    |
 |
|
ທ່ານພົນເອກ ຟານວັນຢາງ ກ່າວຄໍາເຫັນທີ່ກອງປະຊຸມ. ພາບ: qdnd.vn |
ກ່າວຄຳເຫັນທີ່ກອງປະຊຸມ, ທ່ານພົນເອກ ຟານວັນຢາງ ສະເໜີໃຫ້ຄະນະສະມາຊິກສະພາແຫ່ງຊາດແຂວງ ໄທງວຽນ ຮັບເອົາຄຳສະເໜີຂອງຜູ້ມີສິດເລືອກຕັ້ງ, ສັງລວມ ແລະສົ່ງໃຫ້ສະພາແຫ່ງຊາດ, ລັດຖະບານ, ອົງການທີ່ມີສິດອໍານາດທີ່ກ່ຽວຂ້ອງ ພິຈາລະນາ, ມີມາດຕະການທີ່ເໝາະສົມ. ອະທິບາຍຄຳສະເໜີຂອງຜູ້ມີສິດເລືອກຕັ້ງ, ທ່ານພົນເອກ ຟານວັນຢາງ ໃຫ້ຮູ້ວ່າ, ຄະນະສະມາຊິກສະພາແຫ່ງຊາດແຂວງໄທງວຽນ ຍາມໃດກໍ່ເອົາໃຈໃສ່ ແລະໄດ້ສະເໜີຫຼາຍເນື້ອໃນທີ່ຜູ້ມີສິດເລືອກຕັ້ງ ແລະປະຊາຊົນໃຫ້ຄວາມສົນໃຈ. ສໍາລັບຂໍ້ຕິດຂັດຈໍານວນໜຶ່ງ, ອົງການທີ່ກ່ຽວຂ້ອງ ພວມຄົ້ນຄວ້າມາດຕະການແກ້ໄຂ, ໂດຍສະເພາະແມ່ນສໍາລັບໂຄງການໂຮງງານຂາງ ແລະເຫຼັກກ້າ ໄທງວຽນ.
|
|
 |
|
ທ່ານພົນເອກ ຟານວັນຢາງ ແລະບັນດາສະຫາຍໃນຄະນະສະມາຊິກສະພາແຫ່ງຊາດແຂວງ ໄທງວຽນ. ພາບ: qdnd.vn |
ແຈ້ງໃຫ້ຜູ້ມີສິດເລືອກຕັ້ງຊາບກ່ຽວກັບຜົນການພັດທະນາເສດຖະກິດ-ສັງຄົມຂອງປະເທດ ໃນໄລຍະຜ່ານມາ, ທ່ານພົນເອກ ຟານວັນຢາງ ໃຫ້ຮູ້ວ່າ: ປີ 2025, ພັກ ແລະລັດ ໄດ້ຜັນຂະຫຍາຍປະຕິບັດຢ່າງຂ້ຽວຂາດ, ຄົບຊຸດບັນດາແຜນນະໂຍບາຍທີ່ມີລັກສະນະປະຫວັດສາດ, ສ້າງກຳລັງໜູນຢ່າງແຂງແຮງໃຫ້ແກ່ການພັດທະນາປະເທດ... ສໍາລັບກອງທັບ, ໃນປີຜ່ານມາ, ຄະນະພັກການທະຫານສູນກາງ, ກະຊວງປ້ອງກັນປະເທດ ໄດ້ປະຕິບັດວຽກງານເປັນເສນາທິການຍຸດທະສາດກ່ຽວກັບການທະຫານ, ການປ້ອງກັນຊາດ ເປັນຢ່າງດີ ແລະເສີມຂະຫຍາຍບົດບາດຫຼັກແຫຼ່ງ, ກໍ່ສ້າງພື້ນຖານປ້ອງກັນຊາດທົ່ວປວງຊົນໃຫ້ໝັ້ນຄົງເຂັ້ມແຂງ, ປົກປັກຮັກສາປະເທດຊາດຫວຽດນາມ ສັງຄົມນິຍົມໄວ້ຢ່າງໝັ້ນຄົງ. ພິເສດ, ວຽກງານກໍ່ສ້າງອົງຄະນະພັກກອງທັບບັນລຸໄດ້ໝາກຜົນສໍາຄັນຫຼາຍຢ່າງ, ອົງຄະນະພັກກອງທັບ ເວົ້າລວມ, ເວົ້າສະເພາະແມ່ນຄະນະພັກການທະຫານສູນກາງ ໄດ້ນຳພາ, ຊີ້ນຳທົ່ວກອງທັບປະຕິບັດສຳເລັດ ແລະສໍາເລັດຢ່າງດີເດັ່ນທຸກໜ້າທີ່ວຽກງານທີ່ໄດ້ຮັບມອບໝາຍ.
|
|
 |
|
ບັນຍາກາດທີ່ກອງປະຊຸມ. ພາບ: qdnd.vn |
ຄາດຄະເນ ປີ 2026, ສະຖານະການດ້ານການເມືອງ ແລະຄວາມໝັ້ນຄົງຂອງໂລກ, ພາກພື້ນຈະສືບຕໍ່ຜັນແປຢ່າງສັບສົນ, ຄາດເດົາໄດ້ຍາກ. ຢູ່ພາຍໃນປະເທດ ຈະດຳເນີນຫຼາຍເຫດການການເມືອງທີ່ສໍາຄັນ, ເຊັ່ນ: ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກ; ການເລືອກຕັ້ງສະມາຊິກສະພາແຫ່ງຊາດຊຸດທີ XVI ແລະສະມາຊິກສະພາປະຊາຊົນທຸກຂັ້ນ ອາຍຸການ 2026-2031, ໃນຂະນະທີ່ຄວາມຮຽກຮ້ອງຕ້ອງການ, ໜ້າທີ່ສ້າງສາ, ປົກປັກຮັກສາປະເທດ ວາງອອກນັບມື້ນັບສູງຂຶ້ນ. ສະນັ້ນ, ແຂວງໄທງວຽນ ຕ້ອງກໍາແໜ້ນສະພາບການໃນທຸກດ້ານ, ມີນະໂຍບາຍທີ່ເໝາະສົມ, ທັນການ, ມີປະສິດທິຜົນ; ເປັນເຈົ້າການ, ມີຄວາມໄຫວພິບໃນການຊີ້ນໍາ, ບໍລິຫານ; ຕັດສິນໃຈສູງ, ມີການກະທໍາຢ່າງຂ້ຽວຂາດ, ສູ້ຊົນໃຫ້ລື່ນກາຍຄາດໝາຍເສດຖະກິດ-ສັງຄົມປີ 2025. ເອົາໃຈໃສ່ເຖິງການພັດທະນາວັດທະນະທຳ, ສັງຄົມ, ຮັບປະກັນຊີວິດສັງຄົມ, ຍົກລະດັບຊີວິດການເປັນຢູ່ຂອງປະຊາຊົນ; ເບິ່ງແຍງດູແລ, ໜູນຊ່ວຍຜູ້ມີຄຸນງາມຄວາມດີ, ຄອບຄົວນະໂຍບາຍ, ຄອບຄົວທຸກຍາກ, ປະຊາຊົນເຂດຊົນເຜົ່າສ່ວນໜ້ອຍ. ສືບຕໍ່ປັບປຸງ, ເພີ່ມທະວີການປ້ອງກັນຊາດ, ປ້ອງກັນຄວາມສະຫງົບ; ຮັບປະກັນການຮັກສາຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມ.
|
|
 |
|
ທ່ານພົນເອກ ຟານວັນຢາງ ມອບຂອງຂວັນໃຫ້ບັນດາຄອບຄົວນະໂຍບາຍຢູ່ແຂວງໄທງວຽນ. ພາບ: qdnd.vn |
ເນື່ອງໃນໂອກາດນີ້, ຕາງໜ້າໃຫ້ຄະນະພັກການທະຫານສູນກາງ, ກະຊວງປ້ອງກັນປະເທດ, ທ່ານພົນເອກ ຟານວັນຢາງ ໄດ້ມອບຂອງຂວັນຈໍານວນ 9 ພູດໃຫ້ກົມກອງລວມໝູ່ ແລະ 200 ພູດໃຫ້ບັນດາຄອບຄົວນະໂຍບາຍ, ຄອບຄົວທີ່ປະສົບຄວາມຫຍຸ້ງຍາກຢູ່ແຂວງໄທງວຽນ.
ໂດຍ: ໄຊຊະນະ