ໃນບັນຍາກາດທີ່ເຕັມໄປດ້ວຍໄມຕີຈິດມິດຕະພາບ, ທ່ານ ເຈິ່ນແທງເໝິນ ປະທານສະພາແຫ່ງຊາດຫວຽດນາມ ແລະ ທ່ານ Woo Won Shik ປະທານສະພາແຫ່ງຊາດ ສ.ເກົາຫຼີ ໄດ້ຕີລາຄາສູງການທູດລັດຖະສະພາ ແລະການຮ່ວມມືລະຫວ່າງສະພາແຫ່ງຊາດສອງປະເທດ ໄດ້ກາຍເປັນຈຸດພົ້ນເດັ່ນ, ສວມບົດບາດສຳຄັນໃນການຕິດຕາມກວດກາຊຸກຍູ້ການປະຕິບັດບັນດາຂໍ້ຕົກລົງຂັ້ນສູງ, ແບ່ງປັນປະສົບການດ້ານນິຕິບັນຍັດ ແລະເພີ່ມທະວີຄວາມເຂົ້າໃຈເຊິ່ງກັນ ແລະກັນລະຫວ່າງສອງປະເທດ. ການນໍາສອງປະເທດ ໄດ້ເຫັນດີສືບຕໍ່ປັບປຸງຄວາມໄວ້ເນື້ອເຊື່ອໃຈດ້ານການເມືອງ, ຮັກສາການແລກປ່ຽນຄະນະຜູ້ແທນຂັ້ນສູງຢ່າງເປັນປະຈຳ, ສ້າງພື້ນຖານແກ່ການເປີດກວ້າງການຮ່ວມມືຮອບດ້ານໃນທຸກຂົງເຂດ; ຊຸກຍູ້ການເປີດກວ້າງການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ; ແລກປ່ຽນປະສົບການ ແລະໜູນຊ່ວຍເຊິ່ງກັນ ແລະກັນໃນບັນຫາຄວາມໝັ້ນຄົງທີ່ບໍ່ເປັນການທະຫານ, ອາດຊະຍາກຳຂ້າມຊາດ.

leftcenterrightdel
ທ່ານ ເຈິ່ນແທງເໝິນ ປະທານສະພາແຫ່ງຊາດຫວຽດນາມ ແລະ ທ່ານ Woo Won Shik ປະທານສະພາແຫ່ງຊາດ ສ.ເກົາຫຼີ. ພາບ: qdnd.vn

ສອງຝ່າຍໄດ້ຕີລາຄາສູງຕໍ່ໝາກຜົນອັນດີງາມຂອງການຮ່ວມມືລະຫວ່າງສະພາແຫ່ງຊາດສອງປະເທດໃນໄລຍະຜ່ານມາ; ເຫັນດີເປັນເອກະພາບຈະຮັກສາການແລກປ່ຽນຄະນະຜູ້ແທນຂັ້ນສູງຢ່າງເປັນປະຈຳລະຫວ່າງສອງສະພາແຫ່ງຊາດ ເພື່ອແນໃສ່ເພີ່ມທະວີການແລກປ່ຽນປະສົບການໃນການສ້າງກົດໝາຍ, ລະບອບລະບຽບການເພື່ອຮັບໃຊ້ການພັດທະນາແບບຍືນຍົງ; ຊຸກຍູ້ບົດບາດຂອງອົງການນິຕິບັນຍັດສອງປະເທດໃນການສົມທົບກັນຕິດຕາມກວດກາການປະຕິບັດສົນທິສັນຍາສາກົນ, ຂໍ້ຕົກລົງການຮ່ວມມືທີ່ໄດ້ລົງນາມລະຫວ່າງລັດຖະບານສອງປະເທດ; ເພີ່ມທະວີການພົບປະແລກປ່ຽນການຮ່ວມມື ແລະເສີມຂະຫຍາຍບົດບາດເປັນຂົວຕໍ່ຂອງກຸ່ມສະມາຊິກລັດຖະສະພາມິດຕະພາບຂອງສະພາແຫ່ງຊາດສອງປະເທດ; ສືບຕໍ່ເພີ່ມທະວີການສົມທົບກັນ, ສະໜັບສະໜູນເຊິ່ງກັນ ແລະກັນໃນບັນດາເວທີປາໄສລະຫວ່າງລັດຖະສະພາໃນພາກພື້ນ ແລະໃນໂລກ.

ທີ່ການພົບປະ, ສອງຝ່າຍໄດ້ປຶກສາຫາລືກ່ຽວກັບບາງບັນຫາພາກພື້ນ ແລະສາກົນທີ່ຕ່າງຝ່າຍຕ່າງມີຄວາມສົນໃຈ; ເຫັນດີເປັນເອກະພາບຈະສົມທົບກັນຢ່າງແໜ້ນແຟ້ນ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະການພັດທະນາໃນພາກພື້ນ ແລະໃນໂລກ.

ພາຍຫຼັງການພົບປະສອງຝ່າຍ, ທ່ານ ເຈິ່ນແທງເໝິນ ປະທານສະພາແຫ່ງຊາດຫວຽດນາມ ແລະ ທ່ານ Woo Won Shik ປະທານສະພາແຫ່ງຊາດ ສ.ເກົາຫຼີ ໄດ້ດໍາເນີນພິທີລົງນາມບົດບັນທຶກຊ່ວຍຈໍາ ວ່າດ້ວຍການຮ່ວມມືລະຫວ່າງສະພາແຫ່ງຊາດຫວຽດນາມ ກັບສະພາແຫ່ງຊາດ ສ.ເກົາຫຼີ. 

ໂດຍ: ຈາງຫງວຽນ