຣີ ຕໍ່ກັບພັກກອມມູນິດຫວຽດນາມ ແມ່ນຊ່ອງທາງສຳຄັນເພື່ອປັບປຸງ ແລະຊຸກຍູ້ການພົວພັນສອງຝ່າຍ. ແບ່ງປັນການຕີລາຄາຂອງທ່ານເລຂາທິການໃຫຍ່ ກ່ຽວກັບບາດກ້າວພັດທະນາຕັ້ງໜ້າຂອງການພົວພັນສອງປະເທດ ໃນໄລຍະຜ່ານມາ, ທ່ານປະທານາທິບໍດີ ເຫັນດີເປັນເອກະພາບຕໍ່ກັບມາດຕະການໃຫຍ່ ເພື່ອຊຸກຍູ້ການພົວພັນສອງປະເທດໃຫ້ເຂົ້າສູ່ລວງເລິກ ແລະມີປະສິດທິຜົນກວ່າອີກ.
ຄວາມຕັດສິນໃຈເພີ່ມທະວີການຮ່ວມມື, ຍົກສູງການພົວພັນຫວຽດນາມ - ບຸນກາຣີ
ກ່ອນໜ້ານັ້ນ, ຕອນເຊົ້າວັນທີ 25 ພະຈິກ, ຢູ່ທຳນຽບປະທານປະເທດ, ທ່ານ ເລືອງເກື່ອງ ປະທານປະເທດຫວຽດນາມ ແລະພັນລະຍາ ໄດ້ເປັນປະທານພິທີຕ້ອນຮັບທ່ານ Rumen Radev ປະທານາທິບໍດີ ບຸນກາຣີ ແລະພັນລະຍາທີ່ມາຢ້ຽມຢາມຫວຽດນາມ ຢ່າງເປັນທາງການໃນລະຫວ່າງວັນທີ 24-28 ພະຈິກ. ພາຍຫຼັງພິທີຕ້ອນຮັບ ແລະພົບປະສ່ວນຕົວ, ທ່ານ ເລືອງເກື່ອງ ປະທານປະເທດຫວຽດນາມ ໄດ້ພົບປະກັບທ່ານ Rumen Radev ປະທານາທິບໍດີ ບຸນກາຣີ.
|
|
 |
|
ທ່ານ ເລືອງເກື່ອງ ປະທານປະເທດຫວຽດນາມ ເປັນປະທານພິທີຕ້ອນຮັບທ່ານ Rumen Radev ປະທານາທິບໍດີແຫ່ງ ບຸນກາຣີ. ພາບ: ຫວຽດຈູງ |
ທີ່ການພົບປະ, ໃນບັນຍາກາດທີ່ເຕັມໄປດ້ວຍຄວາມຈິງໃຈ, ໄວ້ເນື້ອເຊື່ອໃຈ ແລະເປີດອົກເປີດໃຈ, ສອງຝ່າຍໄດ້ແລກປ່ຽນຢ່າງເລິກເຊິ່ງກວ້າງຂວາງກ່ຽວກັບການກຳນົດທິດໃຫຍ່ ແລະມາດຕະການລະອຽດ ເພື່ອແນໃສ່ເພີ່ມທະວີການຮ່ວມມື ແລະຍົກລະດັບການພົວພັນໃນໄລຍະຈະມາເຖິງ.
ກ່ຽວກັບດ້ານການເມືອງ-ການພົວພັນຕ່າງປະເທດ, ສອງຝ່າຍໄດ້ເຫັນດີເປັນເອກະພາບສຶບຕໍ່ເພີ່ມທະວີການພົບປະ ແລະການແລກປ່ຽນຄະນະຜູ້ແທນທຸກຂັ້ນ, ໂດຍສະເພາະແມ່ນຂັ້ນສູງ, ໃນທຸກຊ່ອງທາງພັກ, ລັດ, ລັດຖະບານ, ສະພາແຫ່ງຊາດ ແລະການພົບປະແລກປ່ຽນປະຊາຊົນ ເພື່ອແນໃສ່ປັບປຸງຄວາມໄວ້ເນື້ອເຊື່ອໃຈດ້ານການເມືອງ ແລະຄວາມເຂົ້າອົກເຂົ້າໃຈກັນກວ່າອີກ, ເພື່ອເປັນພື້ນຖານເປີດກວ້າງການຮ່ວມມືສອງຝ່າຍໃນທຸກຂົງເຂດ.
ດ້ານການຄ້າ-ການລົງທຶນ, ປະມຸກລັດສອງທ່ານຢັ້ງຢືນວ່າ ນີ້ແມ່ນເສົາຄ້ຳສຳຄັນໃນການພົວພັນສອງຝ່າຍ; ເຫັນດີເປັນເອກະພາບເສີມຂະຫຍາຍກົນໄກຮ່ວມມືທີ່ມີຢູ່, ຄື: ຄະນະກຳມະການລະຫວ່າງລັດຖະບານກ່ຽວກັບການຮ່ວມມືເສດຖະກິດ ແລະວິທະຍາສາດ-ເຕັກນິກ; ສົ່ງເສີມບັນດາກະຊວງ, ຂະແໜງການ, ທ້ອງຖິ່ນ ແລະວິສາຫະກິດສອງປະເທດ ສືບຕໍ່ຜັນຂະຫຍາຍປະສິດທິຜົນຂອງສັນຍາການຄ້າເສລີ ຫວຽດນາມ-ອີຢູ (EVFTA); ເຫັນດີເປັນເອກະພາບເພີ່ມທະວີການຮ່ວມມືລົງທຶນໃນທຸກຂົງເຂດທີ່ມີທ່າແຮງຂອງບຸນກາຣີ, ຄື: ເຕັກໂນໂລຢີຂໍ້ມູນຂ່າວສານ, ອຸດສາຫະກຳສຳຮອງ... ທ່ານປະທານາທິບໍດີ ໃຫ້ຮູ້ວ່າ ການຄ້າ-ການລົງທຶນ ກໍ່ແມ່ນໜຶ່ງໃນບັນດາຈຸດປະສົງຕົ້ນຕໍຂອງການຢ້ຽມຢາມຄັ້ງນີ້, ຕິດຕາມນຳຄະນະຍັງມີວິສາຫະກິດຂະໜາດໃຫຍ່ຫຼາຍແຫ່ງຂອງບຸນກາຣີ ແລະປາດຖະໜາວ່າ ຈະມີບາດກ້າວເດີນຢ່າງແທດຈິງໃນໄລຍະຈະມາເຖິງ.
|
|
 |
|
ບັນຍາກາດທີ່ການເຈລະຈາລະຫວ່າງທ່ານ ເລືອງເກື່ອງ ປະທານປະເທດຫວຽດນາມ ແລະທ່ານ Rumen Radev ປະທານາທິບໍດີແຫ່ງ ບຸນກາຣີ. ພາບ: ຫວຽດຈູງ |
ເຫັນດີຕໍ່ການສະເໜີຂອງທ່ານ ເລືອງເກື່ອງ, ທ່ານ Rumen Radev ຢັ້ງຢືນວ່າ ສອງປະເທດຄວນຍູ້ແຮງການຮ່ວມມືທີ່ມີປະສິດທິຜົນໃນຂົງເຂດທີ່ເປັນມູນ ເຊື້ອ, ຄື: ການປ້ອງກັນຊາດ, ປ້ອງກັນຄວາມສະຫງົບ, ການສຶກສາ-ກໍ່ສ້າງ, ວິທະຍາສາດ-ເຕັກໂນໂລຢີ, ກະສິກຳ, ວັດທະນະທຳ-ກິລາ, ທ່ອງທ່ຽວ ແລະພົບປະແລກປ່ຽນປະຊາຊົນ, ພ້ອມທັງຊຸກຍູ້ເປີດກວ້າງການຮ່ວມມືໃນຂົງເຂດໃໝ່, ຄື: ການຫັນປ່ຽນດີຈີຕອນ, ເຕັກໂນໂລຢີຂໍ້ມູນຂ່າວສານ, ປຸງແຕ່ງແຮ່ທາດ, ສິ່ງແວດລ້ອມ...
ການນຳສອງທ່ານຢັ້ງຢືນວ່າ ສອງປະເທດຈະສືບຕໍ່ສົມທົບກັນຢ່າງແໜ້ນແຟ້ນ, ແບ່ງປັນບົດຮຽນ ແລະສະໜັບສະໜູນກັນຢູ່ບັນດາເວທີປາໄສຫຼາຍຝ່າຍ, ພິເສດແມ່ນຢູ່ສະຫະປະຊາຊາດ, ໃນຂອບເຂດອາຊຽນ-ອີຢູ, ປະກອບສ່ວນຮ່ວມແຮງຮ່ວມໃຈແກ້ໄຂສິ່ງທ້າທາຍໃນທົ່ວໂລກ.
ເມື່ອແລກປ່ຽນກ່ຽວກັບບັນຫາພາກພື້ນ ແລະສາກົນທີ່ຕ່າງຝ່າຍຕ່າງມີຄວາມສົນໃຈ, ໃນນັ້ນມີບັນຫາທະເລຕາເວັນອອກ, ສອງຝ່າຍເຫັນດີ ໂດຍຖືວ່າ ບັນດາຂໍ້ຂັດແຍ່ງ ແລະການປະທະກັນຢູ່ໃນໂລກຄວນແກ້ໄຂໂດຍສັນຕິວິທີ, ບົນພື້ນຖານຫຼັກການພື້ນຖານຂອງກົດບັດສະຫະປະຊາຊາດ ແລະກົດໝາຍສາກົນ, ພິເສດແມ່ນກົດບັດຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) ປີ 1982, ປະກອບສ່ວນຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນເຮືອ ແລະການບິນຢູ່ພາກພື້ນ ແລະໃນໂລກ, ເພື່ອການຮ່ວມມື ແລະວັດທະນາຖາວອນລວມໃນທົ່ວໂລກ.
* ຕອນບ່າຍວັນທີ 25 ພະຈິກ, ຢູ່ສໍານັກງານລັດຖະບານ, ທ່ານ ຟ້າມມິງຈິ໊ງ ນາຍົກລັດ ຖະມົນຕີຫວຽດນາມ ໄດ້ພົບປະທ່ານ Rumen Radev ປະທານາທິບໍດີແຫ່ງບຸນກາຣີ.
ການນຳສອງທ່ານໄດ້ສະແດງຄວາມພາກພູມໃຈຕໍ່ການພັດທະນາຢ່າງຕັ້ງໜ້າຂອງການພົວພັນຫວຽດນາມ-ບຸນກາຣີ ໃນຫຼາຍຂົງເຂດ; ສອງຝ່າຍໄດ້ແລກປ່ຽນຄະນະຜູ້ແທນທຸກຂັ້ນ; ການຮ່ວມມືການຄ້າ-ການລົງທຶນ ມີຄວາມກ້າວໜ້າ ແຕ່ວ່າຍັງບໍ່ທັນສົມກັບການພົວພັນດ້ານການເມືອງທີ່ດີງາມ.
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະທ່ານ Rumen Radev ປະທານາທິບໍດີແຫ່ງ ບຸນກາຣີ. ພາບ: ຫວຽດຈູງ |
ທ່ານ Rumen Radev ປະທານາທິບໍດີບຸນກາຣີ ເຫັນດີຕໍ່ກັບການສະເໜີຂອງທ່ານ ຟ້າມມິງຈິ໊ງ ກ່ຽວກັບ 6 ກຸ່ມມາດຕະການຮ່ວມມືທີ່ຄວນເພີ່ມທະວີ, ລວມມີ: ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງຜ່ານການສືບຕໍ່ຍູ້ແຮງການແລກປ່ຽນຄະນະຜູ້ແທນ, ຜ່ານນັ້ນຊຸກຍູ້ການຮ່ວມມືໃນບັນດາຂົງເຂດ; ບຸນກາຣີ ສືບຕໍ່ສະໜັບສະໜູນຫຼັກໝັ້ນຂອງອາຊຽນ ແລະຫວຽດນາມ ກ່ຽວກັບທະເລຕາເວັນອອກ ບົນພື້ນຖານເຄົາລົບກົດໝາຍສາກົນ, UNCLOS ປີ 1982, ແກ້ໄຂຂໍ້ຂັດແຍ່ງໂດຍສັນຕິວິທີ, ປະກອບສ່ວນຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມເສລີໃນການເດີນເຮືອຢູ່ພາກພື້ນ; ເພີ່ມທະວີການຮ່ວມມືດ້ານການຄ້າ-ການລົງທຶນ, ສູ້ຊົນຍົກວົງເງິນການຄ້າສອງປະ ເທດຂຶ້ນລະດັບ 500 ລ້ານໂດລາສະຫະລັດ ໃນໄລຍະຈະມາເຖິງ; ເພີ່ມທະວີການຮ່ວມືດ້ານການສຶກສາ ເຊິ່ງເປັນຂົງເຂດຮ່ວມມືທີ່ເປັນມູນເຊື້ອລະຫວ່າງສອງປະເທດ; ເພີ່ມທະວີການຮ່ວມມືດ້ານແຮງງານ; ເພີ່ມທະວີການປະສານສົມທົບ, ສະໜັບສະໜູນກັນຢູ່ບັນດາເວທີປາໄສພາກພື້ນ ແລະສາກົນ, ຄື: ສະຫະປະຊາຊາດ, ອາເຊັມ, ຂອບເຂດອາຊຽນ-ອີຢູ; ເພີ່ມທະວີການພົບປະແລກປ່ຽນປະຊາຊົນ, ສົມທົບກັນຈັດຕັ້ງບັນດາກິດຈະກຳສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດລະຫວ່າງສອງປະເທດໃນປີ 2025.
ເຮັດໃຫ້ການພົວພັນລະຫວ່າງສະພາແຫ່ງຊາດສອງປະເທດເລິກເຊິ່ງກວ່າອີກ
ຕອນບ່າຍວັນທີ 25 ພະຈິກ, ຢູ່ຫໍສະພາແຫ່ງຊາດ, ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ໄດ້ພົບປະທ່ານ Rumen Radev ປະທານາທິບໍດີແຫ່ງ ບຸນກາຣີ.
ທ່ານ ເຈິ່ນແທັງເໝິນ ຢັ້ງຢືນວ່າ ສະພາແຫ່ງຊາດຫວຽດນາມ ສະໜັບສະໜູນການພັດທະນາການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືໃນທຸກຂົງເຂດລະຫວ່າງ ຫວຽດນາມ ແລະບຸນກາຣີ, ທ່ານປະທານສະພາແຫ່ງຊາດ ປາດຖະໜາຢາກສອງປະເທດເພີ່ມທະວີການພົວພັນຮ່ວມມືໃນຊ່ອງທາງພັກ, ລັດຖະບານ ແລະສະພາແຫ່ງຊາດ ກວ່າອີກ. ທ່ານປະທານສະພາແຫ່ງຊາດ ສະເໜີທ່ານປະທານາທິບໍດີ ສະໜັບສະໜູນສະພາແຫ່ງຊາດ ສອງປະເທດຮັກສາການແລກປ່ຽນຄະນະຜູ້ແທນທຸກຂັ້ນ, ຂັ້ນກຳມາທິການ, ພົບປະແລກປ່ຽນ, ພົບປະລະຫວ່າງກຸ່ມສະມາຊິກລັດຖະສະພາ, ສະມາຊິກລັດຖະສະພາໜຸ່ມ, ສະມາຊິກລັດຖະສະພາຍິງ; ປະສານສົມທົບໃນການຕິດຕາມ ແລະຊຸກຍູ້ການປະຕິບັດບັນດາຂໍ້ຕົກລົງລະຫວ່າງລັດຖະບານສອງຝ່າຍໃຫ້ມີປະສິດທິຜົນ; ຮັກສາການພົບປະ, ປຶກສາຫາລື, ປະສານສົມທົບ ແລະສະໜັບສະໜູນກັນຢູ່ບັນດາເວທີປາໄສລັດຖະສະພາຫຼາຍຝ່າຍ ກໍ່ຄືໃນບັນຫາພາກພື້ນ ແລະໂລກ ທີ່ຕ່າງຝ່າຍຕ່າງມີຄວາມສົນໃຈ.
|
|
 |
|
ທ່ານ ເຈິ່ນແທັງເໝີນ ປະທານສະພາແຫ່ງຊາດຫວຽດນາມ ແລະທ່ານ Rumen Radev ປະທານາທິບໍດີແຫ່ງ ບຸນກາຣີ. ພາບ: ຫວຽດຈູງ |
ທ່ານ Rumen Radev ສະແດງຄວາມຂອບໃຈຕໍ່ການສະໜັບສະໜູນຄວາມຕັ້ງໜ້າຂອງສະພາແຫ່ງຊາດຫວຽດນາມ ຕໍ່ກັບການພົວພັນຮ່ວມມື ບຸນກາຣີ-ຫວຽດນາມ ເວົ້າລວມ ກໍ່ຄືການພົວພັນຮ່ວມມືລະຫວ່າງສະພາແຫ່ງຊາດສອງປະເທດເວົ້າສະເພາະ; ເຊື່ອໝັ້ນວ່າ ການສະໜັບສະໜູນ ແລະການຮ່ວມມືຢ່າງແໜ້ນແຟ້ນຂອງສະພາແຫ່ງຊາດສອງປະເທດ ຈະສ້າງກອບນິຕິກຳເພື່ອປັບປຸງ, ເພີ່ມທະວີ ແລະເຮັດໃຫ້ການພົວພັນຮ່ວມມືລະຫວ່າງບຸນກາຣີ ແລະຫວຽດນາມ ໃນໄລຍະຈະມາເຖິງເລິກເຊິ່ງກວ່າອີກ.
ຍົກໃຫ້ເຫັນຄວາມສາມາດບົ່ມຊ້ອນ, ທ່າແຮງຂອງການຮ່ວມມືລະຫວ່າງສອງປະເທດຍັງໃຫຍ່ຫຼວງຢູ່, ທ່ານ Rumen Radev ເຊື່ອໝັ້ນວ່າ ໝາກຜົນຂອງການຢ້ຽມຢາມຄັ້ງນີ້ ຈະສ້າງກຳລັງໜູນໃໝ່ເຂົ້າໃນການພົວພັນລະຫວ່າງສອງປະເທດ.
ໂດຍ: ແສງເດືອນ