ທ່ານ ຫງວຽນຊວນຟຸກ ປະທານປະເທດຫວຽດນາມ ສິ້ນສຸດການເຂົ້າຮ່ວມວາລະປຶກສາຫາລືລວມຂັ້ນສູງສະມັດຊາໃຫຍ່ ສປຊ ສະໄໝທີ 76 ຢ່າງຈົບງາມ
ກປ.ອອນໄລ - ຕອນບ່າຍວັນທີ 24 ກັນຍາ (ຕາມເວລາທ້ອງຖິ່ນ), ທ່ານ ຫງວຽນຊວນຟຸກ ປະທານປະເທດຫວຽດນາມ ແລະຄະນະຜູ້ແທນຂັ້ນສູງຫວຽດນາມ ໄດ້ອອກຈາກນະຄອນນິວຢອກ ເດີນທາງກັບເມືອປະເທດ, ສິ້ນສຸດການເຂົ້າຮ່ວມວາລະປຶກສາຫາລືລວມຂັ້ນສູງຂອງສະມັດຊາໃຫຍ່ ສປຊ ສະໄໝທີ 76 ແລະປະຕິບັດບັນດາການເຄື່ອນໄຫວສອງຝ່າຍຢູ່ ອາເມລິກາ ໃນລະຫວ່າງວັນທີ 21-24 ກັນຍາ ຢ່າງຈົບງາມ.
ກ່ອນໜ້ານັ້ນ, ໃນວັນທີ 24 ກັນຍາ, ໃນຂອບເຂດການເຄື່ອນໄຫວຂອງການປະຕິບັດງານເຂົ້າຮ່ວມວາລະປຶກສາຫາລືລວມຂັ້ນສູງຂອງສະມັດຊາໃຫຍ່ ສປຊ ສະໄໝທີ 76 ຢູ່ ນະຄອນນິວຢອກ, ທ່ານ ຫງວຽນຊວນຟຸກ ໄດ້ມີການພົບປະກັບທ່ານ Frank-Walter Steinmeier ປະທານາທິບໍດີເຢຍລະມັນ.
|
|
ທ່ານ ຫງວຽນຊວນຟຸກ ປະທານປະເທດຫວຽດນາມ ສິ້ນສຸດການປະຕິບັດງານຢູ່ ສະມັດຊາໃຫຍ່ ສປຊ. ພາບ: ສໍານັກຂ່າວສານຫວຽດນາມ. |
ທ່ານ ຫງວຽນຊວນຟຸກ ປະທານປະເທດໄດ້ຂອບໃຈລັດຖະບານເຢຍລະມັນ ໄດ້ໜູນຊ່ວຍວັກຊິນໃຫ້ຫວຽດນາມ ແບບໂດຍກົງ ແລະຜ່ານໂຄງການໂຄແວັກ, ພ້ອມກັບວັດຖຸອຸປະກອນການແພດທີ່ຈໍາເປັນເພື່ອໜູນຊ່ວຍຫວຽດນາມ ໃນການປ້ອງກັນ, ຕ້ານພະຍາດໂຄວິດ-19. ທ່ານປະທານປະເທດ ສະເໜີ ເຢຍລະມັນ ສືບຕໍ່ເອົາໃຈໃສ່, ສ້າງເງື່ອນໄຂສະດວກເພື່ອໃຫ້ປະຊາຄົມຊາວຫວຽດນາມ ຢູ່ເຢຍລະມັນ ເຊື່ອມຕົວຢ່າງເລິກເຊິ່ງກວ້າງຂວາງເຂົ້າສັງຄົມປະເທດນີ້.
ການນໍາສອງທ່ານເຫັນດີເປັນເອກະພາບສືບຕໍ່ສົມທົບກັນຢ່າງແໜ້ນແຟ້ນຢູ່ເວທີປາໄສຫຼາຍຝ່າຍ, ຜ່ານນັ້ນປະກອບສ່ວນຮັກສາສັນຕິພາບ, ຊຸກຍູ້ການເຄົາລົບກົດໝາຍສາກົນ. ໃນວັນດຽວກັນ, ທ່ານ ຫງວຽນຊວນຟຸກ ໄດ້ວາງພວງມາລາທີ່ອະນຸສາວະລີແຫ່ງຊາດ 11 ກັນຍາ-ກິດຈະການອາໄລຫາຜູ້ຖືກເຄາະຮ້າຍຈາກການບຸກໂຈມຕີກໍ່ການຮ້າຍໃສ່ຕຶກອາຄານຂອງສູນການຄ້າໂລກທີ່ນະຄອນນິວຢອກໃນ ວັນທີ 11 ກັນຍາ 2001.
ໂດຍ: ເກື່ອງດັ້ງ