ບຸກຄະລິກພາບອັນຍິ່ງໃຫຍ່
ທ່ານນາງ ຄຳເພົາ ເອີນທະວັນ ເອກອັກຄະລັດຖະທູດ ໄດ້ຕີລາຄາວ່າ, ທ່ານເລຂາທິການໃຫຍ່ ຫງວຽນຝູຈ້ອງ ເປັນບຸກຄະລິກພາບອັນຍິ່ງໃຫຍ່, ເປັນແບບຢ່າງທີ່ດີເດັ່ນ, ລຽບງ່າຍ, ເປັນການນຳທີ່ຮັກແພງ ແລະເອກອ້າງທະນົງໃຈຂອງປະຊາຊົນ. ໝູນໃຊ້ລັດທິ ມາກ-ເລນິນ ແລະແນວຄິດ ໂຮ່ຈີມິນ ຢ່າງມີຫົວຄິດປະດິດສ້າງ, ພັກກອມມູນິດຫວຽດນາມ ໂດຍທ່ານເລຂາທິການໃຫຍ່ ຫງວຽນຝູຈ້ອງ ນຳໜ້າ, ໄດ້ນຳພາປະເທດຜ່ານຜ່າທຸກຄວາມຫຍຸ້ງຍາກ, ນັບມື້ນັບພັດທະນາຢ່າງໝັ້ນຄົງເຂັ້ມແຂງ, ບັນລຸໄດ້ບັນດາຜົນງານອັນໃຫຍ່ຫຼວງ, ມີຄວາມໝາຍປະຫວັດສາດ.
    |
 |
|
ທ່ານເລຂາທິການໃຫຍ່ ຫງວຽນຝູຈ້ອງ ແລະທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ທີ່ການພົບປະຂັ້ນສູງລະຫວ່າງພັກກອມມູນິດຫວຽດນາມ ແລະພັກປະຊາຊົນປະຕິວັດລາວ ໃນວັນທີ 26 ກຸມພາ 2024. ພາບ: ສໍານັກຂ່າວສານຫວຽດນາມ |
ຕາມທ່ານນາງ ຄຳເພົາ ເອີນທະວັນ ເອກອັກຄະລັດຖະທູດແລ້ວ, ບັນດາທັດສະນະຊີ້ນຳ, ທິດນຳເຄື່ອນໄຫວຂອງພັກກອມມູນິດຫວຽດນາມ ໃນການຕໍ່ສູ້ຕ້ານສໍ້ລາດບັງຫຼວງ, ຫຍໍ້ທໍ້ໂດຍທ່ານເລຂາທິການໃຫຍ່ ຫງວຽນຝູຈ້ອງ ປຸກລະດົມໄດ້ຮັບການເສີມຂະຫຍາຍຢ່າງມີປະສິດທິຜົນຜ່ານພຶດຕິກໍາຕົວຈິງ, ແມ່ນບົດຮຽນອັນລ້ຳຄ່າທັງດ້ານທິດສະດີ ແລະພຶດຕິກໍາຕົວຈິງ.
ທ່ານນາງເອກອັກຄະລັດຖະທູດ ກໍ່ເອົາໃຈໃສ່ເຖິງແນວທາງການຕ່າງປະເທດ, ການທູດທີ່ເປັນເອກະລັກສະເພາະຂອງຫວຽດນາມ, ເຊິ່ງທ່ານເລຂາທິການໃຫຍ່ ຫງວຽນຝູຈ້ອງ ໄດ້ສະຫຼຸບ ແລະລວບລວມວ່າມີສີສັນ “ໄມ້ໄຜ່ຫວຽດນາມ”. ທ່ານນາງເອກອັກຄະລັດຖະທູດ ຢືນຢັນວ່າ: ແນວທາງການຕ່າງປະເທດການທູດທີ່ມີສີສັນ “ໄມ້ໄຜ່ຫວຽດນາມ” ແມ່ນຖືກຕ້ອງ, ປະສົບຜົນສຳເລັດທີ່ສຸດ ແລະ “ໂລກໄດ້ນິຍົມນັບຖືຕໍ່ບັນດາຜົນງານທີ່ບັນລຸໄດ້”.
ປະກອບສ່ວນອັນໃຫຍ່ຫຼວງເຂົ້າໃນການເພີ່ມພູນຄູນສ້າງສາຍພົວພັນແບບພິເສດຫວຽດນາມ - ລາວ
ທ່ານນາງເອກອັກຄະລັດຖະທູດ ຄໍາເພົາ ເອີນທະວັນ ເນັ້ນໜັກວ່າ: ເມື່ອຍັງມີຊີວິດຢູ່, ທ່ານເລຂາທິການໃຫຍ່ ຫງວຽນຝູຈ້ອງ ໄດ້ສືບທອດມູນເຊື້ອສາມັກຄີແບບພິເສດຫວຽດນາມ - ລາວ ໂດຍປະທານໂຮ່ຈີມິນ, ປະທານ ໄກສອນ ພົມວິຫານ ແລະປະທານ ສຸພານຸວົງ ກໍ່ຕັ້ງ, ການນໍາສອງພັກ, ສອງລັດ ແລະປະຊາຊົນສອງປະເທດຫຼາຍລຸ້ນໄດ້ເພີ່ມພູນຄູນສ້າງ, ປະກອບສ່ວນເຮັດໃຫ້ການພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດກາຍເປັນການພົວພັນມິດຕະພາບອັນຍິ່ງໃຫຍ່.
ທ່ານນາງເອກອັກຄະລັດຖະທູດ ໃຫ້ຮູ້ວ່າ, ໃນຖານະເປັນຜູ້ນຳພັກກອມມູນິດຫວຽດນາມ, ທ່ານເລຂາທິການໃຫຍ່ ຫງວຽນຝູຈ້ອງ ໄດ້ມາຢ້ຽມຢາມສັນຕະວະໄມຕີລາວ ຢ່າງເປັນທາງການ 3 ຄັ້ງໃນປີ 2011, 2016 ແລະ 2019. ທ່ານເລຂາທິການໃຫຍ່ ຫງວຽນຝູຈ້ອງ ຍາມໃດກໍ່ຢັ້ງຢືນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານກັບລາວ ສວມບົດບາດສຳຄັນພິເສດ ແລະແມ່ນບຸລິມະສິດແຖວໜ້າໃນນະໂຍບາຍການຕ່າງປະເທດຂອງຫວຽດນາມ; ແຜນນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນຖືເປັນສໍາຄັນການປັບປຸງ, ເພີ່ມທະວີສາຍພົວພັນສາມັກຄີ, ຄວາມສະໜິດຕິດພັນ, ຄວາມໄວ້ເນື້ອເຊື່ອໃຈກັບລາວ ໃນໄລຍະພັດທະນາໃໝ່ຂອງແຕ່ລະພັກ, ແຕ່ລະປະເທດ; ຫວຽດນາມ ສະໜັບສະໜູນພາລະກິດປ່ຽນແປງໃໝ່, ປົກປັກຮັກສາ ແລະສ້າງສາປະເທດລາວ ຢ່າງແຂງແຮງ ແລະຮອບດ້ານ.
ພິເສດ, ໃນການຢ້ຽມຢາມສັນຕະວະໄມຕີລາວ ຢ່າງເປັນທາງການໃນເດືອນ ພະຈິກ ປີ 2016, ທ່ານເລຂາທິການໃຫຍ່ ຫງວຽນຝູຈ້ອງ ໄດ້ຕາງໜ້າພັກ, ລັດ ແລະປະຊາຊົນຫວຽດນາມ ມອບຫໍສະພາແຫ່ງຊາດ ໃຫ້ພັກ, ລັດ ແລະປະຊາຊົນລາວ, ສະແດງໃຫ້ເຫັນຄວາມສາມັກຄີແບບພິເສດ, ເປັນແບບຢ່າງ, ບໍລິສຸດຜຸດຜ່ອງລະຫວ່າງສອງປະເທດ, ສອງຊາດ.
ທ່ານນາງເອກອັກຄະລັດຖະທູດລາວ ຢັ້ງຢືນວ່າ: “ທ່ານເລຂາທິການໃຫຍ່ ຫງວຽນຝູຈ້ອງ ມີນ້ຳໃຈເລິກເຊິ່ງກ້ວາງຂວາງ, ເປີດອົກເປີດໃຈ, ໄດ້ປຶກສາຫາລືຢ່າງເລິກເຊິ່ງ ແລະແບ່ງປັນຫຼາຍບົດຮຽນປະສົບການກັບການນຳຂັ້ນສູງຂອງລາວ ໃນໄລຍະຜ່ານມາ. ນັ້ນແມ່ນບົດຮຽນອັນລ້ຳຄ່າທີ່ສະຫາຍໄດ້ປະໄວ້ໃຫ້ພັກ, ລັດ ແລະປະຊາຊົນລາວ. ທ່ານເລຂາທິການໃຫຍ່ ຫງວຽນຝູຈ້ອງ ໄດ້ປະກອບສ່ວນອັນໃຫຍ່ຫຼວງເຂົ້າໃຫ້ການພົວພັນແບບພິເສດ ນັບມື້ນັບສະໜິດແໜ້ນ ແລະພັດທະນາຢ່າງບໍ່ຢຸດຢັ້ງລະຫວ່າງສອງປະເທດ ລາວ-ຫວຽດນາມ”.
ສະແດງຄວາມເສົ້າສະຫຼົດໃຈຢ່າງສຸດຊຶ້ງ, ທ່ານນາງເອກອັກຄະລັດຖະທູດ ເນັ້ນໜັກວ່າ: ການຈາກໄປຂອງທ່ານເລຂາທິການໃຫຍ່ ຫງວຽນຝູຈ້ອງ ແມ່ນການສູນເສຍເພື່ອນສະຫາຍທີ່ໃກ້ຊິດສະໜິດສະໜົມທີ່ສຸດຂອງພັກ, ລັດ ແລະປະຊາຊົນລາວ. ເພື່ອອາໄລຫາທ່ານເລຂາທິການໃຫຍ່ ຫງວຽນຝູຈ້ອງ, ພັກ ແລະລັດຖະບານລາວ ໄດ້ເຫັນດີເປັນເອກະພາບໄວ້ອາໄລລະດັບຊາດ, ລວມທັງສະຖານທູດລາວ ແລະບັນດາອົງການຕາງໜ້າການທູດລາວ ປະຈໍາຕ່າງປະເທດ, ເປັນເວລາ 2 ວັນ ແມ່ນ ວັນທີ 25 ແລະ 26 ກໍລະກົດ, ຊັກທຸງລົງເຄິ່ງເສົາ ແລະຢຸດຕິການເຄື່ອນໄຫວບັນເທີງໃນທຸກຮູບການ.
ທ່ານນາງເອກອັກຄະລັດຖະທູດ ແບ່ງປັນວ່າ: “ອານຸສອນອັນເລິກເຊິ່ງທີ່ສຸດຂອງຂ້າພະເຈົ້າກັບທ່ານເລຂາທິການໃຫຍ່ ຫງວຽນຝູຈ້ອງ ແມ່ນໄດ້ພົບປະກັບສະຫາຍທີ່ການພົບປະຂັ້ນສູງລະຫວ່າງພັກກອມມູນິດຫວຽດນາມ ແລະພັກປະຊາຊົນປະຕິວັດລາວ ໃນວັນທີ 26 ກຸມພາ 2024 ຢູ່ຮ່າໂນ້ຍ. ຂ້າພະເຈົ້າໄດ້ເຂົ້າຮ່ວມການພົບປະ ແລະໄດ້ຖ່າຍຮູບພ້ອມກັບຄະນະຜູ້ແທນຂັ້ນສູງຂອງສອງປະເທດ, ໃນນັ້ນມີທ່ານເລຂາທິການໃຫຍ່ ຫງວຽນຝູຈ້ອງ ແລະທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ. ນັ້ນຈະເປັນອະນຸສອນທີ່ໜ້າຈົດຈຳ ແລະສຳຄັນທີ່ສຸດສຳລັບຂ້າພະເຈົ້າຕະຫຼອດໄປ”.
ໂດຍ: ຈາງຫງວຽນ