ສະເຫຼີມສະຫຼອງ 80 ປີແຫ່ງວັນຊາດທີ 2 ກັນຍາ ຢູ່ອົດສະຕາລີ

ຫວ່າງແລ້ວນີ້, ສະຖານກົງສຸນໃຫຍ່ຫວຽດນາມ ປະຈຳ Sydney (ອົດສະຕາລີ) ໄດ້ຈັດພິທີສະເຫຼີມສະຫຼອງ 80 ປີແຫ່ງວັນຊາດ ສສ ຫວຽດນາມ (2-9-1945 / 2-9-2025).

ເຂົ້າຮ່ວມ ແລະກ່າວຄໍາເຫັນທີ່ພິທີ, ທ່ານພົນໂທ ເລເຕີ໊ນເຕີຍ, ປະທານຄະນະກໍາມາທິການປ້ອງກັນຊາດ, ປ້ອງກັນຄວາມສະຫງົບ ແລະການພົວພັນຕ່າງປະເທດຂອງສະພາແຫ່ງຊາດ ສະແດງຄວາມພາກພູມໃຈຕໍ່ກັບປະເທດຫວຽດນາມ ສັນຕິພາບ, ສະຖຽນລະພາບ, ຂະຫຍັນຂັນເຄື່ອນ ແລະມີຫົວຄິດປະດິດສ້າງ; ແມ່ນສະມາຊິກທີ່ຕັ້ງໜ້າ, ມີຄວາມຮັບຜິດຊອບຂອງປະຊາຄົມສາກົນ, ປະກອບສ່ວນສ້າງສະພາບແວດລ້ອມສາກົນແຫ່ງສັນຕິພາບ, ສະຖຽນລະພາບ, ການຮ່ວມມື ແລະພັດທະນາ; ແມ່ນປະເທດທີ່ກໍາລັງຫັນຄວາມມຸ່ງມາດປາດຖະໜາຈະເລີນຮຸ່ງເຮືອງ, ສັນຕິພາບ ຄຽງຂ້າງບັນດາປະເທດມະຫາອຳນາດໂລກໃຫ້ປະກົດຜົນເປັນຈິງ.

ທ່ານພົນໂທ ເລເຕີ໊ນເຕີຍ ປະທານຄະນະກໍາມາທິການປ້ອງກັນຊາດ, ປ້ອງກັນຄວາມສະຫງົບ ແລະການພົວພັນຕ່າງປະເທດຂອງສະພາແຫ່ງຊາດ. ພາບ: vov.vn

ເພື່ອບັນລຸໄດ້ຜົນງານດັ່ງກ່າວ, ທ່ານພົນໂທ ເລເຕີ໊ນເຕີຍ ຢືນຢັນວ່າ ຫວຽດນາມ ໄດ້ຮັບການຊ່ວຍເຫຼືອອັນລ້ຳຄ່າຈາກເພື່ອນມິດສາກົນ, ໃນນັ້ນມີ ອົດສະຕາລີ. ການພົວພັນທີ່ນັບມື້ນັບສະໜິດສະໜົມລະຫວ່າງຫວຽດນາມ ແລະອົດສະຕາລີ ໄດ້ສະແດງໃຫ້ເຫັນທັດສະນະ, ລັກສະນະຮອບດ້ານ, ຍຸດທະສາດຂອງການພົວພັນລະຫວ່າງສອງປະເທດ, ກວມເອົາຫຼາຍຂົງເຂດ, ຄື: ການເມືອງ, ການຄ້າ - ການລົງທຶນ, ການສຶກສາ ແລະບຳລຸງສ້າງ, ການປ້ອງກັນຊາດ-ປ້ອງກັນຄວາມສະຫງົບ, ການຕ້ານອາດຊະຍາກຳຂ້າມຊາດ, ຕ້ານການຄ້າມະນຸດ ແລະການເຄື່ອນຍ້າຍທີ່ຜິດກົດໝາຍ... ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ ແມ່ນບາດລ້ຽວທີ່ຊ່ວຍເປີດກວ້າງການຮ່ວມມືລະຫວ່າງສອງປະເທດໃນຂົງເຂດຂອງຍຸກສະໄໝເຊັ່ນ: ຕ້ານການປ່ຽນແປງຂອງດິນຟ້າອາກາດ, ປົກປັກຮັກສາສິ່ງແວດລ້ອມ ແລະຫັນປ່ຽນພະລັງງານ, ຫັນປ່ຽນດີຈີຕອນ ແລະນະວັດຕະກໍາ, ສະແດງຢ່າງຈະແຈ້ງລະດັບຄວາມໄວ້ເນື້ອເຊື່ອໃຈຍຸດທະສາດເລິກເຊິ່ງກວ້າງຂວາງຂອງສອງປະເທດ.

ເຂົ້າຮ່ວມພິທີ, ທ່ານ Benjamin Franklin, ປະທານສະພາສູງລັດ New South Wales ໃຫ້ຂໍ້ສັງເກດວ່າ, ໃນເຄິ່ງສະຕະວັດນັບແຕ່ສ້າງຕັ້ງການພົວພັນທາງການທູດ, ສາຍພົວພັນທີ່ສະໜິດຕິດພັນລະຫວ່າງຫວຽດນາມ ກັບອົດສະຕາລີ ບໍ່ພຽງແຕ່ມີລັກສະນະຍຸດທະສາດ ຫຼື ທາງການທູດເທົ່ານັ້ນ, ຫາກຍັງມີລັກສະນະມະນຸດສະທຳອັນເລິກເຊິ່ງ.

ໂດຍ: ໄຊນີດາ