ທີ່ການໂອ້ລົມທາງໂທລະສັບ, ຊົມເຊີຍທ່ານ João Manuel Gonçalves Lourenço ປະທານາທິບໍດີ ອັງໂກລາ ແລະອັງໂກລາ ຫາກໍ່ດໍາລົງຕຳແໜ່ງປະທານໝູນວຽນຂອງສະຫະພາບອາຟະລິກາ (AU) ໃນປີ 2025 ປະສົບຜົນສໍາເລັດ. ທ່ານນາຍົກລັດຖະມົນຕີ ຟ້າມມິງຈິ໊ງ ເຊື່ອໝັ້ນວ່າ ດ້ວຍອິດທິພົນຊື່ສຽງ ແລະບົດບາດຂອງຕົນ, ອັງໂກລາ ຈະສືບຕໍ່ເສີມຂະຫຍາຍບົດບາດຊຸກຍູ້ສັນຕິພາບ, ສະຖຽນລະພາບຢູ່ພາກພື້ນ, ສ້າງພື້ນຖານອັນໝັ້ນແກ່ນໃຫ້ອາຟະລິກາ ເຊື່ອມໂຍງ ແລະພັດທະນາວັດທະນາຖາວອນ.

leftcenterrightdel
ທ່ານນາຍົກລັດຖະມົນຕີ ຟ້າມມິງຈິ໊ງ ໂອ້ລົມທາງໂທລະສັບກັບທ່ານ João Manuel Gonçalves Lourenço ປະທານາທິບໍດີ ອັງໂກລາ. ພາບ: ສໍານັກຂ່າວສານຫວຽດນາມ

ກ່ຽວກັບການພົວພັນສອງຝ່າຍ, ທ່ານນາຍົກລັດຖະມົນຕີ ສະເໜີວ່າສອງປະເທດຄວນສືບຕໍ່ສົມທົບກັນຢ່າງແໜ້ນແຟ້ນແນໃສ່ຜັນຂະຫຍາຍຄຳໝັ້ນສັນຍາ, ຂໍ້ຕົກລົງທີ່ບັນລຸໄດ້ໃນການຢ້ຽມຢາມທາງລັດຖະກິດຢູ່ ອັງໂກລາ ຂອງທ່ານປະທານປະເທດ ເລືອງເກື່ອງ ໃນເດືອນ ສິງຫາ 2025 ຢ່າງມີປະສິດທິຜົນ, ພິເສດແມ່ນໃນຂົງເຂດທີ່ມີທ່າແຮງ, ຄື: ການຄ້າ, ການລົງທຶນ, ກະສິກຳ ແລະຄວາມໝັ້ນຄົງດ້ານພະລັງງານ, ນຳວົງເງິນການຄ້າສອງຝ່າຍບັນລຸ 1 ຕື້ໂດລາສະຫະລັດ ໂດຍໄວໃນໄລຍະຈະມາເຖິງ, ຕາມຈິດໃຈຂອງຖະແຫຼງການຮ່ວມກ່ຽວກັບກໍານົດທິດການພັດທະນາການພົວພັນ ຫວຽດນາມ-ອັງໂກລາ ໃນໄລຍະໃໝ່. ທ່ານນາຍົກລັດຖະມົນຕີ ກໍ່ສະເໜີວ່າສອງຝ່າຍຊຸກຍູ້ການຜັນຂະຫຍາຍກົນໄກຮ່ວມມືທີ່ມີຢູ່ແລ້ວ, ຄື: ຄະນະກຳມະການລະຫວ່າງລັດຖະບານ, ປຶກສາຫາລືດ້ານການເມືອງລະຫວ່າງສອງກະຊວງການຕ່າງປະເທດ ແລະສຳເລັດການເຈລະຈາໂດຍໄວ ເພື່ອມຸ່ງໄປເຖິງການລົງນາມໃນສັນຍາສົ່ງເສີມ ແລະປົກປ້ອງການລົງທຶນ ແລະສັນຍາຫຼີກລ່ຽງການເກັບພາສີຊ້ອນ.

ທ່ານນາຍົກລັດຖະມົນຕີ ປາດຖະໜາວ່າ ອັງໂກລາ, ດ້ວຍອິດທິພົນຊື່ສຽງ ແລະທີ່ຕັ້ງຂອງຕົນໃນ AU,  ຕັ້ງໜ້າສະໜັບສະໜູນຫວຽດນາມ ເພີ່ມທະວີການພົວພັນແທດຈິງກັບ AU, ພິເສດແມ່ນບັນດາຂົງເຂດບຸລິມະສິດໃນໂຄງການດໍາເນີນງານວິໄສທັດ 2063, ຄື: ການຮັກສາ ສັນຕິພາບ, ກະສິກຳ, ສາທາລະນະສຸກ, ການສຶກສາ, ການຫັນເປັນດີຈີຕອນ, ພ້ອມທັງຢືນຢັນວ່າ ຫວຽດນາມ ພ້ອມແລ້ວທີ່ຈະໜູນຊ່ວຍ ອັງໂກລາ ໃນການຊຸກຍູ້ການພົວພັນກັບບັນດາປະເທດອາຊຽນ.

ສ່ວນທ່ານ João Manuel Gonçalves Lourenço ຢືນຢັນວ່າ ຍາມໃດກໍ່ຕີລາຄາສູງການພົວພັນມິດຕະພາບ, ການຮ່ວມມືອັນດີງາມກັບຫວຽດນາມ, ພ້ອມແລ້ວທີ່ຈະຮັບຟັງ ແລະຊຸກຍູ້ກາລະໂອກາດຮ່ວມມືລະຫວ່າງສອງພື້ນຖານເສດຖະກິດ. ທ່ານປະທານາທິບໍດີ ຫວັງວ່າ ສອງປະເທດຈະສືບຕໍ່ຊຸກຍູ້ການເຄື່ອນໄຫວແລກປ່ຽນຄະນະຜູ້ແທນລະຫວ່າງລັດຖະບານ ແລະວິສາຫະກິດຂອງສອງຝ່າຍແນໃສ່ປະກອບສ່ວນເຮັດໃຫ້ການພົວພັນຮ່ວມມືຫຼາຍດ້ານ, ຫັນບັນດາຂໍ້ຕົກລົງ, ຄຳໝັ້ນສັນຍາຂອງການນຳສອງປະເທດໃຫ້ປະກົດຜົນເປັນຈິງ.

ໂດຍ: ເຈິ່ນຮວ່ຽນ