ພາຍຫຼັງພິທີຕ້ອນຮັບ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະທ່ານ Narendra Modi ນາຍົກລັດຖະມົນຕີ ອິນເດຍ ມີການພົບປະເຈລະຈາປະສົບຜົນສຳເລັດ, ມີປະສິດທິຜົນ.
ເປີດກວ້າງການຮ່ວມມືກັບທິດນຳ “ຫ້າກວ່າ”
ທີ່ການພົບປະເຈລະຈາ, ນາຍົກລັດຖະມົນຕີສອງທ່ານໄດ້ເນັ້ນໜັກວ່າ ການພົວພັນ ຫວຽດນາມ ແລະອິນເດຍ ໄດ້ເລີ່ມມາຈາກປະຫວັດສາດ, ການນຳບັນພະບູລຸດ ແລະປະຊາຊົນສອງປະເທດຮຸ່ນຕ່າງໆໄດ້ເພີ່ີມພູນຄູນສ້າງ, ສອງປະເທດຕ້ອງສືບຕໍ່ໃຫ້ຄວາມເຄົາລົບ ແລະຮັກສານ້ຳໃຈມິດຕະພາບອັນເປັນມູນເຊື້ອນີ້ໄວ້ຢ່າງໝັ້ນແກ່ນ, ຮັກສາຊັບສົມບັດອັນລ້ຳຄ່າລະຫວ່າງຫວຽດນາມ ແລະອິນເດຍ. ນັບແຕ່ໄດ້ສ້າງຕັ້ງການພົວພັນຄູ່ຮ່ວມມືຍຸດທະສາດຮອບດ້ານປີ 2016 ໃນການຢ້ຽມຢາມຫວຽດນາມ ຂອງທ່ານ Narendra Modi ຈົນຮອດປະຈຸບັນ, ການພົວພັນສອງປະເທດມີບາດກ້າວເດີນທີ່ກະໂດດຂັ້ນ, ດ້ວຍຄວາມໄວ້ເນື້ອເຊື່ອໃຈດ້ານການເມືອງຢ່າງສູງ, ການຮ່ວມມືໃນຂົງເຂດການປ້ອງກັນຊາດ, ປ້ອງກັນຄວາມສະຫງົບ, ເສດຖະກິດ-ການຄ້າ ແລະການລົງທຶນ, ວັດທະນະທຳ-ການສຶກສາ ແລະການພົບປະແລກປ່ຽນປະຊາຊົນລ້ວນແຕ່ປະສົບຜົນສຳເລັດເປັນໜ້າຊື່ນຊົມ.
    |
 |
|
ທ່ານ Narendra Modi ນາຍົກລັດຖະມົນຕີອິນເດຍ ຕ້ອນຮັບທ່ານ ຟ້າມມິງຈິ໊ງ ນາຍົກລັດຖະມົນຕີ ຫວຽດນາມ. ພາບ: ສຳນັກຂ່າວສານຫວຽດນາມ |
ນາຍົກລັດຖະມົນຕີສອງທ່ານ ໄດ້ເຫັນດີເປັນເອກະພາບປັບປຸງຂົງເຂດຮ່ວມມືທີ່ເປັນມູນເຊື້ອ ແລະເປີດກວ້າງໄປສູ່ຂົງເຂດໃໝ່ທີ່ມີຄວາມສາມາດບົ່ມຊ້ອນດ້ວຍທິດນຳ “ຫ້າກວ່າ”, ລວມມີ: ຄວາມໄວ້ເນື້ອເຊື່ອໃຈດ້ານການເມືອງສູງກວ່າ; ການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບເລິກເຊິ່ງກວ່າ; ການຮ່ວມມືດ້ານເສດຖະກິດ-ການຄ້າ ແລະການລົງທຶນແທດຈິງ ແລະມີປະສິດທິຜົນກວ່າ; ການຮ່ວມມືດ້ານວິທະຍາສາດ ແລະເຕັກໂນໂລຢີ, ປ່ຽນແປງໃໝ່ປະດິດສ້າງເປີດກວ້າງກວ່າ; ການພົບປະແລກປ່ຽນວັດທະນະທຳ, ປະຊາຊົນເຊື່ອມຕໍ່ຢ່າງສະໜິດແໜ້ນກວ່າ.
ສອງຝ່າຍໄດ້ເຫັນດີເປັນເອກະພາບຮັກສາການແລກປ່ຽນຄະນະຜູ້ແທນ ແລະການພົບປະຂັ້ນສູງ, ທຸກຂັ້ນ, ທຸກຊ່ອງທາງຢ່າງເປັນປະຈຳ, ເຫັນດີເປັນເອກະພາບນຳກັນວ່າໃນທຸກໆປີ, ນາຍົກລັດຖະມົນຕີສອງທ່ານຈະພົບປະກັນໂດຍຜ່ານການຢ້ຽມຢາມ ຫຼືພົບປະກັນທີ່ກອງປະຊຸມຫຼາຍຝ່າຍ; ເພີ່ມທະວີບົດບາດຂອງຄະນະກຳມະການປະສົມໂດຍລັດຖະມົນຕີການຕ່າງປະເທດສອງປະເທດເປັນປະທານຮ່ວມໃນການກວດກາຄືນໃຫ້ຫຼາຍກວ່າອີກ, ຫັນບັນດາຂົງເຂດຮ່ວມມືໃຫ້ປະກົດຜົນເປັນຈິງ, ກະຕຸກຊຸກຍູ້ການຜັນຂະຫຍາຍໂຄງການກະທຳກ່ຽວກັບການພົວພັນຄູ່ຮ່ວມມືຍຸດທະສາດຮອບດ້ານໄລຍະ 2024-2028 ໃຫ້ມີປະສິດທິຜົນ.
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະເຈລະຈາກັບທ່ານ Narendra Modi ນາຍົກລັດຖະມົນຕີອິນເດຍ. ພາບ: ສຳນັກຂ່າວສານຫວຽດນາມ |
ນາຍົກລັດຖະມົນຕີ ສອງທ່ານ ຕີລາຄາສູງຕໍ່ເລື່ອງສອງປະເທດພວມຜັນຂະຫຍາຍຖະແຫຼງການຮ່ວມກ່ຽວກັບການພົວພັນຄູ່ຮ່ວມມືດ້ານປ້ອງກັນຊາດຫວຽດນາມ-ອິນເດຍ ຮອດປີ 2030 (ລົງນາມໃນປີ 2022) ໃຫ້ມີປະສິດທິຜົນ, ເຫັນດີເປັນເອກະພາບເປີດກວ້າງການຮ່ວມມືດ້ານອຸດສາຫະກຳປ້ອງກັນຊາດ ແລະອຸດສາຫະກຳປ້ອງກັນຄວາມສະຫງົບ, ຍູ້ແຮງການຮ່ວມມືດ້ານຄວາມໝັ້ນຄົງໃນການເດີນທະເລ, ການຮ່ວມມືທີ່ໄວ້ເນື້ອເຊື່ອໃຈກ່ຽວກັບຄວາມປອດໄພດ້ານໄຊເບີ, ແລກປ່ຽນຂໍ້ມູນການສືບຂ່າວ ແລະຕ້ານການກໍ່ການຮ້າຍ. ອິນເດຍ ເຫັນດີເປັນເອກະພາບສືບຕໍ່ໜູນຊ່ວຍຫວຽດນາມ ໃນການບຳລຸງສ້າງ, ຝຶກແອບ, ຍົກສູງກຳລັງຄວາມສາມາດໃຫ້ກຳລັງປ້ອງກັນຊາດ ແລະປ້ອງກັນຄວາມສະຫງົບຂອງຫວຽດນາມ.
ນາຍົກລັດຖະມົນຕີສອງທ່ານໄດ້ເຫັນດີເປັນເອກະພາບຜັນຂະຫຍາຍມາດຕະການຢ່າງແຂງແຮງເພື່ອມຸ່ງໄປເຖິງເປົ້າໝາຍນຳວົງເງິນການຄ້າ, ການລົງທຶນສອງສົ້ນໃຫ້ເພີ່ມຂຶ້ນທົບສອງເທົ່າເມື່ອທຽບໃສ່ລະດັບປະຈຸບັນໃນປີ 2030.
ກ້າວໄປເຖິງການເຊັນສັນຍາຄູ່ຮ່ວມມືດີຈີຕອນ
ທ່ານນາຍົກລັດຖະມົນຕີ ຫວຽດນາມ ສະເໜີໃຫ້ ອິນເດຍ ເຊັນສັນຍາການຄ້າເອເລັກໂຕນິກ, ສັນຍາການຄ້າສອງຝ່າຍໂດຍໄວ ເພື່ອຂຸດຄົ້ນຕະຫຼາດຂາຍຍ່ອຍໃຫ້ເໝາະສົມກັບທ່າອ່ຽງໃໝ່ໃຫ້ໄດ້ຢ່າງສຸດຂີດ. ທ່ານນາຍົກລັດຖະມົນຕີ ສົ່ງເສີມບັນດາກຸ່ມບໍລິສັດຂະໜາດໃຫຍ່, ມະຫາເສດຖິເຕັກໂນໂລຢີຂອງ ອິນເດຍ ມາລົງທຶນຢູ່ຫວຽດນາມ, ສ້າງໂຄງການຂະໜາດໃຫຍ່ທີ່ມີລັກສະນະເປັນສັນຍາລັກຂອງການຮ່ວມມືດ້ານເສດຖະກິດຂອງສອງປະເທດເພື່ອຊ່ວຍໃຫ້ສອງປະເທດເຂົ້າຮ່ວມຕ່ອງໂສ້ການສະໜອງທົ່ວໂລກໃຫ້ດີກວ່າ.
ການນຳສອງທ່ານສະເໜີໃຫ້ເປີດກວ້າງການຮ່ວມມືໃນຂົງເຂດວິທະຍາສາດ-ເຕັກໂນໂລຢີ, ພິເສດໃນຂົງເຂດເຕັກໂນໂລຢີຫຼັກແຫຼ່ງ, ປັນຍາປະດິດ ແລະການຮ່ວມມືກ່ຽວກັບການປ່ຽນແປງໃໝ່ ປະດິດສ້າງ, ເຕັກໂນໂລຢີຂຸດຄົ້ນ ແລະປຸງແຕ່ງດິນຫາຍາກ, ຮ່ວມມືພັດທະນາຂະແໜງເຕັກໂນໂລຢີຂໍ້ມູນຂ່າວສານ ແລະບຳລຸງສ້າງຊັບພະຍາກອນມະນຸດໃຫ້ຂະແໜງເຕັກໂນໂລຢີຂໍ້ມູນຂ່າວສານຢູ່ແຕ່ລະປະເທດ ເພື່ອກ້າວໄປເຖິງການສ້າງຕັ້ງເວທີປາໄສຮ່ວມມືດີຈີຕອນ ແລະເຊັນສັນຍາຮ່ວມມືດີຈີຕອນໂດຍໄວ. ນາຍົກລັດຖະມົນຕີສອງທ່ານກໍ່ເຫັນດີຍູ້ແຮງການຮ່ວມມືດ້ານການສຶກສາ-ກໍ່ສ້າງ, ວັດທະນະທຳ, ການທ່ອງທ່ຽວ, ເຮັດໃຫ້ການພົບປະແລກປ່ຽນປະຊາຊົນບົນພື້ນຖານເສີມຂະຫຍາຍຄຸນຄ່າທີ່ຄ້າຍຄືກັນດ້ານວັດທະນະທຳທີ່ສີວິໄລ, ປະຫວັດສາດ ແລະຈິດວິນຍານໃຫ້ເລິກເຊິ່ງ, ໃນນັ້ນມີສາສະໜາພຸດ, Yoga...
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະທ່ານ Narendra Modi ນາຍົກລັດຖະມົນຕີອິນເດຍ ກົດປຸ່ມເປີດນໍາໃຊ້ສວນສາທາລະນະຊອບແວກອງທັບຢູ່ ຍາຈາງ. ພາບ: ສຳນັກຂ່າວສານຫວຽດນາມ |
ເມື່ອແລກປ່ຽນກ່ຽວກັບບັນຫາພາກພື້ນ ແລະສາກົນ, ການນຳສອງທ່ານໄດ້ເຫັນດີເປັນເອກະພາບສະໜັບສະໜູນເຊິ່ງກັນ ແລະ ກັນ ແລະຮ່ວມມືກັນຢ່າງແໜ້ນແຟ້ນຢູ່ເວທີປາໄສພາກພື້ນ ແລະສາກົນ, ໂດຍສະເພາະແມ່ນສະຫະປະຊາຊາດ, ອາຊຽນ ແລະກົນໄກໂດຍອາຊຽນ ນຳພາ, ເຊີດຊູຫຼັກການຮັບປະກັນຄວາມໝັ້ນຄົງ, ຄວາມປອດໄພ ແລະຄວາມເສລີໃນການເດີນທະເລ ແລະການບິນ, ແກ້ໄຂຂໍ້ຂັດແຍ້ງກັນໂດຍສັນຕິວິທີບົນພື້ນຖານກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) ປີ 1982.
* ພາຍຫຼັງການພົບປະເຈລະຈາ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະທ່ານ Narendra Modi ນາຍົກລັດຖະ ມົນຕີອິນເດຍ ໄດ້ມີການພົບປະກັບສື່ມວນຊົນເພື່ອແຈ້ງໝາກຜົນການພົບປະເຈລະຈາ.
* ກ່ອນໜ້ານັ້ນ, ທ່ານ ຟ້າມມິງຈິ໊ງ ແລະທ່ານ Narendra Modi ໄດ້ຖະແຫຼງຮັບຮອງເອົາຖະແຫຼງການຮ່ວມກ່ຽວກັບການເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານ ແລະກົດປຸ່ມເປີດນຳໃຊ້ສວນສາທາລະນະຊອບແວກອງທັບຢູ່ຍາຈາງ. ນາຍົກລັດຖະມົນຕີສອງທ່ານ ກໍ່ເປັນສັກຂີພິຍານພິທີແລກປ່ຽນເອກະສານຮ່ວມມື 9 ສະບັບລະຫວ່າງສອງປະເທດ ແລະບັນດາກະຊວງ, ຂະແໜງການ, ອົງການສອງປະເທດ.
* ຕອນບ່າຍວັນທີ 1 ສິງຫາ, ຢູ່ທໍານຽບປະທານາທິບໍດີຢູ່ນະຄອນຫຼວງ New Delhi, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ພົບປະກັບທ່ານນາງ Droupadi Murmu ປະທານາທິບໍດີອິນເດຍ. ທ່ານ ຟ້າມມິງຈິ໊ງ ເນັ້ນໜັກວ່າຫວຽດນາມ ຍາມໃດກໍ່ຈົດຈຳການສະໜັບສະໜູນອັນລ້ຳຄ່າຂອງ ອິນເດຍ ໃນພາລະກິດຕໍ່ສູ້ປົດປ່ອຍຊາດກ່ອນໜ້ານີ້, ກໍ່ຄືກິດຈະການສ້າງສາ ແລະພັດທະນາປະເທດຊາດໃນປະຈຸບັນ.
ທ່ານນາງປະທານາທິບໍດີອິນເດຍ ຕີລາຄາສູງໝາກຜົນການພົບປະເຈລະຈາລະຫວ່າງ ທ່ານ ຟ້າມມິງຈິ໊ງ ແລະທ່ານ Narendra Modi, ເຊື່ອໝັ້ນວ່າເອກະສານຮ່ວມມືທີ່ໄດ້ລົງນາມໃນໂອກາດນີ້ສອງຝ່າຍຈະໄດ້ຈັດຕັ້ງປະຕິບັດຢ່າງຕັ້ງໜ້າ.
ທ່ານ ຟ້າມມິງຈິ໊ງ ສະແດງຄວາມຂອບໃຈ ແລະສະເໜີທ່ານນາງປະທານາທິບໍດີອິນເດຍ ສືບຕໍ່ເອົາໃຈໃສ່, ສະໜັບສະໜູນການພົວພັນຫວຽດນາມ-ອິນເດຍ, ໂດຍສະເພາະແມ່ນການຮ່ວມມືດ້ານປ້ອງກັນຊາດ, ສືບຕໍ່ໜູນຊ່ວຍຫວຽດນາມ ບ້ວງເງິນສິນເຊື່ອບຸລິມະສິດ, ບຳລຸງສ້າງ, ຝຶກແອບຍົກສູງກຳລັງຄວາມສາມາດ... ເພີ່ມຄວາມຖີ່ຂອງຖ້ຽວບິນໂດຍກົງຕື່ມອີກ ເພື່ອປະກອບສ່ວນຊຸກຍູ້ການພົບປະແລກປ່ຽນລະຫວ່າງປະຊາຊົນ ແລະບັນດາທ້ອງຖິ່ນຂອງສອງປະເທດ.
ຫວຽດນາມ ແມ່ນຄູ່ຮ່ວມມືສຳຄັນໃນນະໂຍບາຍທາງທິດຕາເວັນອອກ
ກໍ່ໃນຕອນບ່າຍວັນທີ 1 ສິງຫາ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ຖະແຫຼງນະໂຍບາຍຢູ່ສະພາບັນດາບັນຫາໂລກຂອງ ອິນເດຍ (ICWA). ເຂົ້າຮ່ວມການຖະແຫຼງຂອງທ່ານ ຟ້າມມິງຈິ໊ງ ມີນັກການເມືອງ, ສາສະດາຈານ, ນັກຄົ້ນຄວ້າ, ນັກຮຽນຮູ້ ແລະນັກສຶກສາອິນເດຍ ເປັນຈຳນວນຫຼວງຫຼາຍ. ປະທານສະພາບັນດາບັນຫາໂລກຂອງ ອິນເດຍ ໃຫ້ຮູ້ວ່າ ຫວຽດນາມ ແມ່ນຄູ່ຮ່ວມມືສຳຄັນໃນນະໂຍບາຍທາງທິດຕາເວັນອອກຂອງອິນເດຍ.
ທ່ານ ຟ້າມມິງຈິ໊ງ ຖຶືວ່າ ໂລກພວມສືບຕໍ່ມີການຜັນແປໂດຍໄວ, ສັບສົນ, ຄາດເດົາໄດ້ຍາກ, ມີຫຼາຍບັນຫາຍັງບໍ່ເຄີຍເກີດຂຶ້ນມາກ່ອນ...; ເນັ້ນໜັກວ່າ ການພົວພັນສາມັກຄີ, ຮ່ວມມື ແລະມິດຕະພາບຫວຽດນາມ-ອິນເດຍ ໄດ້ຮັບການປັບປຸງ ແລະພັດທະນາຢ່າງບໍ່ຢຸດຢັ້ງ, ເປັນປັດໄຈຕັ້ງໜ້າປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະພັດທະນາຂອງທົ່ວພາກພື້ນ ແລະທົ່ວໂລກ. ທ່ານ ຟ້າມມິງຈິ໊ງ ໄດ້ແຈ້ງໃຫ້ສະພາດັ່ງກ່າວຮັບຊາບກ່ຽບກັບ 6 ນະໂຍບາຍຈຸດສຸມຂອງຫວຽດນາມ ໃນຂົງເຂດການພົວພັນຕ່າງປະເທດ, ການປ້ອງກັນຊາດ, ການພັດທະນາເສດຖະກິດ, ຮັບປະກັນຊີວິດສັງຄົມ, ພັດທະນາວັດທະນະທຳ ແລະກໍ່ສ້າງພັກ; ແບ່ງປັນກ່ຽວກັບ 5 ບົດຮຽນປະສົບການໃນວິວັດການພັດທະນາຂອງຫວຽດນາມ...
ໂດຍ: ແສງເດືອນ