ຫວຽດນາມ ແລະອີຢູ ຊຸກຍູ້ການຮ່ວມມືຮອບດ້ານ
ກປ.ອອນໄລ - ວັນທີ 24 ພະຈິກ, ທີ່ສຳນັກງານອົງການພົວພັນຕ່າງປະເທດ ສະຫະພາບເອີຣົບ (EEAS) ປະຈຳ ບຣຸກແຊນ (ແບນຊິກ), ທ່ານນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ ແລະທ່ານນາງ Paola Pampaloni ຮັກສາການຫົວໜ້າກົມໃຫຍ່ອາຊີ-ປາຊີຟິກ ຂອງ EEAS ໄດ້ເປັນປະທານຮ່ວມກອງປະຊຸມ ຄັ້ງທີ 6 ຂອງຄະນະກຳມະການປະສົມ ຫວຽດນາມ - ສະຫະພາບເອີຣົບ (ອີຢູ) ເພື່ອຜັນຂະຫຍາຍປະຕິບັດສັນຍາຄູ່ຮ່ວມມື ແລະການຮ່ວມມືຮອບດ້ານລະຫວ່າງ ຫວຽດນາມ ແລະອີຢູ (PCA).
ເຂົ້າຮ່ວມກອງປະຊຸມ, ຝ່າຍຫວຽດນາມ ມີທ່ານ ຫງວຽນວັນຖາວ ເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າຫວຽດນາມ ປະຈໍາ ສະຫະພາບເອີຣົບ, ພ້ອມກັບຜູ້ຕາງໜ້າບັນດາກະຊວງ, ຂະແໜງການທີ່ກ່ຽວຂ້ອງ ແລະຜູ້ຕາງໜ້າ EEAS ແລະຜູ້ຕາງໜ້າບັນດາກົມໃຫຍ່ຂອງຄະນະກໍາມະການເອີຣົບ (EC).
ກ່າວເປີດກອງປະຊຸມ, ທ່ານນາງ Paola Pampaloni ໄດ້ສະແດງຄວາມເຫັນອົກເຫັນໃຈຕໍ່ຫວຽດນາມ ສຳລັບຄວາມເສຍຫາຍທີ່ເກີດຈາກພາຍຸ ແລະນໍ້າຖ້ວມ. ທ່ານນາງກ່າວວ່າ ອີຢູ ໄດ້ໜູນຊ່ວຍ ຫວຽດນາມ 850.000 ເອີໂຣ ເພື່ອແກ້ໄຂຜົນຮ້າຍຢ້ອນຫຼັງ ແລະສືບຕໍ່ຮຽກຮ້ອງໃຫ້ບັນດາປະເທດສະມາຊິກປະກອບສ່ວນ. ບາງປະເທດ ເຊັ່ນ: ລຸກຊຳບວກ, ເຢຍລະມັນ ແລະສາທາລະນະລັດເຊັກ ໄດ້ຕອບສະໜອງແລ້ວ; ຂົນສົ່ງເຄື່ອງຊ່ວຍເຫຼືອທຳອິດຈາກ ລຸກຊຳບວກ ໄດ້ມາຮອດຫວຽດນາມ ແລ້ວ.
    |
 |
|
ທ່ານນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດ ແລະທ່ານນາງ Paola Pampaloni, ຮັກສາການຫົວໜ້າກົມໃຫຍ່ອາຊີ-ປາຊີຟິກ ຂອງ EEAS ເປັນປະທານຮ່ວມກອງປະຊຸມຄັ້ງທີ 6 ຂອງຄະນະກຳມະການປະສົມ ຫວຽດນາມ-ອີຢູ. ພາບ: baoquocte.vn |
ທີ່ກອງປະຊຸມ, ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການທາງດ້ານເສດຖະກິດ-ສັງຄົມ, ນະໂຍບາຍການຕ່າງປະເທດ ແລະທົບທວນຄືນຢ່າງຮອບດ້ານກ່ຽວກັບການຮ່ວມມືລະຫວ່າງຫວຽດນາມ-ອີຢູ ໃນຂອບເຂດທີ່ມີຢູ່ແລ້ວ. ສອງຝ່າຍໄດ້ຕີລາຄາວ່າ ການພົວພັນລະຫວ່າງຫວຽດນາມ-ອີຢູ ສືບຕໍ່ພັດທະນາຢ່າງຕັ້ງໜ້າພາຍຫຼັງ 35 ປີ ແຫ່ງການສ້າງຕັ້ງການພົວພັນທາງການທູດ;...
ທ່ານນາງ ເລທິທູຮັ່ງ ໄດ້ສະເໜີໃຫ້ ອີຢູ ສະໜັບສະໜູນ ຫວຽດນາມ ໃນການຂຸດຄົ້ນຂໍ້ລິເລີ່ມຕ່າງໆ ຢ່າງມີປະສິດທິຜົນ ຄື: Erasmus+ (ໂຄງການສຶກສາ, ບໍາລຸງສ້າງ, ຊາວໜຸ່ມ ແລະກິລາ), Horizon Europe (ໂຄງການຄົ້ນຄວ້າ ແລະນະວັດຕະກຳໃຫຍ່ທີ່ສຸດຂອງອີຢູ) ແລະ JETP (ຄູ່ຮ່ວມຫັນປ່ຽນພະລັງງານໃຫ້ມີຄວາມຍຸຕິທໍາ). ທ່ານນາງຮອງລັດຖະມົນຕີ ຍັງໄດ້ແຈ້ງໃຫ້ຊາບກ່ຽວກັບມາດຕະການທີ່ເຂັ້ມແຂງຂອງຫວຽດນາມ ໃນການຕ້ານການຫາປາທີ່ຜິດກົດໝາຍ, ບໍ່ລາຍງານ ແລະບໍ່ຕາມຂໍ້ກໍານົດ (IUU), ພ້ອມທັງ, ສະເໜີໃຫ້ອີຢູ ແລະບັນດາປະເທດສະມາຊິກພິຈາລະນາຍົກເລີກ “ບັດເຫຼືອງ" ໂດຍໄວ. ສະຫະພາບເອີຣົບ ຮັບຮູ້ຄວາມມານະພະຍາຍາມຂອງຫວຽດນາມ ແລະຈະສືບຕໍ່ແລກປ່ຽນກ່ຽວກັບບັນດາບັນຫາເຕັກນິກ.
ສອງຝ່າຍໄດ້ເຫັນດີເປັນເອກະພາບທີ່ຈະຊຸກຍູ້ລັດທິຫຼາຍຝ່າຍ ແລະບົດບາດຂອງສະຫະປະຊາຊາດ; ຢືນຢັນການແກ້ໄຂຂໍ້ຂັດແຍ່ງຢູ່ທະເລໂດຍສັນຕິວິທີ, ບົນພື້ນຖານກົດໝາຍສາກົນ, ພິເສດແມ່ນອະນຸສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982 (UNCLOS 1982). ສອງຝ່າຍສະໜັບສະໜູນການຮັບປະກັນຄວາມໝັ້ນຄົງ, ຄວາມປອດໄພ ແລະຄວາມເສລີໃນການເດີນເຮືອ ແລະການບິນຢູ່ທະເລຕາເວັນອອກ.
ໂດຍ: ໄຊນີດາ