ເພີ່ມທະວີການພົວພັນມິດຕະພາບ ແລະຮ່ວມມືລະຫວ່າງຫວຽດນາມ ແລະໂຄສຕາ ຣິກາ
ກປ.ອອນໄລ - ເນື່ອງໃນໂອກາດສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ສສ ຫວຽດນາມ ແລະສ. ໂຄສຕາ ຣິກາ (24/4/1976 - 24/4/2021), ຕອນເຊົ້າວັນທີ 29 ເມສາ, ທ່ານ ບຸ່ຍແທັງເຊີນ ລັດຖະມົນຕີການຕ່າງປະເທດຫວຽດນາມ ໄດ້ມີການໂອ້ລົມສົນທະນາຜ່ານລະບົບທາງໄກກັບທ່ານ Rodolfo Solano Quiros ລັດຖະມົນຕີການຕ່າງປະເທດ ແລະການເຫຼື້ອມໃສແຫ່ງ ສ. ໂຄສຕາ ຣິກາ ເພື່ອແລກປ່ຽນກ່ຽວກັບທິດທາງ ແລະມາດຕະການຢ່າງລະອຽດ, ແນໃສ່ເພີ່ມທະວີການພົວພັນມິດຕະພາບ, ການຮ່ວມມືລະຫວ່າງສອງປະເທດ.
ໃນການໂອ້ລົມສົນທະນາ, ລັດຖະມົນຕີສອງທ່ານໄດ້ສະແດງຄວາມພາກພູມໃຈຕໍ່ການພັດທະນາການພົວພັນຫວຽດນາມ-ໂຄສຕາ ຣິກາ ໃນເກືອບເຄິ່ງສະຕະວັດຜ່ານມາ. ສອງຝ່າຍໄດ້ເຫັນດີເປັນເອກະພາບຊຸກຍູ້ການແລກປ່ຽນຄະນະຜູ້ແທນ ແລະການພົບປະຂັ້ນຕ່າງໆກໍ່ຄືຮັກສາໄວ້ຢ່າງເປັນປະຈໍາ ແລະມີກົນໄກຢ່າງໄຫວພິບກ່ຽວກັບການທາບທາມຄຳເຫັນດ້ານການເມືອງຂັ້ນຮອງລັດຖະມົນຕີການຕ່າງປະເທດສອງປະເທດ. ລັດຖະມົນຕີສອງທ່ານໄດ້ແລກປ່ຽນກ່ຽວກັບຄວາມສາມາດເຈລະຈາບັນດາຂໍ້ຕົກລົງຮ່ວມມືສອງຝ່າຍ, ໂດຍສະເພາະແມ່ນຂົງເຂດເສດຖະກິດ, ການຄ້າ ແລະການລົງທຶນ.
|
|
ທ່ານ ບຸ່ຍແທັງເຊີນ ລັດຖະມົນຕີການຕ່າງປະເທດຫວຽດນາມ. ພາບ: ສໍານັກຂ່າວສານຫວຽດນາມ. |
ທ່ານ Rodolfo Solano Quiros ຊົມເຊີຍຫວຽດນາມ ທີ່ມີບັນດາມາດຕະການຮັບມືກັບພະຍາດໂຄວິດ-19 ມີປະສິດທິຜົນ, ຮັກສາໄດ້ທ່າເຕີບໂຕດ້ານເສດຖະກິດ. ລັດຖະມົນຕີສອງຝ່າຍເຫັນດີເປັນເອກະພາບເພີ່ມທະວີການແບ່ງປັນຂໍ້ມູນ, ອັບເດດກ່ຽວກັບສະພາບການຮັບມືກັບພະຍາດໂຄວິດ-19 ຢູ່ແຕ່ລະປະເທດ; ສົມທົບກັນຊຸກຍູ້ບັນດາຄວາມມານະພະຍາຍາມຮ່ວມມືສາກົນ, ໃນນັ້ນມີການຜະລິດ ແລະຈໍາໜ່າຍວັກຊິນຢ່າງມີປະສິດທິຜົນ.
ກ່ຽວກັບບັນຫາສາກົນ ແລະພາກພື້ນ, ລັດຖະມົນຕີສອງທ່ານເຫັນດີເປັນເອກະພາບສືບຕໍ່ສົມທົບທັດສະນະ ແລະສະໜັບສະໜູນເຊິ່ງກັນ ແລະກັນ ຢູ່ ສປຊ ກໍ່ຄືຢູ່ເວທີປາໄສຫຼາຍຝ່າຍ ແລະລະຫວ່າງພາກພື້ນ, ໃນນັ້ນມີເວທີປາໄສຮ່ວມມືອາຊີຕາເວັນອອກ-ອາເມລິກາລາຕິນ (FEALAC). ຫວຽດນາມ ຕີລາຄາສູງ ແລະຊົມເຊີຍ ໂຄສຕາ ຣິກາ ຕໍ່ການເພີ່ມທະວີການຮ່ວມມືດ້ານເສດຖະກິດ, ການຄ້າກັບພາກພື້ນຜ່ານອາຊຽນ, ເວທີປາໄສຮ່ວມມືເສດຖະກິດອາຊີ-ປາຊີຟິກ (APEC) ແລະສັນຍາຄູ່ຮ່ວມມືຮອບດ້ານ ແລະກ້າວໜ້າຂ້າມປາຊີຟິກ (CPTPP).
ໂດຍ: ດັ້ງເກື່ອງ