ເນື່ອງໃນໂອກາດນີ້, ທ່ານ Marco Farani ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ບຣາຊິນ ປະຈຳ ຫວຽດນາມ ໄດ້ຕອບສຳພາດຕໍ່ສື່ມວນຊົນກ່ຽວກັບເນື້ອໃນທີ່ກ່ຽວຂ້ອງເຖິງການຢ້ຽມຢາມ ແລະການພົວພັນຮ່ວມມືສອງຝ່າຍ.

ນັກຂ່າວ: ທ່ານເອກອັກຄະລັດຖະທູດ ມີຄວາມຫວັງຫຍັງແດ່ສຳລັບການຢ້ຽມຢາມ ບຣາຊິນ ຢ່າງເປັນທາງການຂອງທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ?

ທ່ານເອກອັກຄະລັດຖະທູດ Marco Farani: ຂ້າພະເຈົ້າ ຖືວ່າ ການພົວພັນລະຫວ່າງ ບຣາຊິນ ແລະຫວຽດນາມ ມີແງ່ຫວັງຫຼາຍຢ່າງເຖິງວ່າສອງປະເທດຢູ່ຫ່າງໄກກັນກໍ່ຕາມ. ຂ້າພະເຈົ້າ ຈື່ໄດ້ວ່າ ທ່ານປະທານາທິບໍດີ Luiz Inácio Lula da Silva  (ພວມດໍາລົງຕໍາແໜ່ງປະທານາທິບໍດີອາຍຸການທີ 3 ຂອງ ບຣາຊິນ) ເຄີຍມາຢ້ຽມຢາມຫວຽດນາມ ແລະຂ້າພະເຈົ້າຄິດວ່າ ທ່ານປະທານາທິບໍດີ ອາດຈະກັບມາຢ້ຽມຢາມຫວຽດນາມ ອີກຄັ້ງໜຶ່ງໃນໄລຍະມໍ່ໆນີ້.

ທ່ານປະທານາທິບໍດີ Luiz Inácio Lula da Silva  ໄດ້ຮັບຄໍາເຊີນໃຫ້ມາຢ້ຽມຢາມຫວຽດນາມ ຈາກທ່ານປະທານປະເທດ ຫວໍວັນເຖືອງ. ປີຈະມາເຖິງ, ສອງປະເທດຈະ ສະເຫຼີມສະຫຼອງ 35 ປີແຫ່ງວັນສ້າງຕັ້ງການພົວພັນທາງການທູດ ແລະຂ້າພະເຈົ້າ ຄິດວ່າ ມັນແມ່ນໂອກາດທີ່ດີ ເພື່ອໃຫ້ທ່ານປະທານາທິບໍດີ ບຣາຊິນ ມາຢ້ຽມຢາມ ຫວຽດນາມ.

leftcenterrightdel
ທ່ານນາຍົກລັດຖະມົນຕີ ຟ້າມມິງຈິ໊ງ ພົບປະກັບທ່ານ Luiz Inácio Lula da Silva ປະທານາທິບໍດີ ບຣາຊິນ ເນື່ອງໃນໂອກາດເຂົ້າຮ່ວມກອງປະຊຸມສຸດຍອດ G7,  ໃນຕອນບ່າຍວັນທີ 21 ພຶດສະພາ 2023. ພາບ: ສຳນັກຂ່າວສານຫວຽດນາມ.

ບຣາຊິນ ແລະຫວຽດນາມ ຮັກສາການພົວພັນຮ່ວມມືສອງຝ່າຍຮອບດ້ານດ້ວຍພື້ນຖານແມ່ນການພົວພັນຢ່າງດຸ່ນດ່ຽງ ແລະເຄົາລົບກັນ. ທ່ານປະທານາທິບໍດີ Lula da Silva ແລະທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ພົບປະໃນຂອບເຂດກອງປະຊຸມສຸດຍອດ G7 ເປີດກວ້າງທີ່ໄດ້ຈັດຕັ້ງຢູ່ Hiroshima (ຍີ່ປຸ່ນ) ໃນເດືອນ 6 ປີກາຍ. ເນື່ອງໃນໂອກາດນີ້, ທ່ານປະທານາທິບໍດີ Lula da Silva  ໄດ້ເຊີນທ່ານນາຍົກລັດຖະມົນຕີ ມາຢ້ຽມຢາມ ບຣາຊິນ.

ພວກຂ້າພະເຈົ້າ ມີຄວາມປິຕິຊົມຊື່ນ ແລະຄອງຄອຍການຢ້ຽມຢາມຢ່າງເປັນທາງການຂອງທ່ານນາຍົກລັດຖະມົນຕີ ຟ້າມມິງຈິ໊ງ. ການຢ້ຽມຢາມຂອງທ່ານນາຍົກລັດຖະມົນຕີ ຟ້າມມິງຈິ໊ງ ຈະນຳສອງປະເທດຍັບເຂົ້າໃກ້ກັນກວ່າ ແລະເປີດກາລະໂອກາດຮ່ວມມືລະຫວ່າງສອງປະເທດໃນຫຼາຍຂົງເຂດ.

ນັກຂ່າວ: ປະຈຸບັນ, ບຣາຊິນ ແມ່ນຄູ່ຮ່ວມມືການຄ້າແຖວໜ້າຂອງຫວຽດນາມ ຢູ່ພາກພື້ນ ອາເມລິກາ ລາຕິນ, ທ່ານເອກອັກຄະລັດຖະທູດ ມີຂໍ້ສັງເກດຄືແນວໃດກ່ຽວກັບຄວາມສາມາດບົ່ມຊ້ອນການຮ່ວມມືດ້ານເສດຖະກິດສອງຝ່າຍໃນໄລຍະຈະມາເຖິງ?

ທ່ານເອກອັກຄະລັດຖະທູດ Marco Farani:  ດຸ່ນການຄ້າລະຫວ່າງສອງປະເທດບັນລຸປະມານ 7 ຕື້ໂດລາສະຫະລັດ, ເຖິງຢ່າງໃດກໍ່ຕາມ, ຍັງມີຄວາມສາມາດບົ່ມຊ້ອນອັນໃຫຍ່ຫຼວງທີ່ຕ້ອງໄດ້ຂຸດຄົ້ນໃນຂົງເຂດກະສິກຳ, ພະລັງງານສີຂຽວ ແລະການປ້ອງກັນຊາດ. ບຣາຊິນ ແມ່ນໜຶ່ງໃນບັນດາພື້ນຖານເສດຖະກິດໃຫຍ່ທີ່ສຸດໃນໂລກ, ຢືນອັນດັບທີ 9 ຫຼືທີ 10 ໃນໂລກກ່ຽວກັບຂອບຂະໜາດພື້ນຖານເສດຖະກິດ.

ການມີໜ້າຂອງສິນຄ້າສົ່ງອອກຂອງ ບຣາຊິນ ມາຍັງບັນດາປະເທດ ອາຊີຕາເວັນອອກສ່ຽງໃຕ້ ສາມາດພິສູດໄດ້ດ້ວຍການເຕີບໂຕການຄ້າລະຫວ່າງ ບຣາຊິນ ກັບພາກພື້ນ (ແຕ່ 15,1 ຕື້ໂດລາສະຫະລັດ ໄດ້ເພີ່ມຂຶ້ນເປັນ 28,9 ຕື້ໂດລາສະຫະລັດ). ພຽງແຕ່ເຄິ່ງປີ 2022, ການຄ້າຂອງ ບຣາຊິນ ກັບອາຊຽນ ໄດ້ເພີ່ມຂຶ້ນ 91%, ບັນລຸ 17 ຕື້ໂດລາສະຫະລັດ. ປີ 2022, ບຣາຊິນ ກາຍເປັນຄູ່ຮ່ວມມືເຈລະຈາຕາມຂົງເຂດຂອງອາຊຽນ ຍ້ອນມີການໜູນຊ່ວຍອັນລ້ຳຄ່າຂອງຫວຽດນາມ. ເນື່ອງໃນໂອກາດນີ້, ຂ້າພະເຈົ້າ ຢາກສະແດງຄວາມຮູ້ບຸນຄຸນຂອງພວກຂ້າພະເຈົ້າຕໍ່ກັບລັດຖະບານຫວຽດນາມ.

ບຣາຊິນ ມີຄວາມປະເອີບໃຈກ່ຽວກັບການເຕີບໂຕ ແລະຄວາມຂະຫຍັນຂັນເຄື່ອນຂອງພື້ນຖານເສດຖະກິດຫວຽດນາມ. ຫວຽດນາມ ແມ່ນປະເທດມີລະດັບການເຕີບໂຕໄວ, ສາມາດກາຍເປັນປະເທດທີ່ມີລາຍຮັບປານກາງໃນ 10 ປີຈະມາເຖິງ. ບຣາຊິນ ມີປະຊາກອນ 220 ລ້ານຄົນ - ຈຳນວນປະຊາກອນຫຼາຍ. ບຣາຊິນ ຮັ່ງມີໄປດ້ວຍຊັບພະຍາກອນ  ແລະກໍ່ມີພື້ນຖານກະສິກຳພັດທະນາກະໂດດຂັ້ນ. ເພາະສະນັ້ນ, ມີຫຼາຍຂົງເຂດ ເຊິ່ງພວກເຮົາສາມາດຮ່ວມມືນຳກັນໄດ້.

ຂົງເຂດຮ່ວມມືສຳຄັນອື່ນ ເຊິ່ງຂ້າພະເຈົ້າຄິດວ່າມີແງ່ຫວັງທີ່ສຸດແມ່ນພະລັງງານທົດແທນ. ຢູ່ ບຣາຊິນ, 90%  ພະລັງງານໄຟຟ້າໄດ້ຜະລິດຈາກພະລັງງານທົດແທນ ແລະນັ້ນແມ່ນສິ່ງທີ່ພວກຂ້າພະເຈົ້າສາມາດແບ່ງປັນກັບຫວຽດນາມ ແລະສາມາດຊ່ວຍຫວຽດນາມ ຫຼຸດຜ່ອນການປ່ອຍອາຍພິດໃນອະນາຄົດ.

ນັກຂ່າວ: ການເຕີບໂຕສີຂຽວ, ຍືນຍົງແມ່ນການກຳນົດທິດພັດທະນາທີ່ຫຼາຍປະເທດໃນໂລກກຳລັງເອົາໃຈໃສ່ເປັນພິເສດ, ໃນນັ້ນມີຫວຽດນາມ ແລະບຣາຊິນ. ຕາມທ່ານເອກອັກຄະລັດຖະທູດແລ້ວ, ສອງຝ່າຍສາມາດຮ່ວມມືກັນຄືແນວໃດໃນຂົງເຂດນີ້?

ທ່ານເອກອັກຄະລັດຖະທູດ Marco Farani:  ບຣາຊິນ ແມ່ນແບບຢ່າງພົ້ນເດັ່ນກ່ຽວກັບການພັດທະນາເສດຖະກິດສີຂຽວ. ປະມານ 90% ພະລັງງານຂອງ ບຣາຊິນ ໃນໄລຍະປະຈຸບັນແມ່ນພະລັງງານທົດແທນ. ໝາກຜົນນີ້ແມ່ນແຫຼ່ງບັນດານໃຈ ແລະຄວາມຫວັງແທ້ຈິງໃຫ້ທົ່ວໂລກ. ການຫັນປ່ຽນພະລັງງານແມ່ນຄວາມຈຳເປັນ  ເພື່ອແນໃສ່ປະຕິບັດບັນດາຄຳໝັ້ນສັນຍາທີ່ໄດ້ຍົກອອກ - ຫຼຸດຜ່ອນການປ່ອຍອາຍພິດລົງລະດັບ 0 ເຖິງປີ 2050. ການນຳໃຊ້ ethanol ໄດ້ພັດທະນາຢູ່ ບຣາຊິນ ມາປະມານ 50 ປີແລ້ວ, ເມື່ອເກີດວິກິດການນ້ຳມັນ ເທື່ອທຳອິດ, ເພາະສະນັ້ນ, ປະຈຸບັນມີໂຄງການບຳບັດກາກບອນໃຫຍ່ທີ່ສຸດ ແລະສຳເລັດທີ່ສຸດໃນໂລກ. ປະຈຸບັນ, ລົດໂອໂຕທີ່ຜະລິດຢູ່ ບຣາຊິນ 93%  ໄດ້ສະໜອງພະລັງງານດ້ວຍເຊື້ອໄຟສີຂຽວ ແລະທົດແທນ.

ຄືແນວນັ້ນ, ພວກເຮົາອາດຈະແບ່ງປັນບົດຮຽນນີ້ກັບຫວຽດນາມ, ພິເສດແມ່ນໃນຂົງເຂດ ethanol  ເພື່ອໃຫ້ຫວຽດນາມ ສາມາດບັນລຸໄດ້ເປົ້າໝາຍຫຼຸດຜ່ອນອາຍພິດລົງລະດັບ 0 ໃນປີ 2050. ເສດຖະກິດສີຂຽວແມ່ນບັນຫາສຳລັບທຸກປະເທດ ແລະກໍ່ແມ່ນຄຳໝັ້ນສັນຍາ ເຊິ່ງທຸກໆປະເທດພວມປະຕິບັດ.

ນັກຂ່າວ: ທ່ານເອກອັກຄະລັດຖະທູດມີຄວາມຫວັງໃດແດ່ຕໍ່ກັບແງ່ຫວັງຮ່ວມມືລະຫວ່າງສອງປະເທດຢູ່ລະດັບສອງຝ່າຍ ແລະຫຼາຍຝ່າຍໃນໄລຍະຈະມາເຖິງ?

ທ່ານເອກອັກຄະລັດຖະທູດ Marco Farani:  ຂ້າພະເຈົ້າ ຖືວ່າ ຫວຽດນາມ ແລະ ບຣາຊິນ ມີແງ່ຫວັງຫຼາຍຢ່າງໃນການຮ່ວມມືດ້ານການຄ້າ, ການທ່ອງທ່ຽວ, ກະສິກຳ, ພະລັງງານ ແລະການສຶກສາ. ຄຽງຂ້າງກັນນັ້ນ, ຂ້າພະເຈົ້າຫວັງວ່າ ສອງປະເທດ ຈະມີການເຊື່ອມຕໍ່ດ້ານການເມືອງ, ການປຶກສາຫາລືດ້ານການເມືອງ. ທັງສອງປະເທດລ້ວນແຕ່ຕັ້ງຢູ່ເຄິ່ງຊີກໂລກໃຕ້. ສອງປະເທດມີຄວາມຄາດຫວັງຄ້າຍຄືກັນ ແລະລ້ວນແຕ່ແມ່ນບັນດາປະເທດໄປນຳໜ້າ ແລະມີຄວາມສຳຄັນພິເສດໃນພາກພື້ນ. ເພາະສະນັ້ນ, ສິ່ງສຳຄັນແມ່ນການນຳສອງທ່ານຂອງຫວຽດນາມ - ບຣາຊິນ ພົບປະກັນ ແລະເລີ່ມປຶກສາຫາລືກ່ຽວກັບບັນຫານີ້.

ໃນຂອບເຂດສາກົນ, ບຣາຊິນ ຫາກໍ່ດຳລົງຕຳແໜ່ງປະທານໝູນວຽນຂອງກຸ່ມຕະຫຼາດລວມອາເມລິກາໃຕ້ (Mercosur).  ດ້ວຍບົດບາດນີ້, ບຣາຊິນ ຈະມານະພະຍາຍາມເພີ່ມທະວີການເຈລະຈາພາຍໃນກຸ່ມ, ເພື່ອເປີດກວ້າງການຄ້າເສລີລະຫວ່າງບັນດາຕະຫຼາດພາກພື້ນ. ສັນຍາການຄ້າເສລີລະຫວ່າງ Mercosur ແລະ ຫວຽດນາມ ແມ່ນເປົ້າໝາຍຂອງທັງສອງຝ່າຍ. ທ່ານປະທານາທິບໍດີ Lula ໄດ້ຖະແຫຼງວ່າ ທ່ານຈະເຮັດວຽກກັບການນຳຄົນອື່ນໆພາຍໃນກຸ່ມ Mercosur ເພື່ອຍູ້ລະດັບຄວາມໄວໃນການເຮັດຂໍ້ຕົກລົງກັບຫວຽດນາມ.

ເລີ່ມເຂົ້າປີ 2024 ນີ້, ບຣາຊິນ ຈະດຳລົງຕໍາແໜ່ງປະທານ G20.  ນີ້ແມ່ນກາລະໂອກາດ ເພື່ອຊຸກຍູ້ການສົມທົບລະຫວ່າງບັນດາສະມາຊິກເພື່ອປົກປ້ອງປະຊາຄົມສາກົນສະເໝີພາບ, ຍືນຍົງ ແລະມີສັນຕິພາບກວ່າ.

ນັກຂ່າວ: ຂໍຂອບໃຈທ່ານເອກອັກຄະລັດຖະທູດ!

ໂດຍ: ແສງເດືອນ