ນັກຂ່າວ: ສະເໜີທ່ານນາງຮອງລັດຖະມົນຕີ ໃຫ້ຮູ້ກ່ຽວກັບຈຸດປະສົງ, ຄວາມໝາຍ ແລະຄວາມສຳຄັນຂອງການໄປປະຕິບັດງານຄັ້ງນີ້ຂອງທ່ານ ເລືອງເກື່ອງ ປະທານປະເທດຫວຽດນາມ?

ທ່ານນາງ ຫງວຽນມິງຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ: ນີ້ແມ່ນການໄປປະຕິບັດງານຕ່າງປະເທດເປັນຄັ້ງທຳອິດຂອງທ່ານ ເລືອງເກື່ອງ ປະທານປະເທດຫວຽດນາມ ໃນຖານະຕຳແໜ່ງໃໝ່, ມີຄວາມໝາຍ ແລະຄວາມສຳຄັນພິເສດທັງດ້ານສອງຝ່າຍ ແລະຫຼາຍຝ່າຍ?

ສຳລັບດ້ານສອງຝ່າຍ, ການໄປປະຕິບັດງານຄັ້ງນີ້ຈະປະກອບສ່ວນປັບປຸງການພົວພັນມິດຕະພາບທີ່ເປັນມູນເຊື້ອ, ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ຂຸດຄົ້ນຄວາມສາມາດບົ່ມຊ້ອນໃນການຮ່ວມມື, ຊຸກຍູ້ການພົວພັນຂອງຫວຽດນາມ ກັບສອງປະເທດ ກໍ່ຄືພາກພື້ນ ອາເມລິກາ ລາຕິນ, ພ້ອມທັງເພີ່ມທະວີການປະສານສົມທົບກັບບັນດາປະເທດໃນການຮັບມືກັບສິ່ງທ້າທາຍທົ່ວໂລກ.

ສຳລັບ ຈີເລ, ນີ້ແມ່ນການຢ້ຽມຢາມຂອງທ່ານປະທານປະເທດຫວຽດນາມ ພາຍຫຼັງເວລາ 15 ປີ, ກົງກັບໂອກາດສະເຫຼີມສະຫຼອງ 55 ປີແຫ່ງການພົບປະຄັ້ງປະຫວັດສາດລະຫວ່າງທ່ານປະທານ ໂຮ່ຈີມິນ ແລະທ່ານ Salvador Allende ປະທານາທິບໍດີ ຈີເລ- ເຫດການຕັ້ງພື້ນຖານສຳລັບເລື່ອງ ຈີເລ ເປັນປະເທດທຳອິດຢູ່ ອາເມລິກາ ໃຕ້ ສ້າງຕັ້ງການພົວພັນທາງການທູດກັບ ຫວຽດນາມ ຢ່າງເປັນທາງການ. ບົນພື້ນຖານດັ່ງກ່າວ, ການພົວພັນ ຫວຽດນາມ - ຈີເລ ໄດ້ ແລະພວມພັດທະນາຢ່າງຕັ້ງໜ້າ, ໂດຍສະເພາະໃນຂົງເຂດການຄ້າ. ວົງເງິນການຄ້າສອງສົ້ນໃນກວ່າທົດສະວັດໜຶ່ງ ໄດ້ເພີ່ມຂຶ້ນທົບ 4 ເທົ່າ, ບັນລຸ 1,5 ຕື້ໂດລາສະຫະລັດ ໃນປີິ 2023. ປະຈຸບັນ,  ຈີເລ ແມ່ນໜຶ່ງໃນບັນດາຄູ່ຮ່ວມມືສຳຄັນແຖວໜ້າຂອງຫວຽດນາມ ຢູ່ພາກພື້ນ; ແມ່ນປະເທດ ອາເມລິກາ ລາຕິນ ທຳອິດທີ່ເຊັນສັນຍາການຄ້າເສລີກັບ ຫວຽດນາມ (ປີ 2014). ຕາມນັ້ນແລ້ວ, ການຢ້ຽມຢາມຈະນຳເອົາມາເຊິ່ງ “ພະລັງຊີວິດໃໝ່” ໃຫ້ແກ່ການພົວພັນຫວຽດນາມ-ຈີເລ, ໂດຍສະເພາະແມ່ນໃນຂົງເຂດທີ່ສອງຝ່າຍຍັງມີຄວາມສາມາດຮ່ວມມືບົ່ມຊ້ອນຫຼາຍຢ່າງ.

leftcenterrightdel
ທ່ານນາງ ຫງວຽນມິງຮັ່ງ ຮອງລັດຖະມົນຕີການຕ່າງປະເທດຫວຽດນາມ. ພາບ: ກະຊວງການຕ່າງປະເທດຫວຽດນາມ

ສຳລັບ ເປຣູ, ນີ້ແມ່ນການຢ້ຽມຢາມທາງລັດຖະກິດ ຄັ້ງທຳອິດຂອງທ່ານປະທານປະເທດ ຫວຽດນາມ. ດຳເນີນກົງກັບໂອກາດສອງປະເທດສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ, ການຢ້ຽມຢາມໄດ້ຮັບຄວາມຫວັງວ່າຈະແມ່ນຂີດໝາຍປະຫວັດສາດ, ປະກອບສ່ວນປັບປຸງພື້ນຖານການພົວພັນດ້ານການເມືອງອັນດີງາມລະຫວ່າງສອງປະເທດ, ຍົກສູງປະສິດທິຜົນການຮ່ວມມືໃນຂົງເຂດທີ່ມີຄວາມສາມາດບົ່ມຊ້ອນ ແລະມຸ່ງໄປເຖິງນຳການພົວພັນຂຶ້ນເປັນລະດັບສູງໃໝ່. ປະຈຸບັນ, ເປຣູ ແມ່ນປະເທດທີ່ມີເງິນລົງທຶນໂດຍກົງໃຫຍ່ທີ່ສຸດຂອງຫວຽດນາມ ຢູ່ພາກພື້ນ ອາເມລິກາ ລາຕິນ; ແມ່ນຄູ່ການຄ້າໃຫຍ່ອັນດັບທີ 6 ຂອງຫວຽດນາມ ຢູ່ພາກພື້ນ, ໃນຂະນະນັ້ນ ຫວຽດນາມ ແມ່ນຄູ່ຮ່ວມມືການຄ້າໃຫຍ່ທີ່ສຸດຂອງ ເປຣູ ໃນອາຊຽນ. ວົງເງິນການຄ້າສອງສົ້ນປີ 2023 ບັນລຸ 500 ລ້ານ ໂດລາສະຫະລັດ ແລະໃນເວລາ 7 ເດືອນຕົ້ນປີທີ່ບັນລຸໄດ້ເກືອບ 300 ລ້ານໂດລາສະຫະລັດ.

ຄຽງຂ້າງກັນນັ້ນ, ການເຂົ້າຮ່ວມສັບປະດາສຸດຍອດ ອາເປັກ ແມ່ນໂອກາດເພື່ອທ່ານປະທານປະເທດ ພົບປະກັບການນຳ ອາເປັກ, ໃນນັ້ນມີຫຼາຍຄູ່ຮ່ວມມືຍຸດທະສາດຮອບດ້ານ, ຄູ່ຮ່ວມມືຍຸດທະສາດຂອງເຮົາ, ປະກອບສ່ວນເຮັດໃຫ້ການພົວພັນກັບບັນດາສະມາຊິກ ອາເປັກ ຢ່າງບໍ່ຢຸດຢັ້ງ.

ດ້ານຫຼາຍຝ່າຍ, ເລື່ອງທ່ານປະທານປະເທດ ເຂົ້າຮ່ວມສັບປະດາສຸດຍອດ ອາເປັກ 2024 ກົງກັບໂອກາດສະເຫຼີມສະຫຼອງ 35 ປີແຫ່ງວັນສ້າງຕັ້ງເວທີປາໄສ, ສືບຕໍ່ຢັ້ງຢືນການປະກອບສ່ວນຢ່າງຕັ້ງໜ້າ, ມີຄວາມຮັບຜິດຊອບຂອງຫວຽດນາມ ໃນການແກ້ໄຂບັນຫາພາກພື້ນ ແລະທົ່ວໂລກ, ພິເສດແມ່ນຊຸກຍູ້ວິວັດທະນາການເຊື່ອມຕໍ່ເສດຖະກິດສາກົນ, ສ້າງກຳລັງໜູນໃໝ່ໃຫ້ແກ່ການເຕີບໂຕຂອງພາກພື້ນ; ສືບຕໍ່ປັບປຸງບົດບາດຂອງອາເປັກ ແມ່ນເວທີປາໄສເສດຖະກິດແຖວໜ້າ, ບ່ອນເຕົ້າໂຮມ 3/5 ພື້ນຖານເສດຖະກິດໃຫຍ່ທີ່ສຸດໃນໂລກ, ກວມເອົາປະມານ 77% ການຄ້າ, 81% ການລົງທຶນໂດຍກົງຂອງຕ່າງປະເທດ ແລະ 85% ຈຳນວນນັກທ່ອງທ່ຽວເຂົ້າຫວຽດນາມ. ແມ່ນປະເທດເຈົ້າພາບຂອງປີ ອາເປັກ 2027, ນີ້ກໍ່ແມ່ນກາລະໂອກາດເພື່ອຫວຽດນາມ ຊຸກຍູ້ການຜັນຂະຫຍາຍວິໄສທັດ ອາເປັກ ເຖິງປີ 2040 ເຊິ່ງປະເທດເຮົາໄດ້ລິເລີ່ມ ແລະເຂົ້າຮ່ວມການກໍ່ສ້າງພ້ອມກັບບັນດາສະມາຊິກແຕ່ປີ 2017.

ອາດສາມາດຢັ້ງຢືນວ່າ ການເຂົ້າຮ່ວມສັບປະດາສຸດຍອດ ອາເປັກ 2024 ແລະຢ້ຽມຢາມທາງລັດຖະກິດ ຈີເລ, ເປຣູ ຂອງທ່ານ ເລືອງເກື່ອງ ປະທານປະເທດຫວຽດນາມ ແມ່ນບາດກ້າວຜັນຂະຫຍາຍສຳຄັນໃນແນວທາງພົວພັນຕ່າງປະເທດສະເໝີຕົ້ນສະເໝີປາຍຂອງ ຫວຽດນາມ ກ່ຽວກັບການຫັນການພົວພັນຕ່າງປະເທດເປັນຫຼາຍຮູບແບບ ແລະຫຼາຍຝ່າຍ, ແມ່ນເພື່ອນມິດ, ແມ່ນຄູ່ຮ່ວມມືໄວ້ເນື້ອເຊື່ອໃຈ ແລະສະມາຊິກທີ່ມີຄວາມຮັບຜິດຊອບໃນປະຊາຄົມສາກົນ, ສ້າງພະລັງແຮງໃໝ່ ເພື່ອນຳການພົວພັນຄູ່ຮ່ວມມືຮອບດ້ານຫວຽດນາມ - ຈີເລ ແລະການພົວພັນຮ່ວມມືຫຼາຍດ້ານຫວຽດນາມ-ເປຣູ ກ້າວເຂົ້າໄລຍະພັດທະນາໃໝ່ຂະຫຍັນຂັນເຄື່ອນ, ແທດຈິງ, ມີປະສິດທິຜົນກວ່າ, ພ້ອມທັງ, ຢັ້ງຢືນທີ່ຕັ້ງ, ບົດບາດ, ຖານະບົດບາດນັບມື້ນັບເພີ່ມຂຶ້ນຂອງຫວຽດນາມ ຢູ່ ອາຊີ-ປາຊີຟິກ ແລະໃນໂລກ.

ນັກຂ່າວ: ທ່ານນາງຮອງລັດຖະມົນຕີ ແບ່ງປັນກ່ຽວກັບຄວາມໝາຍຂອງຫົວຂໍ້ “ມອບສິດ. ກວມລວມ. ເຕີບໂຕ” ກໍ່ຄືບົດບາດ, ການເຂົ້າຮ່ວມ ແລະການປະກອບສ່ວນຂອງຫວຽດນາມ ໃນອາເປັກ ໃນໄລຍະຜ່ານມາ ແລະທີ່ກອງປະຊຸມຈະມາເຖິງຕື່ມອີກ?

ທ່ານນາງ ຫງວຽນມິງຮັ່ງ ຮອງລັດຖະມົນຕີການຕ່າງປະເທດຫວຽດນາມ: ໃນຊຸມປີມໍ່ໆມານີ້, ອາເປັກ ໄດ້ກຳນົດວິໄສທັດກ່ຽວກັບການພັດທະນາເສດຖະກິດດຸນດ່ຽງ, ຍືນຍົງ ແລະກວມລວມກວ່າ. ໃນປີ ອາເປັກ 2024, ປະເທດເຈົ້າພາບ ເປຣູ ສືບຕໍ່ເຊີດຊູການ ເຕີບໂຕກວມລວມ, ຮັບປະກັນວ່າ ປະຊາຊົນທຸກຄົນລ້ວນແຕ່ໄດ້ເຂົ້າເຖິງ ແລະຮັບຜົນປະໂຫຍດຈາກລາຍການຮ່ວມມືຂອງ ອາເປັກ.

ບົນຈິດໃຈດັ່ງກ່າວ, ຫົວຂໍ້ປີ ອາເປັກ 2024 ແມ່ນ “ມອບສິດ. ກວມລວມ. ເຕີບໂຕ”. “ມອບສິດ” ແມ່ນຍົກສູງກໍາລັງຄວາມສາມາດ ແລະສ້າງກາລະໂອກາດໃຫ້ທຸກພາກສ່ວນສັງຄົມເຂົ້າຮ່ວມການເຄື່ອນໄຫວເສດຖະກິດ-ສັງຄົມ. “ກວມລວມ” ແມ່ນປະຊາຊົນທຸກຄົນລ້ວນແຕ່ໄດ້ເຂົ້າຮ່ວມ ແລະຮັບຜົນປະໂຫຍດຈາກວິວັດທະນາການປ່ຽນແປງໃໝ່, ຫັນປ່ຽນດີຈີຕອນ ແລະການເຕີບໂຕເສດຖະກິດ. ແລະບັນດາການເຄື່ອນໄຫວເສດຖະກິດ, ການຄ້າ, ການລົງທຶນ ກໍ່ຄືການຮ່ວມມື ອາເປັກ ລ້ວນແຕ່ມຸ່ງໄປເຖິງ “ການເຕີບໂຕ”, ເພື່ອ ອາເປັກ ສືບຕໍ່ແມ່ນຜູ້ນຳ ແລະກຳລັງໜູນການເຕີບໂຕຂອງພາກພື້ນ ແລະໂລກ.

ໃນເວລາກວ່າ 25 ປີແຫ່ງການເຂົ້າຮ່ວມ ອາເປັກ (1998-2024), ຫວຽດນາມ ສ້າງໄດ້ຂີດໝາຍພົ້ນເດັ່ນຫຼາຍຢ່າງໃນການຮ່ວມມືອາເປັກ ແລະຍາມໃດກໍ່ໄດ້ຕີລາຄາວ່າແມ່ນສະມາຊິກທີ່ມີການປະກອບສ່ວນຕັ້ງໜ້າ, ມີຄວາມຮັບຜິດຊອບ ແລະມີປະສິດທິຜົນໃນການຫັນບັນດາເປົ້າໝາຍ, ວິໄສທັດຮ່ວມມືຂອງອາເປັກ ກໍ່ຄືຍົກສູງບົດບາດຂອງເວທີປາໄສໃຫ້ປະກົດຜົນເປັນຈິງ, ພົ້ນເດັ່ນແມ່ນ:

ທີໜຶ່ງ, ຫວຽດນາມ ໄດ້ຮັບດຳລົງຕຳແໜ່ງປະເທດເຈົ້າພາບ ອາເປັກ ເປັນສອງຄັ້ງໃນປີ 2006 ແລະ 2017 ປະສົບຜົນສຳເລັດ. ບົນຖານະຕຳແໜ່ງປະເທດເຈົ້າພາບ, ປະເທດຫວຽດນາມ ຢັ້ງຢືນໄດ້ຄວາມສາມາດໃນການບໍລິຫານ, ຊັກນຳການຮ່ວມມືອາເປັກ, ປະກອບເຂົ້າຜົນສຳເລັດຂອງກອງປະຊຸມຕ່າງໆ, ຊຸກຍູ້ທ່າຮ່ວມມື ແລະການເຊື່ອມຕໍ່ເສດຖະກິດຂອງອາເປັກ ແລະພາກພື້ນອາຊີ-ປາຊີຟິກ. ພວກເຮົາ ກໍ່ຮັບດຳລົງຫຼາຍຕຳແໜ່ງນຳພາໃນກົນໄກແຕກຕ່າງກັນຂອງອາເປັກ, ໃນນັ້ນມີຄະນະເລຂາ, ກຸ່ມອາຊຽນ, ບັນດາຄະນະກຳມະການ/ກຸ່ມປະຕິບັດງານ. ຜ່ານມາ, ຫວຽດນາມ ອີກເທື່ອໜຶ່ງໄດ້ບັນດາສະມາຊິກໄວ້ວາງໃຈສະໜັບສະໜູນໃຫ້ດຳລົງຕຳແໜ່ງເປັນປະເທດເຈົ້າພາບ ອາເປັກ 2027.

ທີສອງ, ພວກເຮົາ ໄດ້ປະກອບສ່ວນຢ່າງຕັ້ງໜ້າເຂົ້າການຮັກສາທ່າຮ່ວມມື ອາເປັກ ໃນສະພາບການຮ່ວມມື ແລະເຊື່ອມຕໍ່ເສດຖະກິດສາກົນຢືນຕໍ່ໜ້າສິ່ງທ້າທາຍຫຼາຍຢ່າງ. ດ້ວຍການສະເໜີ, ການຜັນຂະຫຍາຍເກືອບ 190 ຂໍ້ລິເລີ່ມ, ໂຄງການໃນຫຼາຍຂົງເຂດສຳຄັນ, ຄື: ການປະຕິຮູບກົນໄກ, ພັດທະນາຊັບພະຍາກອນມະນຸດ, ມອບສິດໃຫ້ແມ່ຍິງ, ພັດທະນາຊົນນະບົດ ແລະຕົວເມືອງ, ຮັບມືກັບການປ່ຽນແປງຂອງດິນຟ້າອາກາດ, ຄວາມໝັ້ນຄົງດ້ານສະບຽງອາຫານ, ການຄ້າເອເລັກໂຕນິກ... ຫວຽດນາມ ໄດ້ປະກອບສ່ວນເຮັດໃຫ້ບັນດາເນື້ອໃນຮ່ວມມື ອາເປັກ ນັບມື້ນັບອຸດົມສົມບູນ ແລະຮອບດ້ານ, ນຳ ອາເປັກ ຮັບມືກັບການຜັນແປຂອງສະພາບການສາກົນ ແລະໄປຕາມທ່າອ່ຽງພັດທະນາໃໝ່ຂອງຍຸກສະໄໝ, ຢັ້ງຢືນບົດບາດບໍ່ສາມາດຂາດໄດ້ຂອງ ອາເປັກ ໃນການຊຸກຍູ້ການເຕີບໂຕ ແລະການເຊື່ອມຕໍ່ເສດຖະກິດຢູ່ອາຊີ-ປາຊີຟິກ ແລະໃນທົ່ວໂລກ.

ທີສາມ, ພວກເຮົາ ລິເລີ່ມໄດ້ ແລະເຂົ້າຮ່ວມການກຳນົດວິໄສທັດໄລຍະຍາວສຳລັບການຮ່ວມມືອາເປັກ. ພົ້ນເດັ່ນແມ່ນການສ້າງວິໄສທັດ ອາເປັກ ເຖິງປີ 2040. ຫວຽດນາມ ໄດ້ເປັນເຈົ້າການເຂົ້າຮ່ວມການນຳພາ, ປະສານງານໃນວິວັດທະນາການສ້າງບົດລາຍງານດ້ວຍຫົວຂໍ້ “ປະຊາຊົນ ແລະວັດທະນາຖາວອນ: ວິໄສທັດ ອາເປັກ ເຖິງປີ 2040”. ນີ້ແມ່ນພື້ນຖານເພື່ອການນຳ ອາເປັກ ຮັບຮອງເອົາວິໄສທັດ ອາເປັກ ກ່ຽວກັບປະຊາຄົມອາຊີ - ປາຊີຟິກ ເປີດ, ຂະຫຍັນຂັນເຄື່ອນ, ເປັນເຈົ້າຕົນເອງ ແລະສັນຕິພາບໃນປີ 2040, ເພື່ອຄວາມວັດທະນາຖາວອນຂອງປະຊາຊົນທຸກຄົນ ແລະຮຸ່ນຕ່າງໆໃນອະນາຄົດ.

ສືບທອດຄວາມມານະພະຍາຍາມໜ້າເອກອ້າງທະນົງໃຈດັ່ງກ່າວ ແລະດ້ວຍຖານະບົດບາດຂອງປະເທດເຈົ້າພາບ ອາເປັກ 2027, ໃນສັບປະດາສຸດຍອດ ອາເປັກ 2024, ຫວຽດນາມ ຈະສືບຕໍ່ເຂົ້າຮ່ວມ ແລະປະກອບສ່ວນຢ່າງຕັ້ງໜ້າ, ມີຄວາມຮັບຜິດຊອບທີ່ກອງປະຊຸມສຸດຍອດ ອາເປັກ ຄັ້ງທີ 31 ແລະກອງປະຊຸມຕ່າງໆທີ່ກ່ຽວຂ້ອງ ກໍ່ຄືກອງປະຊຸມສຸດຍອດວິສາຫະກິດ ອາເປັກ ດ້ວຍການເຂົ້າຮ່ວມຂອງວິສາຫະກິດແຖວໜ້າພາກພື້ນກວ່າ 1.000 ແຫ່ງ. ທ່ານປະທານປະເທດ ຈະຍົກອອກຫຼາຍຂໍ້ສະເໜີທີ່ມີລັກສະນະຍຸດທະສາດ ແລະບຸກທະລຸ ເພື່ອເສີມຂະຫຍາຍບົດບາດ, ຖານະທີ່ຕັ້ງຂອງ ອາເປັກ ໃນການຮ່ວມມື, ເຊື່ອມຕໍ່ເສດຖະກິດສາກົນ, ຮັບມືກັບສິ່ງທ້າທາຍວາງອອກຕໍ່ກັບປະຊາຄົມສາກົນເວົ້າລວມ ແລະພາກພື້ນອາຊີ-ປາຊີຟິກ ເວົ້າສະເພາະ. ທ່ານປະທານປະເທດ ກໍ່ສົ່ງສານກ່ຽວກັບຄວາມມຸ່ງຫວັງບືນຕົວຂຶ້ນຂອງປະເທດຫວຽດນາມ ໃນສັງກາດໃໝ່, ບັນດາການກຳນົດທິດໃຫຍ່ກ່ຽວກັບການພັດທະນາ, ການພົວພັນຕ່າງປະເທດ ແລະການເຊື່ອມໂຍງສາກົນຂອງຫວຽດນາມ, ໃນນັ້ນພາກພື້ນອາຊີ-ປາຊີຟິກ ແລະເວທີປາໄສ ອາເປັກ ແມ່ນໜຶ່ງໃນບັນດາບຸລິມະສິດແຖວໜ້າ, ຮຽກຮ້ອງບັນດາພື້ນຖານເສດຖະກິດສະມາຊິກ ອາເປັກ ແລະປະຊາຄົມວິສາຫະກິດພາກພື້ນ ສືບຕໍ່ຮ່ວມເດີນທາງ, ໜູນຊ່ວຍຫວຽດນາມ ໃນການຫັນເປົ້າໝາຍກາຍເປັນປະເທດພັດທະນາທີ່ມີລາຍຮັບສູງໃນປີ 2045.

ນັກຂ່າວ: ຂໍຂອບໃຈທ່ານນາງຮອງລັດຖະມົນຕີການຕ່າງປະເທດ!

ໂດຍ: ແສງເດືອນ