ທີ່ການໂອ້ລົມທາງໂທລະສັບ, ທ່ານນາຍົກລັດຖະມົນຕີ ຟ້າມມິງຈີ໊ງ ສະເໜີສືບຕໍ່ໃຫ້ບຸລິມະສິດເປີດກວ້າງ ແລະຍົກລະດັບເຄືອຂ່າຍບັນດາເຂດອຸດສາຫະກຳ ຫວຽດນາມ-ສິງກະໂປ (VSIP) ເປັນລຸ້ນທີ 2; ສູ້ຊົນໃຫ້ບັນລຸ 30 VSIP ໃນປີ 2026. ພ້ອມທັງສະເໜີ ສິງກະໂປ ສືບຕໍ່ເພີ່ມທະວີການນໍາເຂົ້າປະເພດສິນຄ້າຜະລິດຕະພັນກະເສດ; ຈັດຕັ້ງປະຕິບັດບົດບັນທຶກຊ່ວຍຈໍາວ່າດ້ວຍການຮ່ວມມືດ້ານການຄ້າເຂົ້າສານຢ່າງມີປະສິດທິຜົນ, ຮັບປະກັນຄວາມໝັ້ນຄົງດ້ານສະບຽງອາຫານ. ສອງປະເທດກໍ່ຄວນຮ່ວມມືຢ່າງແໜ້ນແຟ້ນໃນການກໍ່ສ້າງ ແລະພັດທະນາສູນການເງິນສາກົນ; ສົ່ງເສີມທະນາຄານ, ກອງທຶນລົງທຶນ ແລະວິສາຫະກິດເຕັກໂນໂລຢີການເງິນຂອງສິງກະໂປ ເປີດກວ້າງການລົງທຶນ ແລະການເຄື່ອນໄຫວຍາວນານຢູ່ຫວຽດນາມ.

leftcenterrightdel
ທ່ານນາຍົກລັດຖະມົນຕີ ຟ້າມມິງຈີ໊ງ ໂອ້ລົມທາງໂທລະສັບກັບທ່ານ Lawrence Wong ນາຍົກລັດຖະມົນຕີ ສິງກະໂປ. ພາບ: baochinhphu.vn

ທ່ານນາຍົກລັດຖະມົນຕີ ຟ້າມມິງຈີ໊ງ ສະເໜີສອງຝ່າຍຜັນຂະຫຍາຍວຽກງານສຳຫຼວດໂຄງການໄຟຟ້າໃຊ້ພະລັງແຮງລົມຢູ່ນອກຝັ່ງທະເລຫວຽດນາມ ເພື່ອສົ່ງອອກໄຟຟ້າໄປຍັງ ສິງກະໂປ ຢ່າງຮີບດ່ວນ; ຍູ້ແຮງການຮ່ວມມືໃນຂົງເຂດແລກປ່ຽນສິນເຊື່ອກາກບອນ; ຫວັງວ່າ ສິງກະໂປ ຈະຄົ້ນຄວ້າ ແລະເປີດສາຍການບິນໂດຍກົງຈາກສິງກະໂປ ໄປຍັງນະຄອນໃຫຍ່ຂອງຫວຽດນາມ ຕື່ມອີກ, ຊຸກຍູ້ການທ່ອງທ່ຽວ.

ສ່ວນທ່ານນາຍົກລັດຖະມົນຕີ Lawrence Wong ເຫັນດີເປັນເອກະພາບຕັ້ງໜ້າການຮ່ວມມືດ້ານພະລັງງານສະອາດ, ຂົງເຂດການຄ້າ, ການປ້ອງກັນຊາດ-ປ້ອງກັນຄວາມສະຫງົບ. ພ້ອມທັງຢືນຢັນຈະສືບຕໍ່ໜູນຊ່ວຍຫວຽດນາມ ໃນການພັດທະນາຊັບພະຍາກອນມະນຸດ, ສົ່ງເສີມມະຫາວິທະຍາໄລສິງກະໂປ ໃຫ້ທຶນການສຶກສາ.

ສອງຝ່າຍໃຫ້ຄຳໝັ້ນສັນຍາຈະສົມທົບກັນຢ່າງແໜ້ນແຟ້ນ, ເສີມຂະຫຍາຍປະສິດທິຜົນໃນປີ 2027 ເມື່ອຫວຽດນາມ ເປັນເຈົ້າພາບຈັດຕັ້ງປີ APEC ແລະສິງກະໂປ ດໍາລົງບົດບາດເປັນປະທານອາຊຽນ.

ໂດຍ: ເຈິ່ນຮວ່ຽນ