ພ້ອມແລ້ວທີ່ຈະໜູນຊ່ວຍຊາວຫວຽດນາມ ອາໄສຢູ່ຕ່າງປະເທດໃນເຫດໄຟໄໝ້ສູນການຄ້າຢູ່ປະເທດໂປໂລຍ
ກປ.ອອນໄລ - ຕາມສະຖານທູດຫວຽດນາມ ປະຈຳ ໂປໂລຍ ແລ້ວ, ໃນຕອນເຊົ້າວັນທີ 12 ພຶດສະພາ, ໄດ້ເກີດໄຟໄໝ້ສູນການຄ້າທີ່ມີຮ້ານຄ້າຂອງຊາວຫວຽດນາມ ນັບຮ້ອຍຮ້ານຢູ່ເລກທີ 44 Marywilska, ນະຄອນຫຼວງ Warsaw, ປະເທດໂປໂລຍ. ຂໍ້ມູນເບື້ອງຕົ້ນໃຫ້ຮູ້ວ່າ ບໍ່ມີຜູ້ເສຍຊີວິດ, ແຕ່ຊັບສິນເກືອບທັງໝົດຖືກໄຟໄໝ້.
ທ່ານເອກອັກຄະລັດຖະທູດຫວຽດນາມ ປະຈຳ ໂປໂລຍ ຮ່າຮວ່າງຫາຍ ໃຫ້ຮູ້ວ່ານີ້ແມ່ນສູນການຄ້າໃຫຍ່ຢູ່ ໂປໂລຍ, ດ້ວຍຮ້ານຄ້າປະມານ 1.400 ຮ້ານ, ໃນນັ້ນ ຮ້ານຄ້າຂອງຊາວຫວຽດນາມ ກວມປະມານ 1/3.
![left](/image/images/left.png) ![center](/image/images/center.png) ![right](/image/images/right.png) ![del](/images/red-error_16px.gif) |
![](https://file3.qdnd.vn/data/images/26/2024/05/13/upload_2123/chay.jpg?dpi=150&quality=100&w=500) |
ເຫດໄຟໄໝ້ສູນການຄ້າຢູ່ປະເທດໂປໂລຍ. ພາບ: VOV |
ພາຍຫຼັງເກີດເຫດດັ່ງກ່າວ, ກະຊວງການຕ່າງປະເທດຫວຽດນາມ ໄດ້ຊີ້ນຳສະຖານທູດຫວຽດນາມ ປະຈຳໂປໂລຍ ຈັດຄະນະປະຕິບັດງານລົງສະຖານທີ່ເກີດເຫດ, ພ້ອມທັງສົມທົບກັນຢ່າງແໜ້ນແຟ້ນກັບບັນດາອົງການທີ່ກ່ຽວຂ້ອງຂອງປະເທດປະຈໍາຖິ່ນ, ແລະສະມາຄົມຊາວຫວຽດນາມ ອາໄສຢູ່ ໂປໂລຍ ເພື່ອກໍາແໜ້ນສະພາບການ, ລະດົມກໍາລັງໃຈ, ຢ້ຽມຢາມຖາມຂ່າວພໍ່ແມ່ປະຊາຊົນ ແລະຜັນຂະຫຍາຍວຽກງານປົກປ້ອງພົນລະເມືອງໂດຍໄວ.
ສະຖານທູດຫວຽດນາມ ປະຈໍາ ໂປໂລຍ ໄດ້ແຈ້ງເບີໂທສາຍດ່ວນກ່ຽວກັບການປົກປ້ອງພົນລະເມືອງເພື່ອຮັບເອົາຂໍ້ມູນຈາກຊາວຫວຽດນາມ ອາໄສຢູ່ຕ່າງປະເທດ, ກຽມພ້ອມໜູນຊ່ວຍພໍ່ແມ່ປະຊາຊົນໃນການເຮັດວຽກກັບບັນດາອົງການທີ່ກ່ຽວຂ້ອງຂອງປະເທດປະຈໍາຖິ່ນ, ຄະນະຄຸ້ມຄອງສູນການຄ້າ, ກໍາລັງດັບເພິງ ແລະປະກັນໄພເພື່ອຫຼຸດຜ່ອນຜົນຮ້າຍຈາກເຫດໄຟໄໝ້. ຄຽງຂ້າງກັນນັ້ນ, ສຳລັບພໍ່ແມ່ປະຊາຊົນສູນເສຍເອກະສານໃນເຫດໄຟໄໝ້, ສະຖານທູດຫວຽດນາມ ປະຈຳ ໂປໂລຍ ພ້ອມແລ້ວທີ່ຈະໜູນຊ່ວຍໃຫ້ເຂົາເຈົ້າໃນການອອກໜັງສືເອກະສານໃໝ່ໂດຍໄວ. ສະຖານທູດຫວຽດນາມ ປະຈຳ ໂປໂລຍ ກໍ່ຮຽກຮ້ອງໃຫ້ບັນດາອົງການທີ່ກ່ຽວຂ້ອງຂອງ ໂປໂລຍ ດຳເນີນການສືບສວນສາເຫດທີ່ເກີດໄຟໄໝ້ໂດຍໄວ, ເພື່ອຮັບປະກັນສິດ ແລະຜົນປະໂຫຍດຂອງພົນລະເມືອງຫວຽດນາມ.
ໂດຍ: ໄຊນີດາ